﻿YAASINƆ.
30.
Yake nɛ́ Agu yã'onaamɛ. Ma kpasa Luda, ma kpasa manamana, 
zaakũ ma yↄ̃nkↄkɛ de dakenↄ pↄ́la, má bisãsiri asãnsĩni vĩro. 
Mádi ↄ̃ndↄ̃ dadaro, má Luda dↄ̃na vĩro. 
Dí mɛ́ à gɛ̀ɛ ludambɛ yã à sùu? Dí mɛ́ à ĩa kàkara à kũ̀ a ↄĩi? Dí mɛ́ à legũ'i kòko a pↄ́kasann? Dí mɛ́ à zĩtɛ lɛ́zɛkinↄ kɛ̀ɛ? A tↄ́n deraa? A Nɛ́ tↄ́n deraa? Tó ń dↄ̃. 
Luda yãnↄ pínki à mamberu vĩro, àdigↄ̃ de sɛ̃gbako ũ gbɛ̃ kũ à nàaiinɛ. 
Ǹsun yãke kara a yã gũnlo, de àsun n ɛ́kɛ kánnɛ n ↄĩro yãi. 
Yã mɛ̀n plan matɛn gbɛkamma Dikiri, ǹsun gíomɛnɛro ari màgↄ̃ gɛ́ ga. 
Ǹ ma kɛ̃ yãpã'onaaa kũ ɛ́kɛtonaao, ǹgↄ̃ ma gba pↄ́ble mↄkↄ̃ana. Ǹsun ma kɛ takaside kesↄ̃ ↄgↄdaside ũro, 
de pↄ́ súngↄ̃ dimai mà ledi kpányĩ mà pi dímɛ Dikiri ũ yãi, de takasi sún ma kũ mà kpãni o mà n tↄ́ yakaro yãi. 
Ǹsun yã dí zↄ̀ↄa a dikiri kĩnaaro, de àsun n ká à wí n musuro yãi. 
Gbɛ̃kenↄ kun òdi ń denↄ tↄ́ bɛ̃̀nɛ sí, òdi ń danↄ sↄ̃sↄ̃. 
Gbɛ̃kenↄ kun òdigↄ̃ da ò gbãsĩro, ama ń vãnikɛ dí kɛ̃ḿmaro. 
Gbɛ̃kenↄ kun òdi ń zĩda bi, òdi gbɛ̃nↄ gwa ò mì zu. 
Gbɛ̃kenↄ kun ń saka de lán fɛ̃nɛda bà, ń saka sↄ̃ntɛnↄn de lán fɛ̃nɛnↄ bà, òdi andunia takasidenↄ kũ bisãsiri wɛ̃ndadenↄ kɛo yákiyaki. 
Toro nɛ́nↄgbɛ̃nↄ vĩ mɛ̀n pla, òdi pi: Ǹ ó gba, ǹ ó gba. Pↄ́ mɛ̀n aakↄ̃ kun kũ òdi kãro, à kà siikↄ̃ se, òdi pi pↄ́ mↄ̀ḿmaro: 
Gyãwãn kũ para nɛ́'isↄↄo kũ zĩtɛ kũ í dì mↄ́aroo kũ tɛ́ kũ àdi pi a kãroo. 
Wɛ́ kũ nɛ́ dì a de foboo akũsↄ̃ àdi a da gya boo, swawɛɛ kãakãannanↄ ni a wɛ́ pì bo, yumburukunↄ ni a gɛ̀ ble. 
Yã mɛ̀n aakↄ̃ kun kũ ò de ma dↄ̃nala, à kà mɛ̀n siikↄ̃ se má ń mì dↄ̃ro: 
Zɛ́ kũ vãu dìgↄ̃ tɛ́o musu, zɛ́ kũ mlɛ̃̀ɛ dìgↄ̃ táa on gbɛ̀ sàraaa, zɛ́ kũ gó'itɛ dìgↄ̃ tɛ́n ísira dagura kũ zɛ́ kũ gↄ̃gbɛ̃ dìgↄ̃ ye nↄkpareiio. 
Nↄ zinakɛri yãkɛnaan dí: Àdi pↄ́ ble à ↄ má a lɛ́a à pi ádi yã vãni kɛro. 
Yã mɛ̀n aakↄ̃ mɛ́ àdi tó zĩtɛ lukaluka, à kà siikↄ̃ se, zĩtɛ ni yã pìnↄ fↄ̃ro: 
Zↄ̀ kũ à kpata blè, yↄ̃nkↄ kũ à pↄ́ blè à kã̀, 
nↄgbɛ̃ kũ ò zã̀agu akũ à zã kɛ̀ kũ zↄ̀ nↄkpare kũ à gↄ̃̀ a dikiri zã nↄ ũo. 
Pↄ́ fítinↄn kú zĩtɛ mɛ̀n siikↄ̃, ama ò ↄ̃ndↄ̃ vĩ manamana: 
Babarenↄn kun pↄ́ gbãnanↄ ũro, ama òdi pↄ́ble zàna kɛ sakaremɛ. 
Gbɛ̀'ɛ̃nɛnↄn kun pↄ́ zↄ̃kↄ̃nↄ ũro, ama òdi bɛ bo gbɛ̀ daguramɛ. 
Kwanↄ dìgↄ̃ kína vĩro, ama òdi bↄtɛ ò zɛzɛ gã̀ kũ gã̀aomɛ. 
Ĩni fↄ̃ ǹ zukpata kũ kũ ↄo, ama àdi gɛ́ na kína kpɛ́ sakaaimɛ. 
Pↄ́ mɛ̀n aakↄ̃ kun kũ ń tɛna mana, à kà siikↄ̃ se, ń táa'ona nna: 
Músu kũ à de gↄ̃sa ũ nↄ̀bↄnↄ tɛ́, àdi boru kpɛ pↄ́kenɛro 
kũ kosa kũ à tuke bòoo kũ blèkofĩniio kũ kína kũ à kú a zĩ̀karinↄ arɛo. 
Tó n yↄ̃nkↄyã kɛ̀ zĩdabinaa gũn ke tó n yã vãni laasun lɛ̀, ǹ ↄ kú n lɛ́a, 
zaakũ lákũ òdi vĩ fakam pá à nísi bo nà, ke lákũ òdi yĩ kũ ò fĩ à aru bo nà, lɛn gbɛ̃ pↄfɛ̃naa dì fìti da lɛ. 
