﻿ZABURA.
144.
Dauda lɛ̀ɛ. Arubarikademɛ Dikiri ma gbɛ̀si ũ, àdi zĩ̀kana dadamɛnɛ, àdi ma ↄ tùtu kɛ zĩ̀kana yãi. 
Àkũmɛ ma utɛki ũ, àdi gbɛ̃kɛ kɛmɛnɛ, à de ma zɛki gbãna ũ, àdi ma sura ba. À de ma sɛ̃ngbako ũ kũ madì nai, àdi tó burinↄ mì natɛmɛnɛ. 
Dikiri, bↄ́n bisãsiri ũ kũ a yã dìgↄ̃ dↄnguu? Bↄ́n a ũ kũ ndì laakari dↄaa? 
Bisãsiri de lán kàsa plí bàmɛ, a wɛ̃̀ndii dì gɛ̃tɛ lán uraa bà. 
Dikiri, ǹ musu natɛ ǹ kipa, ǹ ↄ na kpinↄa de ò túsukpɛ bo. 
Ǹ tó legũ pí ǹ gbɛ̃nↄ fãkↄ̃a, ǹ kà fã ń tɛ́ ò lɛkↄ̃a. 
Ǹ ↄ bo zaa musu ǹ ma kũ, ǹ ma bo í zↄ̃kↄ̃ↄ gũn, ǹ ma sí buri zĩ̀tↄnↄa. 
Ɛ́kɛtona ń lɛ́ pà, òdi ↄ pãtɛ kũ lɛ́pãgbɛ̃naao. 
Luda, mani lɛ̀ dufu sínnɛ, mani n táaki lɛ́ kũ mↄrↄ bà mɛ̀n kurideo, 
mↄkↄ̃n kũ ndì tó kínanↄ zĩ̀ ble, ndì n zↄ̀bleri Dauda bo fɛ̃nɛda pãsĩ lɛ́i. 
Ǹ ma sí ǹ ma bo buri zĩ̀tↄnↄ ↄĩ, ɛ́kɛtona ń lɛ́ pà, òdi ↄ pãtɛ kũ lɛ́pãgbɛ̃naao. 
Ó nɛ́gↄ̃gbɛ̃nↄ ni futɛ ń kɛfɛnnakɛgↄrↄa lán lí kũ à nna màa bà, ó nɛ́nↄgbɛ̃nↄ gↄ̃ de lán kínabɛ gbɛ̀gba kũ ò zã blèaa bà. 
Ó dↄ̃̀nↄ ni pa kũ pↄ́ buri sĩnda pínkio. Ó sãnↄ ni kↄ̃ lɛu wàa do, oni ká ũgbangba ó kpàsan. 
Ó zùnↄ nigↄ̃ de nɛ́randenↄ ũ, nↄ̀bↄtɛna nigↄ̃ kunlo, lagona nigↄ̃ kunlo, wɛ̃nda'ↄ́ↄdↄna nigↄ̃ kú gãnulɛaro. 
Arubarikadenↄmɛ gbɛ̃ kũ ń kunna de lɛnↄ ũ, arubarikadenↄmɛ gbɛ̃ kũ Dikiri de ń Luda ũnↄ ũ. 
