﻿ZABURA.
111.
Aleluya! Mani Dikiri sáabu kpá kũ nɛ̀sɛdoo gbɛ̃ mananↄ kↄ̃kakaranaa gũn. 
Dikiri yãkɛnanↄn zↄ̃kↄ̃, gbɛ̃ kũ a yã kɛ̀ńnɛ nnanↄ dì a laasun lɛ́. 
A yãkɛnanↄn bɛ̀ɛrɛ vĩ kũ gakurio, a yãmanakɛna lakana vĩro. 
Dikiri tò a yãbonsarɛkɛnanↄ dↄ̀ógu, à sùru vĩ kũ wɛ̃ndao. 
Àdi pↄ́ble kpá a vĩnakɛrinↄa, àdigↄ̃ dↄ a bàka kunna kũńwo yãn. 
À a yãkɛnanↄ gbãna mↄ̀ a gbɛ̃nↄnɛ, à buri pãndenↄ bùsunↄ sì à kpàḿma. 
A yãkɛnanↄn náani vĩ akũsↄ̃ à zɛ́ vĩ, a yãdannɛnanↄn yãpura vĩ pínki. 
Yã pìnↄ zĩni pɛtɛna gↄrↄ sĩnda pínki, àdi yã kɛ a zɛ́a kũ náanio. 
À surabarii zĩ̀ à a gbɛ̃nↄ bò, a bàka kú kũńwo gↄrↄ sĩnda pínki. A tↄ́ kú adona, à naasi vĩ. 
Vĩnakɛna Dikirinɛɛmɛ ↄ̃ndↄ̃ zĩni ũ, gbɛ̃ kũ ò a vĩna vĩnↄmɛ asãnsĩnidenↄ ũ. A táakilɛna nigↄ̃ lakana vĩro. 
