﻿YAASINƆ.
21.
Kína nɛ̀sɛ kú Dikiri ↄĩ lán ízɛ bàmɛ, àdi a litɛ gu kũ à yeiia. 
Baadi dìgↄ̃ e a yãkɛna mana, ama Dikiri mɛ́ àdigↄ̃ ń nɛ̀sɛ dↄ̃. 
Manakɛna kũ yãkɛna a zɛ́aao dì kɛ Dikirinɛ de sa'onala. 
Zĩdabina kũ ĩadão dì yãvãnikɛrinↄ durunna bo gupuraa. 
Kokaride laasun dì a ká nnamanaaa, nɛ̀sɛwãnade dì gɛ̃ takasin. 
Aruzɛkɛ kũ gbɛ̃ lè ɛ́kɛtonaa gũn ni gɛ̃tɛ kũ ĩao à ń kpá gai. 
Yãvãnikɛrinↄ pãsĩkɛna ni tá kũńwo, zaakũ òdi we ò yãzɛde kɛro. 
Taaride yãkɛnaa dìgↄ̃ dↄ̀rↄ vĩro, taarisaride yãkɛnaa dìgↄ̃ swáswa. 
Ina kpɛ́ laasin mana de kunna kpɛ́n lɛɛlɛ kũ nↄ fìtideola. 
Yãvãnikɛrii swɛ̃̀ɛ dìgↄ̃ kú yã vãniamɛ, àdi a gbɛ̃dake wɛ̃nda gwaro. 
Tó ò wɛ́ tã̀ lalandidea, yↄ̃nkↄ dì ↄ̃ndↄ̃ kũmɛ, tó ò kpã̀kɛ̃ ↄ̃ndↄ̃dei, a dↄ̃naa dì karamɛ. 
Luda mana, àdi yãvãnikɛri bɛ tàasi ká, àdi yãvãnikɛrinↄ ká kakatɛnan. 
Gbɛ̃ kũ adi sã kpá wɛ̃ndade wikiaro, àpii ni wiki lɛ́ se, gbɛ̃ke ni wearo. 
Gbadana asiri gũn dì pↄfɛ̃ kpátɛ, gusarɛgba sↄtↄna utan dì pↄfɛ̃ mì dɛ. 
Yãgↄ̃gↄ̃na a zɛ́aa dì gbɛ̃ mana pↄ kɛ nna, ama àdi vĩna dada yãvãnikɛriinɛ. 
Gbɛ̃ kũ à pã̀ laakari zɛ́nɛ ni si gyãwãndenↄ tɛ́mɛ. 
Gbɛ̃ kũ à nɛ̀sɛɛ kpà pↄnnakɛnaaa ni gↄ̃ takasin, gbɛ̃ kũ à ye wɛ̃i kũ nísio ni kɛ aruzɛkɛde ũro. 
Yãvãnikɛrinↄmɛ gbɛ̃ mananↄ tↄrↄmakpabↄ ũ, Luda dì wɛ́ tã náanisaridenↄa nɛ̀sɛpuradenↄ gɛ̃nɛ ũ. 
Kunna gbárannan mana de vutɛna kũ nↄ fìtide pɛ̃tɛ̃deola. 
Pↄ́ble mana kũ nísio dìgↄ̃ katɛna ↄ̃ndↄ̃de bɛa, ama yↄ̃nkↄ dì a pↄ́ mↄ́mↄ gↄ̃̀nↄmɛ. 
Gbɛ̃ kũ àdi yãzɛde kũ gbɛ̃kɛo wɛtɛ dì wɛ̃̀ndi kũ yã nnao kũ bɛ̀ɛrɛɛo le. 
Ɔ̃ndↄ̃de dì si gↄ̃sa gbãnanↄ wɛ̃tɛa, àdi zɛki gbãna kũ òtɛni a náani kɛ gboro. 
Gbɛ̃ kũ à a lɛ́ fↄ̃̀ akũsↄ̃ à a nɛ́nɛ kũ̀, àkũ mɛ́ àdi a zĩda bo yãn. 
Gbɛ̃ kũ à zĩda bina vĩ kũ ĩadãnaao tↄ́n fobori, àdi yã kɛ kũ zã̀zã zↄ̃kↄ̃ↄomɛ. 
Ma'ãde pↄyeinaa dì a kpá gai, kũ à ↄ gbàrɛ zĩi yãi. 
Àdigↄ̃ kú pↄ́nidɛnan gↄrↄ sĩnda pínki, gbɛ̃ mana sↄ̃, àdi gba da kũ nɛ̀sɛ mɛ̀n doo. 
Gbɛ̃ vãni sa'ona Dikiria bi tɛ̃̀ɛmɛ, atɛ̃nsa tó àtɛn o kũ manafikio. 
Sèeda ɛ́kɛde ni mì dɛ, gbɛ̃ kũ à tɛ̀ a yãi ni kakatɛ. 
Gbɛ̃ vãni wɛ́ dìgↄ̃ pãsĩmɛ, nɛ̀sɛpurade wɛ́ dìgↄ̃ tɛ́ a yãkɛnaai. 
Ɔ̃ndↄ̃ ke wɛ́zɛ̃ ke lɛ́damma, ń ke ni fↄ̃ à Dikiri furo. 
Òdi sↄ̃ soru kɛ zĩ̀ yãimɛ, ama Dikiri mɛ́ à zĩ̀blena yã dↄ̃. 
