﻿ZABURA.
115.
Adi kɛ ókↄ̃nↄnlo Dikiri, adi kɛ ókↄ̃nↄnlo, mↄkↄ̃mmɛ ń de ò n tↄ́ bo n gbɛ̃kɛ kũ n náanio yãi. 
À kɛ̀ dera burinↄ dì ó la ò pi ó Luda kú máa? 
Ó Luda kú musu, pↄ́ kũ à yein àdi kɛ. 
Ò ń tãnanↄ pì kũ andurufuuo kũ wuraao, bisãsiri ↄzĩmɛ. 
Ò lɛ́ vĩ, ama òdi yã oro, ò wɛ́ vĩ, ama òdi gu ero. 
Ò sã vĩ, ama òdi yã maro, ò yĩ vĩ, ama òdi pↄ́ gbĩ maro. 
Ò ↄ vĩ, ama òdi pↄ́ kũro, ò gbá vĩ, ama òdi táa oro, òdi kòto kɛkɛro. 
Ń pìrinↄn lɛɛlɛ kũńwomɛ kũ gbɛ̃ kũ òtɛni ń náani kɛnↄ ń pínki. 
Isarailanↄ, à Dikiri náani kɛ! Àkũmɛ á kpanyĩri ũ kũ á sɛ̃gbakoo. 
Haruna burinↄ, à Dikiri náani kɛ! Àkũmɛ á kpanyĩri ũ kũ á sɛ̃gbakoo. 
Dikiri vĩnakɛrinↄ, à Dikiri náani kɛ! Àkũmɛ á kpanyĩri ũ kũ á sɛ̃gbakoo. 
Dikiri dↄ̀ ó yãn, ani arubarika daógu. Ani arubarika da Isaraila burinↄgu, ani arubarika da Haruna burinↄgu, 
ani arubarika da a vĩnakɛrinↄgu, nɛ́ fíti gbɛ̃ zↄ̃kↄ̃. 
Dikiri á buri kara, ákↄ̃nↄ kũ á nɛ́nↄ. 
Dikiri arubarika daágu, musu kũ zĩtɛo Kɛ̀rii. 
Musu bi Dikiri pↄ́mɛ, ama à zĩtɛ nà bisãsirinↄnɛ ń ↄĩ. 
Adi kɛ gɛ̀nↄ mɛ́ òdi Dikiri táaki lɛ́ro, kesↄ̃ gbɛ̃ kũ ń lɛ́ yĩtɛnↄ. 
Ókↄ̃nↄ, ónigↄ̃ Dikiri sáabu kpá zaa tera ari gↄrↄ sĩnda pínki. Aleluya! 
