﻿LAASUNDE.
9.
Ma abirenↄ laasun lɛ̀ pínki, akũ ma zɛo kũ gbɛ̃ mananↄ kũ ↄ̃ndↄ̃rinↄ kũ ń yãkɛnanↄn kú Luda ↄĩmɛ. Gbɛ̃ke dìgↄ̃ dↄ̃ tó yenyĩ ke zãngu tɛni a dãro. 
Yã dokↄ̃nↄ mɛ́ àtɛn gbɛ̃ sĩnda pínki dã, yãpuradenↄ kũ nɛ̀sɛpãsĩdenↄ, gbɛ̃ mananↄ kũ gbɛ̃ vãninↄ, gbãsĩsaridenↄ kũ gbãsĩdenↄ, ludagbagbarinↄ kũ ludagbagbarisarinↄ. Lákũ à de kũ gbɛ̃ mananↄ nà, lɛn à de lɛ kũ durunnakɛrinↄo. Lákũ à de nà kũ gbɛ̃ kũ òdi la da kũ Ludaonↄ, lɛn à de lɛ kũ gbɛ̃ kũ òdi la da kãaoronↄ. 
Yã kũ àdi kɛ andunia gũn pínki nɛ̀sɛyakayãmɛ, kũ yã dokↄ̃nↄ mɛ́ àdi gbɛ̃ sĩnda pínki le. Yã vãni kↄ̃̀ bisãsirinↄ swɛ̃̀n, yↄ̃nkↄyã mɛ́ àdi dońnɛ arɛ, a gbɛra òdi tá gyãwãnn. 
Gↄrↄ kũ gbɛ̃ kú kũ wɛ̃̀ndiio àdigↄ̃ tãmaa vĩ. Bee gbɛ̃da bɛ̃nɛ à sã̀na de músu gɛ̀la. 
Gbɛ̃ bɛ̃nɛnↄ dↄ̃ kũ oni ga, gɛ̀nↄ sↄ̃ ò pↄ́ke dↄ̃ro. Ò láada ke vĩ doro, ń yã ni dↄ gbɛ̃ken doro. 
Ń yena gbɛ̃i kũ ń zãna gbɛ̃nwo kũ ń nɛ̀sɛgↄ̃bakɛnaao gɛ̃̀ zɛ́lan gwe kↄ̀. Ń bàka nigↄ̃ kú kũ yã kũ àdi kɛ andunia gũnwo ziki doro. 
Ǹ gɛ́ ǹ n pↄ́ ble kũ pↄnnao, ǹ n sèwɛ̃ mi kũ yáadↄnaao, zaakũ Luda n yãkɛnaa pìnↄ sáabu kpà kↄ̀. 
Ǹgↄ̃ uta pura dana gↄrↄ sĩnda pínki. Ǹsungↄ̃ kun nísi dↄkↄna n mìia sariro. 
Ǹ pↄnna kɛ kũ n nanↄ yenyĩdeo n wɛ̃̀ndi kori kũ Luda kpàmma andunia gũn lɛ́n, zaakũ n bakaan gwe gↄrↄ kũ ntɛn ísimma wara andunia gũn. 
Zĩ kũ n ↄ nà a kɛnaaa, ǹ kɛ n gbãna lɛ́n, zaakũ zĩ ke yãgↄ̃gↄ̃na ke dↄ̃na ke ↄ̃ndↄ̃ kú gyãwãn kũ ntɛn tánlo. 
Ma è andunia gũn dↄ kũ bàkpakũsũblenaa dì kɛ bà nna yãnlo, zĩ̀blenaa dì kɛ gbãna yãnlo, pↄ́blelenaa dì kɛ ↄ̃ndↄ̃ yãnlo, aruzɛkɛlenaa dì kɛ wɛ́zɛ̃ yãnlo, nna kũ gbɛ̃nↄ dì kɛ kyódↄ̃na yãnlo, zaakũ gↄrↄ vãni kũ kisirao dì ń lé ń pínki, 
gbɛ̃ke gↄrↄ kũ yã vãni ni a le dↄ̃ro. Lán kpↄ̀ kũ à sì táaru gũn bà, lán bã kũ bà a kũ̀u bà, lɛn gu dì dↄ gbɛ̃nɛ vãnivãni à a kũ bùrum lɛ. 
Ma ↄ̃ndↄ̃ ke taka è andunia gũn, a yã ma kũ gbãna. 
Lakutu ke kun yã, a gbɛ̃nↄn dasiro, akũ kína gbãnade sù à lɛ̀tɛa à lìka a bĩnii. 
Gↄ̃gbɛ̃ takaside ↄ̃ndↄ̃ri ke kú lakutu pìi gũn, à lakutu sura bà kũ a ↄ̃ndↄ̃o, akũ takaside pì yã dí dↄ gbɛ̃kenlo. 
Akũ ma pì ↄ̃ndↄ̃ de gbãnala, ama òdi takaside ↄ̃ndↄ̃ gya bo, òdi a yã daro. 
Ɔ̃ndↄ̃ri yã yĩdayĩda kũ ò sã kpài mana de yↄ̃nkↄnↄ kína patammanala. 
Ɔ̃ndↄ̃ mana de gↄ̃kɛbↄnↄla, ama durunnakɛri mɛ̀n do dì yã mana zↄ̃kↄ̃ↄ yakamɛ. 
