﻿YAASINƆ.
17.
Burodi kusu kori sona yãkete sari mana de nↄ̀bↄgbɛ̃na ↄn fìtidenla. 
Zↄ̀ laakaride nigↄ̃ gbãna vĩ nɛ́ wé'idammarii musu, anigↄ̃ baka vĩ ↄn túbi gũn. 
Òdi andurufu kũ wuraao baasa, ama Dikiri dì ń swɛ̃̀ɛ tàasi ká. 
Gbɛ̃ vãni sã dìgↄ̃ nna kũ yãdↄrↄsario, ɛ́kɛde laakarii dìgↄ̃ kú gbɛ̃piriia. 
Gbɛ̃ kũ àdi takaside fobo dì a Kɛ̀ri gya bo, gbɛ̃ kũ àdi gbɛ̃ yáa dↄ kisiraa ni bo pãro. 
Daikorenↄmɛ ń dizinↄ gakuri ũ, denↄmɛ ń nɛ́nↄ ĩadãbↄ ũ. 
Yãzɛde'onaa dì kↄ̃ sí kũ yↄ̃nkↄoro, ɛ́kɛ dì kↄ̃ sí kũ bɛ̀ɛrɛdeoro. 
Gusarɛgba de yↄbande ũ a dàriinɛ, gu kũ à lìtɛn pínki a tá dìgↄ̃ nnamɛ. 
Gbɛ̃ kũ à lá kù taarila tɛn yenyĩ wɛtɛmɛ, yãzĩfutɛri sↄ̃, àdi gbɛ̃nna kɛ̃kↄ̃a. 
Ɔ̃ndↄ̃de dì kpãkɛ̃nyĩna ma, ama yↄ̃nkↄ dì gbɛ̃na gɛ̃̀n baaakↄ̃ daro. 
Yã vãni dì do sãgbãnadenɛ arɛ, oni zĩ̀ri wɛ̃ndadↄ̃risaride gbarɛa. 
Dakarɛna kũ músu kũ ò a nɛ́nↄ sɛ̀tɛo sã̀na de dakarɛna kũ yↄ̃nkↄo a yↄ̃nkↄkɛ gũnla. 
Tó gbɛ̃ yã mana fĩnaa bò kũ yã vãnio, yã vãni ni kɛ̃ a ↄnnwaro. 
Lɛ́kpakↄ̃ana naana de lán ízɛ wɛ̃naa bàmɛ, ǹ bo gwe ari fìti gↄ̃ gɛ́ futɛ. 
Yã nna kpana taaridea kũ yãdana taarisaridelao, Dikiri zã̀ yã birenↄn pínki. 
Bↄ́ àreen yↄ̃nkↄ vĩ ↄgↄblena kyódↄ̃naa musuu? Zaakũ à nɛ̀sɛ vĩro. 
Gbɛ̃nna yenyĩ dìgↄ̃ kun gↄrↄ sĩnda pínki, vĩ̀ni kũ dakũnanↄ kun ń yã dↄ̃kↄ̃nɛna yãimɛ. 
Yↄ̃nkↄ dì gbɛ̃ fĩna di a musu, àdi zɛnkpɛkɛ sɛ́ a gbɛ̃dakenɛ. 
Gbɛ̃ kũ à ye fìtiii ye durunnaimɛ, gbɛ̃ kũ à a gãnulɛ bò yàasa dì kisira wɛtɛ a zĩdanɛ. 
Laasunkpɛdangarade dì yã mana lero, lɛ́fↄtↄde dì lɛ́tɛ à da yãn. 
Yↄ̃nkↄ da pↄ dìgↄ̃ siramɛ, fayasaride de pↄ dìgↄ̃ nnaro. 
Nɛ̀sɛ nnamɛ ɛzɛ mana ũ, pↄsira dì ń fɛ̃fɛ̃. 
Yãvãnikɛrii dì gusarɛgba sↄtↄ a utan, de à yãzɛde mì dɛo yãi. 
Laakaride wɛ́ dìgↄ̃ kú ↄ̃ndↄ̃a, ama yↄ̃nkↄ wɛ́pɛki dìgↄ̃ zã̀mɛ. 
Nɛ́ yↄ̃nkↄ dì tó a de pↄ gↄ̃ sira, àdi a da'ina nɛ̀sɛɛ yaka. 
À mana ò wɛ́ tã taarisaridearo, bɛ̀ɛrɛde gbɛ̃na a nɛ̀sɛmana yãi zɛ́ vĩro. 
Gbɛ̃ kũ àdi a lɛ́ kũ dↄ̃na vĩ, nɛ̀sɛyĩdade dìgↄ̃ laakari vĩ. 
Bee yↄ̃nkↄ, tó à yĩtɛna, òdi a ditɛ ↄ̃ndↄ̃de ũmɛ, gbɛ̃ kũ àdi a lɛ́ kũ bi laakaridemɛ. 
