﻿YAASINƆ.
23.
Tó n su pↄ́ ble kũ gbãnadeo, ǹgↄ̃ dↄ̃ gbɛ̃ kũ à kú n arɛ. 
Tó sãnkarademɛ n ũ, ǹ fɛ̃nɛ da n kòtooa. 
Ǹsun wãkũ kɛ a pↄ́ble nísideiro, zaakũ pↄ́ble pì de lán daburuzunnɛnaa bàmɛ. 
Ǹsun wari dↄ n zĩdaa ↄgↄdasiwɛtɛna yãiro, ǹ ↄ̃ndↄ̃ kũ ǹgↄ̃ n zĩdakũna dↄ̃. 
Òdi wɛ́ lɛ́ ↄgↄa, akũ àdi gɛ̃ zɛ́la, àdi dɛ̀mbɛrɛ bobo à vura lán vãu bà. 
Ǹsun aniapãsĩde pↄ́ blero, ǹsun wãkũ kɛ a pↄ́ble nísideiro, 
zaakũ àdigↄ̃ a ↄgↄ naro a nɛ̀sɛmmɛ. Ani pinnɛ ǹ pↄ́ ble ǹ í mi, ama adi kɛnɛ a nɛ̀sɛnlo. 
Ĩni a fíti kũ n blèe pisimɛ, sáabu kũ n kɛ̀ ni kɛ pã. 
Ǹsun yã o yↄ̃nkↄ sãnlo, zaakũ ani pã kpá n ↄ̃ndↄ̃yãimɛ. 
Ǹsun zĩtɛ lɛ́ sèeda zĩ woro, ǹsun tonɛnↄ bú lɛ́ ǹ ká n pↄ́laro, 
zaakũ ń Dãkpãri gbãna, ani bo n kpɛ à yã sí kũńwo. 
Ǹ lɛ́damma yã da n swɛ̃̀n, ǹ laakari dↄ dↄ̃na yãa. 
Ǹsun gí n nɛ́ foruiro, tó n a gbɛ̃̀ kũ flã̀ao, ani garo. 
Ǹ a gbɛ̃ kũ flã̀ao, de ǹ a bo ga ↄĩ. 
Ma nɛ́, tó n ↄ̃ndↄ̃ vĩ n swɛ̃̀n, ma pↄ ni kɛ nna. 
Tó yãzɛde tɛn bo n lɛ́n, ma pↄ ni kɛ nna. 
Ǹsun durunnakɛrinↄ gwena ni dɛro, ǹgↄ̃ Dikiri vĩna vĩ gↄrↄ sĩnda pínki, 
zaakũ ĩnigↄ̃ zia vĩmɛ, tãmaa ni n nɛro. 
Ma nɛ́, ǹ ma yã ma, ĩni ↄ̃ndↄ̃ kũ, ǹ tó n swɛ̃̀ gↄ̃ tɛ́ zɛ́ manai. 
Ǹsun kakara kũ wɛ̃mirinↄro, ǹsungↄ̃ kú lɛ́'idenↄ tɛ́ro, 
zaakũ wɛ̃dɛri kũ lɛ́'ideo dì gↄ̃ takasidenↄ ũ, ń mɛ̀kpɛtɛɛ dì ń da utakasadanammɛ. 
Ǹ n de'ina yã ma, tó n da zĩ kũ̀, ǹsun a gya boro. 
Ǹgↄ̃ yãpura wɛtɛ, ǹsun ↄ gbarɛiro, ǹ ↄ̃ndↄ̃ kũ kũ yãdadanaao kũ wɛ́zɛ̃o. 
Gbɛ̃ mana de pↄ dìgↄ̃ nna manamana, gbɛ̃ kũ à nɛ́ ↄ̃ndↄ̃de ì pↄ dìgↄ̃ nnaamɛ. 
Ǹ tó n de kũ n dao pↄ kɛmma nna, ǹ tó n da'ina ayuwii kɛmma. 
Ma nɛ́, ǹ n nɛ̀sɛ wɛ̃mɛnɛ, n wɛ́ gↄ̃ tɛ́ ma yãkɛnaai, 
zaakũ karua bi wɛ̀ɛ lòkotoomɛ, nↄ pãpãkɛri bi lↄ̀gↄ sↄrↄrↄmɛ. 
Àdi gbɛ̃ kpákpa lán kpãni wɛ́dewɛ bà, àdi tó gↄ̃gbɛ̃nↄ gↄ̃ náani sari dasi. 
Dín òdi waiyoo kɛnɛɛ? Dín òdi o'o kɛnɛɛ? Dí mɛ́ à lɛ́kpakↄ̃ana vĩi? Dí mɛ́ à zuka vĩi? Dí mɛ́ àdi kĩnna pãa? Dí wɛ́ mɛ́ à tɛ̃raa? 
Gbɛ̃ kũ òdi gì kɛ wɛ̃mikianↄ, kũ òdi gɛ́ kpátɛ kɛ sèwɛ̃ yãkatɛnanↄimɛ. 
Ǹsun wɛ́ biri sèwɛ̃a de a tɛ̃rakɛ n ni dɛro, zaakũ àdigↄ̃ pípi zaa tùruu gũn, akũsↄ̃ a gɛ̃na lɛ́n dìgↄ̃ nna. 
Ani láka saka tↄ̃mma lán mlɛ̃̀ɛ bà, ani n gbã à n kũ lán pitiko bà. 
Ĩni wɛ́ kɛ pla kũ pↄ́ kũ ńdi e yãroo, ĩni laasun kpɛdangara lɛ́ n swɛ̃̀n. 
Ĩnigↄ̃ de lán gbɛ̃ kũ à wutɛna gón ísira musu bà, lán gbɛ̃ kũ à kú gó'itɛ biza mìsↄ̃ntɛa bà. 
Ĩni pi: Ò ma gbɛ̃, adi ũmaro, ò ma kɛ búgubugu, mádi a wari maro. Bↄrɛn ma wɛ́ ni were de mà í wɛtɛ mà mi dↄↄ? 
