﻿ZABURA.
109.
Dauda lɛ̀ɛ. Luda, mↄkↄ̃nn madì n táaki lɛ́, ǹsungↄ̃ yĩtɛnaro. 
Zaakũ gbɛ̃ vãni bonkpɛdenↄ dì ma yaka, òdi lɛ́ bo ò ɛ́kɛyã dima. 
Òdi likamai kũ zãnguyão, òdi fìti kɛ kũmao pↄ́ke wíwinnɛnaa sari. 
Òdi yenyĩ ɛramɛnɛ kũ yãdimmanaao, bee kũ madì adua kɛńnɛ. 
Òdi yã mana fĩna bomɛnɛ kũ a vãnio, yenyĩ sↄ̃, kũ zãnguo. 
Ǹ Setan sùu kɛa, ǹ a kpakũ kũ Ibilisio. 
Ǹ tó yãkpatɛ a nɛ, ǹ tó a aduakɛna yã inɛ. 
A wɛ̃̀ndi gↄ̃ kutu, gbɛ̃ pãnde gↄ̃ a gɛ̃nɛ ũ. 
Ǹ tó a nɛ́nↄ gↄ̃ de sari, a nanↄ gↄ̃ gyaanↄ ũ. 
A nɛ́nↄ gↄ̃ likarazↄ̃rinↄ ũ ògↄ̃ bara kɛ, ògↄ̃ ń kpakɛ ń bɛ zĩinↄ gũn. 
A fĩnade a pↄ́nↄ nakↄ̃a pínki, buri zĩ̀tↄnↄ a zĩ àre sía. 
Gbɛ̃ke sún gbɛ̃kɛ kɛnɛro, òsun wɛ̃nda dↄ̃ a nɛ́ kũ à tònↄnɛro. 
Ǹ tó a burinↄ láka, ń tↄ́ súngↄ̃ kú buri kũ oni futɛnↄ tɛ́ro. 
A dizinↄ vãnikɛna yã gↄ̃ dↄngu, Dikiri, ǹsun tó a da durunna kɛ̃a zikiro. 
Ń durunna gↄ̃ dↄngu, Dikiri, ń yã sã gbɛ̃nↄgu andunia gũn. 
Zaakũ adi dↄn à gbɛ̃kɛ kɛ gbɛ̃kenɛro, àdi wɛ́ tã takasidenↄa kũ wɛ̃ndadenↄ kũ pↄsiradenↄo ari gyãwãn. 
À ye sa vãni onnɛnaai, ǹ tó à wí a musu. Sa mana onnɛnaa dì kánɛro, ǹ tó arubarika kɛ kãao zã̀. 
À lɛ́kɛnnɛnaa dà lán uta bà, à a mɛ̀ɛ yàku lán í bà, à gɛ̃̀ a wánↄn lán nísi bà. 
Kanaa pì gↄ̃ daala lán uta bà, àgↄ̃ dↄ a pi lán asa bà. 
Dikiri fĩna bo ma yãdimmarinↄa lɛ kũ gbɛ̃ kũ òdi yã vãni o ma musunↄo. 
Dikiri Gbãnasĩndapinkide, ǹ ma wɛ̃nda gwa n tↄ́ yãi, ǹ ma bo n manakɛ kũ n gbɛ̃kɛo yãi. 
Zaakũ takaside wɛ̃ndademɛ ma ũ, ma pↄ yàka búgubugu. 
Matɛn gɛ̃tɛ lán ↄkↄsi uraa bà, má de lán kwa kũ ĩa tɛn sɛ́ bà. 
Lɛ́yĩnaa tò ma gbá dì sí sɛ́ doro, ma fɛ̃fɛ̃ ma gↄ̃ wàakuu. 
Ma gↄ̃ yáadↄnapↄ ũ ma yãdimmarinↄnɛ, òdi ma gwa ò mì gbãkɛ. 
Ǹ kpámai, Dikiri ma Luda, ǹ ma sura ba n gbɛ̃kɛ yãi, 
de ò dↄ̃ kũ n ↄ mɛ́ à kɛ̀, mↄkↄ̃n Dikiri, n kɛnaamɛ. 
Bee tó ò ma ka, ĩni arubarika damagu, tó ò fùtɛmai, wé'i ni ń kũ, makũ n zↄ̀bleri mani pↄnna kɛ. 
Tↄ́ vãni ni gↄ̃ ma yãdimmarinↄnɛ uta ũ, oni wé'i daḿma lán arukĩmbaa bà. 
Mani Dikiri sáabu kpá kũ kòto gbãnao, mani a táaki lɛ́ dasi kↄ̃kakaranaa gũn. 
Zaakũ àdi zɛ kũ wɛ̃ndadenↄ, àdi ń sí gbɛ̃ kũ òdi yã vútɛḿmanↄa. 
