﻿YAASINƆ.
3.
Ma nɛ́, ǹsun tó ma yãdannɛna sãnguro, ǹgↄ̃ yã kũ ma dìtɛnnɛnↄ kũna n swɛ̃̀n. 
Zaakũ ani n ká wɛ̃̀ndi gbã̀naa, ani aafia karannɛ. 
Gbɛ̃kɛ kũ náanio sún kɛ̃mmaro, ǹgↄ̃ dana mↄ̀wakarɛ ũ, ǹ kɛ̃ n swɛ̃̀ɛa lákũ òdi yã kɛ̃ anloa nà, 
n tↄ́ nigↄ̃ nna, ĩnigↄ̃ mana Luda kĩnaa kũ bisãsirinↄ. 
Ǹ Dikiri náani kɛ kũ nɛ̀sɛ mɛ̀n doo, ǹsun gbãna kpá n zĩda dↄ̃naaaro. 
Ǹgↄ̃ a dↄ̃ n yã sĩnda pínki kɛnaa gũn, ani zɛ́ poronnɛ súsu. 
Ǹsun n zĩda gwa ↄ̃ndↄ̃de ũro, ǹgↄ̃ Dikiri vĩna vĩ ǹ kɛ̃ yã vãnia. 
Abirekũ nigↄ̃ de n mɛ̀ aafia ɛzɛ ũ, ani n wánↄ gba gbãna. 
Ǹ bɛ̀ɛrɛ lí Dikirinɛ kũ n aruzɛkɛo kũ n burapↄ káakunↄ pínki, 
pↄ́blewɛnↄ ni n dↄ̃̀ pa ari àgↄ̃ kↄ́tɛ, n lo zↄ̃kↄ̃nↄ ni pa yɛ́rɛrɛ kũ sèwɛ̃ dufuo. 
Ma nɛ́, tó Dikiri tɛn foru dↄmma, ǹsun dↄkɛ kũ a yãoro, tó à kpã̀kɛ̃nyĩ, ǹsun tó à kɛnnɛ ĩniro. 
Zaakũ gbɛ̃ kũ Dikiri yeiin àdi toto, lákũ de dì kɛ a nɛ́ kũ à kɛ̀nɛ mananɛ nà. 
Arubarikaden gbɛ̃ kũ à ↄ̃ndↄ̃ lè à kũ̀ à dↄ̃naa lè à pàpa ũ. 
Zaakũ à àre vĩ de andurufula, àdi karana kɛńnɛ de wurala. 
À bɛ̀ɛrɛ vĩ de gbɛ̀ bɛ̀ɛrɛdela, pↄ́ kũ ń a ni vĩnↄ ke dí ká a ũro. 
Wɛ̃̀ndi gbã̀na kú a ↄplan, aruzɛkɛ kũ gakurio kú a ↄzɛn. 
A yãkɛnanↄn nna, a zɛ́ sĩnda pínki aafia vĩ. 
À de lí wɛ̃̀ndide ũ gbɛ̃ kũ ò kũnanↄnɛ, arubarikadenↄn gbɛ̃ kũ ò sìnↄ ũ. 
Dikiri gonikɛ gũn à zĩtɛ kàtɛ, a ↄ̃ndↄ̃ gũn à musu kɛ̀. 
À ísira wɛ̀ɛ bò a dↄ̃naa gũn, à tò ludambɛ luku mↄtↄ vĩ. 
Ma nɛ́, ǹgↄ̃ wɛ́zɛ̃ vĩ kũ fayaao, ǹsun wɛ́ vĩalaro. 
Anigↄ̃ de n nini wɛ̃̀ndi ũ, anigↄ̃ de mↄ̀wakarɛ ũ n wakaaa. 
Ĩnigↄ̃ kure n laakariia, pↄ́ke ni kpánnɛro. 
Tó n wutɛ, vĩna ni n kũro, ĩni wútɛ ǹ i o nna. 
Ĩni vĩna kɛ kariinɛro, ke kisira kũ àdi yãvãnikɛrinↄ le kãnto. 
Zaakũ Dikiri nigↄ̃ de n mìkpaki ũmɛ, ani tó n gbá vĩ tankutɛla. 
Tó n ↄ tɛni n kpɛ le, ǹsun gí ǹ yã mana kɛ gbɛ̃ kũ à de ǹ kɛnɛɛnɛro. 
Tó ń kpányĩ zɛ́ vĩ, ǹsun pi n gbɛ̃dakenɛ à gɛ́ gĩa ari ziaro. 
N gbɛ̃dake kũ à kú n sarɛ kũ à n náanikɛna, ǹsun a kũ yã vãnioro. 
Tó gbɛ̃ dí yãke kɛnnɛro, ǹsun lɛ́kpakↄ̃a kɛ kãao pãro. 
Ǹsun gbãnamↄnnɛri kunna ni dɛro, ǹsun tɛ́ a yãkɛna keiro. 
Zaakũ Dikiri tɛ̃̀ɛmɛ manafikidenↄ ũ, nɛ̀sɛpuradenↄn àdi kɛ a kpàasinↄ ũ. 
Dikiri dì láari bo gbɛ̃ vãninↄ ↄnnwa, àdi arubarika da gbɛ̃ mananↄ bɛn. 
Àdi lalandidenↄ lalandi kɛ, ama à gbɛ̃kɛ vĩ kũ zĩdabusarinↄ. 
Ɔ̃ndↄ̃de dì bɛ̀ɛrɛ le, yↄ̃nkↄ sↄ̃ àdi wé'i da a zĩdaa. 
