﻿MATIU.
26.
Kũ Yesu yã birenↄ ò pínki à làka, akũ à pì a ìbanↄnɛ: 
Á dↄ̃ kũ Vĩnla dikpɛ gↄ̃̀ gↄrↄ pla, oni Bisãsiri Nɛ́ kpáḿma ò a pá lía. 
Abire gbɛra sa'orikinↄ kũ Yuda gbɛ̃ zↄ̃kↄ̃nↄ kↄ̃ kàkara sa'oriki zↄ̃kↄ̃ kũ òdi pi Kayafa bɛa. 
Ò yã gↄ̃̀gↄ̃ ↄ̃ndↄ̃o lákũ oni Yesu kũ ò a dɛ nà 
ò pì: Òsun kɛ dikpɛ zĩro, de gbɛ̃nↄ sún zuka káro yãi. 
Kũ Yesu kú Bɛtani, Simↄ Kusu bɛa, àtɛn pↄ́ ble gɛngɛsɛkɛna, akũ nↄgbɛ̃ ke nài, à lo fítinna kũ nísi gbĩ nna ↄgↄde kú a gũn kũna, akũ à kù Yesu mìia. 
Kũ a ìbanↄ è lɛ, akũ ń pↄ fùtɛ ò pì: Bↄ́n pↄ́ lalasekɛna dí ũu? 
De ò nísi pì yìa yã kũ ↄgↄ zↄ̃kↄ̃ↄo ò kpà takasidenↄa. 
Yesu dↄ̃̀ḿma, akũ à pìńnɛ: Bↄ́yãi átɛn wari dↄ nↄgbɛ̃ pìiaa? À zĩ mana kɛ̀mɛnɛmɛ. 
Takasidenↄn kú kãáo gↄrↄ sĩnda pínki, makũ sↄ̃ manigↄ̃ kú kãáo gↄrↄ sĩnda pínkiro. 
Kũ à nísi pìi kù ma mɛ̀ɛa, à kɛ̀ lɛ de à ma gɛ̀ kɛomɛ. 
Yãpuran matɛn oárɛ, gu kũ òtɛni ma baaru nna waazi kɛn andunia gũn pínki, onigↄ̃ yã kũ nↄgbɛ̃ pìi kɛ̀ o a dↄngu yãi. 
Abire gbɛra gbɛ̃nↄn kuri awɛɛplanↄ do kũ òdi pinɛ Yudasi Isikariↄti gɛ̀ɛ sa'orikinↄ kĩnaa 
à pì: Tó ma Yesu kpàáwa, bↄ́n á ye à kpámaa? Akũ ò andurufu ↄgↄ mɛ̀n baraakurii nàro ò kpàa. 
Zaa gↄrↄ birean àtɛn zɛ́ wɛtɛ à Yesu kpáḿma. 
Burodi Futɛnasari dikpɛ gↄrↄ káaku zĩ Yesu ìbanↄ sù ò a là ò pì: Mán ń ye ò gɛ́ kɛkɛnnɛ ǹ Vĩnla pↄ́ blenn? 
À wèḿma à pì: À gɛ́ wɛ̃tɛn gↄ̃gbɛ̃ ke kĩnaa à pinɛ, Dannɛri pì a gↄrↄ kà kãni. A bɛan áni Vĩnla pↄ́ blen kũ a ìbanↄ. 
Yesu ìbanↄ kɛ̀ lákũ à dàńnɛ nà, ò Vĩnla pↄ́bleyã kɛ̀kɛ. 
Kũ ↄkↄsi kɛ̀, Yesu gɛngɛsɛkɛna teburuui kũ a gbɛ̃nↄn kuri awɛɛpla pìnↄ. 
Gↄrↄ kũ òtɛn pↄ́ ble à pì: Yãpuran matɛn oárɛ, á gbɛ̃ mɛ̀n do ni ma kpáḿma. 
Ń nɛ̀sɛɛ yàka manamana, akũ òtɛni a la dodo: Asa makũmɛroo, Dikiri? 
Yesu wèḿma à pì: Gbɛ̃ kũ ótɛn ↄ kakara ta gũn lɛɛlɛ mɛ́ ani ma kpáḿma. 
Bisãsiri Nɛ́ ni kpágui lákũ à kɛ̃na a yã musu nà, ama waiyoo gbɛ̃ kũ ani Bisãsiri Nɛ́ kpáḿma pìi. Ani kɛ sã̀na adenɛ tó odi a i yãro. 
Akũ Yudasi kũ ani a kpáḿma pì pì: Asa makũmɛroo, Rabi? Yesu pìnɛ: Mↄkↄ̃mmɛ n ò gwe. 
Kũ òtɛn pↄ́ ble, Yesu burodii sɛ̀, à arubarikaa dàn, akũ à lìkↄ̃rɛ à kpà a ìbanↄa à pì: À sí à só, ma mɛ̀ɛn dí. 
Akũ à toko sɛ̀ dↄ à arubarikaa dàn, à kpàḿma à pì: À mi á pínki. 
Ma arun dí, Luda bàka kunna kũ gbɛ̃ dasinↄ aru ũ, kũ ani bↄtɛma ń durunnanↄ kɛ̃mmana yãi. 
Matɛn oárɛ, zaa gbãra mani geepi'i dí mi doro ari kpata kũ à bò ma De kĩnaa gɛ́ boo gupuraa, gbasa mà a dufu mi kãáo sà. 
