﻿LAASUNDE.
7.
Tↄ́ nna mana de nísi gbĩ nna bɛ̀ɛrɛdela, gagↄrↄ mana de igↄrↄla. 
Gɛ̃na ↄn kũ òtɛn gɛ̀ ↄ́ↄ dↄn mana de gɛ̃na ↄn kũ òtɛn dikpɛ kɛnla, zaakũ gbɛ̃ sĩnda pínki lakanaan gwe, à mana gbɛ̃ kũ ò kunnↄ yã pì da. 
Wɛ̃ndakɛna mana de yáadↄnala, pↄsirakɛnaa gbɛra nɛ̀sɛɛ dì were. 
Ɔ̃ndↄ̃ri laakarii dìgↄ̃ kú ↄn kũ òtɛn ↄ́ↄ dↄnwa, yↄ̃nkↄ laakarii dìgↄ̃ kú ↄn kũ òtɛn pↄnna kɛnwa. 
À mana ǹ ↄ̃ndↄ̃ri kpãkɛ̃nyĩna da de ǹ sã kpá yↄ̃nkↄ n tↄ́kpanala, 
zaakũ yↄ̃nkↄnↄ yáadↄna de lán sàkpa lí tɛ́pũtãna kĩnii gũn bàmɛ. Abirekũ pãmɛ dↄ. 
Gbãna mↄna gbɛ̃nↄnɛɛ dì tó ↄ̃ndↄ̃ri yↄ̃nkↄ kũmɛ, gusarɛgba dì gbɛ̃ yakamɛ. 
Yã mìdɛna mana de a naanala, mɛna mana de ń zĩda binala. 
Ǹsun tó n pↄ fɛ̃ likalikaro, zaakũ yↄ̃nkↄ mɛ́ àdigↄ̃ pↄfɛ̃ vĩ. 
Ǹsun pi, bↄ́yãin yãgↄrↄ mana de tera pↄ́laro, zaakũ yãlana dí taka bi ↄ̃ndↄ̃yãnlo. 
Ɔ̃ndↄ̃ bi pↄ́ manamɛ lán túbi bà, à àre vĩ gbɛ̃ kũ òtɛn ifãntɛ̃ enↄnɛ. 
Ɔ̃ndↄ̃ bi utɛkimɛ, lákũ ↄgↄ de utɛki ũ nà, ama dↄ̃na àreen dí: Ɔ̃ndↄ̃ dì gbɛ̃ kũ ò vĩnↄ sura ba. 
Ǹ laasun lɛ́ Luda yãkɛnanↄa. Dí mɛ́ ani fↄ̃ à pↄ́ kũ à kɛ̀ kotinaa dↄdↄↄ? 
Tó gↄrↄ nna sùmma, ǹ pↄnna kɛo. Tó gↄrↄ vãnimɛ sↄ̃, ǹ laasun lɛ́. Luda mɛ́ à a pínki kɛ̀, de gbɛ̃ke súngↄ̃ a zia dↄ̃ro yãi. 
Ma wɛ̃̀ndi kori dí gũn ma yã díkĩnanↄ è pínki. Ma gbɛ̃ mana è, à gà a manakɛnaa gũn, ma gbɛ̃ vãni è, àtɛn gì kɛ a yãvãnikɛnaa gũn. 
Ǹsun tó n manakɛna gɛ̃ ↄlaro, ǹsun tó n ↄ̃ndↄ̃ gɛ̃ ↄlaro. À kɛ̀ dera ĩni n zĩda kakatɛɛ? 
N vãni sún gɛ̃ ↄlaro, ǹsungↄ̃ yↄ̃nkↄ ũro. À kɛ̀ dera ĩni ga n gↄrↄ ãa? 
À mana ǹgↄ̃ yã mɛ̀n pla pìnↄ kũnamɛ, ǹsun ↄ gbarɛiro, zaakũ gbɛ̃ kũ à Luda vĩna vĩ dì a pla pìnↄ zɛ́ le pínkimɛ. 
Ɔ̃ndↄ̃ dì tó ↄ̃ndↄ̃ri gbãna gↄ̃ de wɛ́tɛ gbãnade gbɛ̃nↄn kurinↄla. 
Gbɛ̃ mana kũ àdigↄ̃ yã mana kɛ kũ àdi durunna kɛro kú andunia gũnlo. 
Ǹsun sã kpá yã kũ gbɛ̃nↄ tɛn oi pínkiro, de ǹsun ma n zĩkɛri tɛni n sↄ̃sↄ̃ro. 
Zaakũ ń dↄ̃ n zĩdanɛ, kũ mↄkↄ̃n se n gbɛ̃nↄ sↄ̃̀sↄ̃ dasi. 
Ma yã birenↄ gwà kũ ↄ̃ndↄ̃o pínki, ma zɛo kũ mà ↄ̃ndↄ̃ kũ, akũ à zã̀ kũmao. 
Bee tó ↄ̃ndↄ̃ fↄ̃̀ àgↄ̃ dera, a kúki zã̀, a asiri zↄ̃kↄ̃ manamana, dí mɛ́ ani fↄ̃ à boaa? 
Ma ↄ̃ndↄ̃ kũ yã sĩnda pínkioo mìi tàasii kà, ma gwàgwa de mà le mà dↄ̃, de mà yãvãnikɛna dↄ̃ yↄ̃nkↄkɛ ũ, de mà yↄ̃nkↄkɛ dↄ̃ mìsarikɛ ũ. 
Nↄgbɛ̃ kũ à de tankutɛ ũ a swɛ̃̀ bi gbàgidiimɛ a ↄnↄ bi mↄ̀kakↄ̃anaamɛ, a yã dì ma pↄ yaka de gala. Gbɛ̃ kũ a yã kà Ludanɛɛ dì wotoa, ama nↄgbɛ̃ pìi dì durunnakɛri kũmɛ. 
Makũ laasunde ma pì, ǹ yã kũ ma boa gwa. Kũ matɛn yã gwa zɛ́azɛa de mà le mà a mì dↄ̃, 
gↄrↄ kũ matɛn wɛtɛ lenaa sari, ma gↄ̃gbɛ̃ mana lè mɛ̀n do gbɛ̃nↄn wàa sↄↄronↄ tɛ́, ama bee nↄgbɛ̃ mana mɛ̀n do mádi le ń tɛ́ro. 
Yã kũ ma boaan dí. Luda bisãsirinↄ kɛ̀ nɛ̀sɛpuradenↄ ũmɛ, akũ ò gɛ̃̀ manafiki zɛ́n. 
