﻿YAASINƆ.
10.
Nɛ́ ↄ̃ndↄ̃de dì tó a de pↄ kɛ nna, nɛ́ yↄ̃nkↄ dì a da nɛ̀sɛɛ yakanɛ. 
Ɔgↄ vãni dì àre kɛro, yãkɛna a zɛ́a dì ń sí ga ↄĩ. 
Dikiri dì tó nà gbɛ̃ mana dɛro, àdi yãvãnikɛrinↄ tɛ̃ pↄ́ kũ ò yeii. 
Ɔ ma'ãde dì su kũ takasio, zĩkɛna ↄplapla mɛ́ àdi su kũ aruzɛkɛo. 
Nɛ́ kũ àdi pↄ́wɛ kakara sakare bi laakaridemɛ, nɛ́ kũ àdi i o pↄ́kɛ̃gↄrↄ wé'i vĩro. 
Gbɛ̃ mana mìi dìgↄ̃ arubarika vĩ, yã pãsĩ dì yãvãnikɛri lɛ́ pa. 
Gbɛ̃ mana dì ga kũ a tↄ́oro, yãvãnikɛri tↄ́ dì kakatɛmɛ. 
Ɔ̃ndↄ̃de dì zĩ kɛ yãditɛnanↄa, yãbↄtɛri dì a zĩda nɛ. 
Gbɛ̃ kũ àdi yã kɛ a zɛ́a kú a laakariia, yãvãnikɛri yã ni bo gupuraa. 
Gbɛ̃gwana kũ wɛ́doo dì su kũ yão, gbɛ̃ kũ àdi yã utɛ a nɛ̀sɛɛ gũnlo mɛ́ àdi ibɛrɛ mì dɛ. 
Gbɛ̃ mana lɛ́ bi ísɛ̃boki wɛ̃̀ndidemɛ, yã pãsĩ dì yãvãnikɛri lɛ́ pa. 
Zãngu dì fìti da, yenyĩ dì lá kútɛ taari sĩnda pínkila. 
Ɔ̃ndↄ̃ yã dìgↄ̃ kú laakaride lɛ́n, flã̀an fayasaride pↄ́ ũ a kpɛa. 
Ɔ̃ndↄ̃rinↄ dì dↄ̃na zĩ di, laakarisaride lɛ́ dì a kakatɛ araga. 
Ɔgↄde aruzɛkɛ dìgↄ̃ denɛ lán wɛ̃tɛ bĩnide bà, takaside takasi sↄ̃ àdi a kakatɛ. 
Gbɛ̃ mana láada dì sunɛ kũ wɛ̃̀ndiio, yãvãnikɛrii àree dì wɛ́tãmma inɛ. 
Gbɛ̃ kũ àdi lɛ́damma ma dì wɛ̃̀ndi zɛ́ mↄ́ńnɛ, gbɛ̃ kũ àdi pã kpá foruii dì ń sãtɛ. 
Gbɛ̃ kũ àdi zãngu utɛ bi ɛ́kɛdemɛ, gudɛri bi yↄ̃nkↄmɛ. 
Yã dasi bↄtɛnaa dìgↄ̃ durunna sariro, gbɛ̃ kũ àdi a lɛ́ kũ bi laakaridemɛ. 
Gbɛ̃ mana nɛ́nɛ de lán andurufu swáswa bà, yãvãnikɛrii nɛ̀sɛɛ bɛ̀ɛrɛ vĩro. 
Gbɛ̃ mana yã'onaa dì gbɛ̃ dasinↄ da zɛ́a, laakarisaride dì ga fayasarikɛ gũmmɛ. 
Dikiri arubarikaa dì ń kɛ aruzɛkɛde ũ, zĩkɛna kũ wario dì pↄ́ke kararo. 
Vãnikɛna de yↄ̃nkↄnɛ kↄ̃kↄ̃yã ũ, ↄ̃ndↄ̃ dì kɛ laakaridenɛ nna. 
Yã kũ yãvãnikɛri tɛn vĩna kɛnɛ mɛ́ ani a le, Luda ni pↄ́ kũ gbɛ̃ mana yei kpáa. 
Tó zàga'ĩa kàka à gɛ̃̀, yãvãnikɛrinↄ dìgↄ̃ kun doro, gbɛ̃ mana zĩni dìgↄ̃ pɛtɛna gↄrↄ sĩnda pínki. 
Lákũ lemu kpã̀kpãa dì kɛ sakaanɛ nà, lákũ túsukpɛ dì kɛ wɛ́nɛ nà, lɛn ma'ãde de lɛ gbɛ̃ kũ ò a zĩ̀nↄnɛ. 
Vĩnakɛna Dikirinɛ dì wɛ̃̀ndi gbã̀na kara, yãvãnikɛrinↄ sↄ̃, ń wɛ̃̀ndi nigↄ̃ kutumɛ. 
Gbɛ̃ mananↄ wɛ́ dìgↄ̃ dↄ pↄnnai, yãvãnikɛrinↄ sↄ̃, wɛ́dↄina ni ń nɛ. 
Dikiri zɛ́ de utɛki ũ gbɛ̃ mananↄnɛ, yãvãnikɛrinↄ sↄ̃, àdi ń kakatɛmɛ. 
Oni gbɛ̃ mana futɛ a gbɛ̀n zikiro, gbɛ̃ vãni sↄ̃ ani vutɛki e bùsunlo. 
Ɔ̃ndↄ̃ yã dì bo gbɛ̃ mana lɛ́n, lɛ́vãnide sↄ̃, oni a nɛ́nɛ zↄ̃kↄ̃rɛmɛ. 
Gbɛ̃ mana yã kũ à kↄ̃ sìo ò ońnɛ dↄ̃, yãkpɛdangara'onaa dìgↄ̃ da gbɛ̃ vãni lɛ́n. 
