﻿Misee.
3.
Bɛɛ Isirelibɑ Yɑkɔbun bweserun wirugibɑ nɑ kɑ yɑ̃. N ǹ bɛɛyɑ n weenɛ i n woodɑbɑ yɛ̃? 
Adɑmɑ wee i ǹ geɑ kĩ, kɔ̃sɑ i kĩ. I rɑ tɔmbu ben gɑ̃ɑnu kpuro mwɑɑriwɑ. Kpɑ i bu yɔ̃su tereru. 
I rɑ bu diwɑ mɑm mɑm nge yɑɑ ye bɑ kokɑ bɑ kukunu kɔsukɑ, mɑ bɑ ye bɔtirɑ bɑ doke wekerɔ. 
Yen sɔ̃nɑ ì n Yinni Gusunɔ kɑnɑ u bɛɛ somi, u ǹ bɛɛ wisimɔ. U koo bɛɛ biru kisiwɑ kɔ̃sɑ ye i kuɑ min sɔ̃. 
Misee u nɛɛ, wee ye Yinni Gusunɔ u gerumɔ sɔmɔ be bɑ win tɔmbu nɔni wɔ̃kumɔn sɔ̃. U nɛɛ, bɑ̀ n bu gɑ̃ɑnu nɔɔ dokeɑ, bɑ rɑ nɛɛwɑ, bɔri yɛndɑ wee. Bɑ̀ kun mɑɑ bu gɑ̃ɑnu wɛ̃, kpɑ bu nɛɛ, tɑbu sisi. 
Yen sɔ̃, bɑ ǹ mɑɑ yɑm wɑsi. Bɑ ǹ mɑɑ win gɑri mɔ̀. Yɑm wɔ̃kurɑ koo kɑ bu sikerenɑ. Bɑ ǹ mɑɑ gɑ̃ɑnu wɑsi. 
Sɔmɔ be, bɑ koo ben wuswɑɑ wukiriwɑ sekurun sɔ̃. Domi Yinni Gusunɔ u ǹ bu wisimɔ. 
Adɑmɑ nɛ Misee, kon nɑ n dɑm yibɑwɑ. Domi Yinni Gusunɔ u mɑn win Hunde wɛ̃. Nɑ gem kɑ wɔrugɔru sebuɑ. Mɑ nɑ Isirelibɑ, be Yɑkɔbun bweseru ben mɛm nɔɔbu sɑriru sɔ̃ɔmɔ. 
Bɛɛ Isirelibɑ Yɑkɔbun bweserun wirugibu, i swɑɑ dɑkio i nɔ. I ku rɑ gem kɑ̃. I rɑ mu gɔsiewɑ kɔ̃sɑ. 
Wee i tɔmbu goomɔ, i ben dukiɑ suɑmɔ i kɑ Yerusɑlɛmu bɑnimɔ. 
Mɑ i nɔm birɑn kɛ̃nu mwɑɑmɔ i sere siri. Yɑ̃ku kowobu bɑ rɑ ginɑ tɔmbu gobi mwɑɑriwɑ bu sere woodɑ sɔ̃ɔsi, kpɑ Gusunɔn sɔmɔbu bu gobi mwɑ bu sere win gɑri gere. Kpɑ bɑ n sere mɔ̀ bɑ sɑ̃ɑwɑ Gusunɔn tɔmbu. Gɑ̃ɑnu kun bu deemɑmɔ yèn sɔ̃ u kɑ bu wɑ̃ɑ. 
Tɛ̃, bɛɛn sɔ̃, bɑ koo Siɔni kɛrɑ nge gbee te bɑ wukɑ. Kpɑ Yerusɑlɛmu yu ko bɑnsu. Kpɑ guu te tɑ wɑ̃ɑ sɑ̃ɑ yerɔ tu kikisu kpi. 
