﻿YAASINƆ.
26.
Lán legũsisina de nà sakare kesↄ̃ lán legũmana de nà pↄ́kɛ̃gↄrↄa, lɛn gakuri dí kↄ̃ sí kũ yↄ̃nkↄoro lɛ. 
Lákũ bãntoro kũ ludakibɛbãoo dìgↄ̃ vuravura à gɛ́ la à su gwe nà, lɛn gbɛ̃kana pã dì pↄ́ke boḿmaro lɛ. 
Gése bi sↄ̃ pↄ́mɛ, bà bi zaaki pↄ́mɛ, yↄ̃nkↄ pↄ́n gò ũ a kpɛa. 
Ǹsun we yↄ̃nkↄa a fayasarikɛaro, de ǹsun gↄ̃ lán a bàro yãi. 
Ǹ yã we yↄ̃nkↄa a fayasarikɛ lɛ́n, de àsun a zĩda gwa ↄ̃ndↄ̃de ũro yãi. 
Tó n lɛ́gbãzã kɛ̀ yↄ̃nkↄ gãi, n n zĩda yàkamɛ, n yã wɛ̀tɛ n zĩdanɛ. 
Yáasi kũ à kú yↄ̃nkↄ lɛ́n de lán ɛrɛ gbá kũ àtɛn gbãkɛ bàmɛ. 
Bɛ̀ɛrɛlina yↄ̃nkↄnɛ de lán gbɛ̀dana gbɛ̀mban bà. 
Yáasi kũ à kú yↄ̃nkↄ lɛ́n de lán lɛ̀ kũ à dana wɛ̃dɛri ↄĩ bàmɛ. 
Gbɛ̃ kũ à yↄ̃nkↄ ke gbɛ̃ kũ àtɛn gɛ̃tɛ dà zĩn de lán tofekari kũ àdi nↄ̀bↄ sĩnda pínki gbã bàmɛ. 
Yↄ̃nkↄ ɛrana a yãfayasarikɛnaaa de lán gbɛ̃da kũ à ɛ̀ra à a pisi blèe bàmɛ. 
N gbɛ̃ kũ à a zĩda dìtɛ ↄ̃ndↄ̃de ũ è yá? Yↄ̃nkↄ sã̀na deala. 
Ma'ãde dì pi: Músu kú zɛ́mmɛ, nↄ̀bↄ pãsĩ tɛ́ batun. 
Lákũ gbàa dìgↄ̃ yĩgã a asigbeaa nà, lɛn ma'ãde dìgↄ̃ litɛlitɛ a wútɛkia lɛ. 
Ma'ãde dì ↄ da tan à fu pↄ́blelinaa à da a lɛ́n. 
Ma'ãde dìgↄ̃ da a ↄ̃ndↄ̃ de yãwemmadↄ̃ri gbɛ̃nↄn supplanↄla. 
Gbɛ̃ kũ à vĩ̀ à pɛ̀tɛ dakenↄ ledikpanan de lán gbɛ̃ kũ à gbɛ̃da kũ̀ a sãaa bà. 
Gbɛ̃ kũ à a gbɛ̃dake sã̀tɛ gbasa à pìnɛ: Matɛn fàai bomɛ de lán bã̀nde kũ àtɛn kà tɛ́de kũ kàgbao zuńyĩ bàmɛ. 
Tó yàka kunlo, tɛ́ dì gamɛ, tó kↄrↄmↄtↄde kunlo, fìtii dì lákamɛ. 
Lákũ sĩsĩ dì kɛ tɛ́yↄ̃ↄnɛ nà, lákũ yàkaa dì kɛ tɛ́nɛ nà, lɛn lɛ́kpakↄ̃ade dì fìti da lɛ. 
Kↄrↄmↄtↄde yã dì kɛńnɛ lán zↄ́ bà, àdi gɛ̃ lɛ́n dↄ̃̀ↄ ari nɛ̀sɛɛ gũn. 
Nɛ̀sɛpãsĩde kũ àdi yã nnanna ońnɛ de lán lo kũ ò andurufu í lɛ̀aa bàmɛ. 
Zãngurii dì a zĩda kɛkɛ kũ lɛ́omɛ, ama manafiki mɛ́ à kú a swɛ̃̀n. 
Tó yã nnanna bò a lɛ́n, ǹsun síro, zaakũ yã vãni mɛ̀n suppla mɛ́ à kú a swɛ̃̀n. 
Bee tó à a zãngu ùtɛ manafiki gũn, a vãni dì bo gupuraa pari wára. 
Gbɛ̃ kũ àtɛn wɛ̀ɛ yↄ̃ńnɛ ni zu a gũmmɛ, gbɛ̃ kũ àtɛn gbɛ̀ gbigiri kɛ, gbɛ̀ɛ pì ni si adea. 
Ɛ́kɛde dì zã gbɛ̃ kũ àdi ń yakan, manafikide dì gbɛ̃ kpá lɛtɛnaai. 