Kũ ò lɛ̀ɛ sì, akũ ò bↄ̀tɛ ò gɛ̀ɛ Kùkpɛ sĩ̀sĩgɛrɛɛi. 
Akũ Yesu pìńnɛ: Á pínki áni fuma gwãaniala, zaakũ ò kɛ̃̀ Luda yãn ò pì: Mani sãdãri lɛ́, sãnↄ ni fãkↄ̃a. 
Ama ma vunaa gbɛra mani doárɛ arɛ gɛna Galili. 
Akũ Pita pìnɛ: Bee tó ò fùmma ń pínki, mani fumma zikiro. 
Akũ Yesu pìnɛ: Yãpuran matɛn onnɛ, gwãaniala ari ko gↄ̃ gɛ́ lɛ́ zu, ĩni ledi kpámai gɛ̃̀n aakↄ̃. 
Pita pìnɛ: Bee tó mani sù mà ga kũnwo, mani ledi kpányĩ zikiro. Akũ a ìbanↄ ò lɛ se ń pínki. 
Akũ Yesu kũ a ìbanↄ kà gu kũ òdi pi Gɛtɛsɛmani, akũ à pìńnɛ: À vutɛ la ari mà gɛ́ adua kɛ zã̀ dire. 
À Pita kũ Zebedi nɛ́ gbɛ̃nↄn planↄ sɛ̀ à gɛ̀ɛ kũńwo. A pↄ sira kũ̀ à nɛ̀sɛyↄkↄ sì. 
Akũ à pìńnɛ: Ma pↄ sira kũ̀ manamana ari ga lɛ́i. À zɛ la à itɛ̃ kɛ kũmao. 
Kũ à gɛ̀ɛ arɛ fíti, akũ à kùtɛ zĩtɛ à adua kɛ̀ à pì: Baa, tó ani sí kɛ, ǹ tó toko'i díkĩna gɛ̃tɛmala. Ama adi kɛ lákũ má yei nàro, séde lákũ ń yei nà. 
Akũ a ɛ̀ra à sù à a ìbanↄ lè, òtɛn i o. Akũ à pì Pitanɛ: Lɛn yá? Ádi fↄ̃ a itɛ̃ kɛ̀ kũmao bee awa doroo? 
À itɛ̃ kɛ àgↄ̃ adua kɛ de àsun fu yↄ̃ogwanaaaro yãi. Nini yei, ama mɛ̀ɛ busɛ. 
À kɛ̃̀ḿma a gɛ̃̀n plade, à adua kɛ̀ à pì: Baa, tó toko díkĩna ni gɛ̃tɛmala a í minaa sariro, ǹ tó n pↄyenyĩna kɛ. 
Kũ à ɛ̀ra à sù à ń lé, òtɛn i o dↄ, zaakũ òtɛn idekũ dɛdɛ. 
Akũ à ń tón dↄ, à gɛ̀ɛ à wɛ́ kɛ̀ a gɛ̃̀n aakↄ̃de, à yã dokↄ̃nↄ pìi ò dↄ. 
Akũ à ɛ̀ra à sù a ìbanↄ kĩnaa à pìńnɛ: Átɛn i o, átɛn kámma bo ari teran yá? À gwa! Gↄrↄ kà kãni. Ò Bisãsiri Nɛ́ kpà durunnakɛrinↄa. 
À futɛ ò tá. Gbɛ̃ kũ à ma nańnɛ ń ↄĩ tɛn su. 
Kũ à kpɛ́ àtɛn yã pì o, akũ Yudasi, a ìba gbɛ̃nↄn kuri awɛɛplanↄ doke sù kũ pario, ò fɛ̃nɛdanↄ kũna kũ gònↄ, ò bò sa'orikinↄ kũ Yuda gbɛ̃ zↄ̃kↄ̃nↄ kĩnaa. 
Bonkpɛde pì sↄ̃, à sèedaa òńnɛ à pì: Gbɛ̃ kũ mani lɛ́ pɛ́a, àkũmɛ gwe. À a kũ. 
Akũ à mìi dↄ̀ Yesua gↄ̃̀nↄ à pì: Fↄↄ, Rabi! Akũ à lɛ́ pɛ̀a. 
Yesu pìnɛ: Ma gbɛ̃, ǹ n kɛna kɛ! Akũ ò sù ò ↄ pɛ̀tɛ Yesua ò a kũ̀. 
Akũ Yesu gbɛ̃nↄ do a fɛ̃nɛda wòto, à sa'oriki zↄ̃kↄ̃ zĩ̀rii lɛ̀o à a sã gò. 
Akũ Yesu pìnɛ: Ǹ n fɛ̃nɛda sↄtↄ a plɛn. Zaakũ gbɛ̃ kũ à zɛ̀ kũ fɛ̃nɛdao, fɛ̃nɛda mɛ́ ani a dɛ. 
Tó má ye ma De malaika zĩ̀karinↄ gbarɛmɛnɛ gↄ̃̀nↄ de gã̀ kuri awɛɛplanↄla, ń dↄ̃ mani fua mà a wɛ́ kɛan yá? 
Tó ma kɛ̀ lɛ sↄ̃, deran yã kũ ò kɛ̃̀ Luda yãn ò pì ani kɛ lɛ ni kɛɛ? 
Akũ Yesu pì parinɛ: Kpãni wɛ́dewɛn ma ũ kũ a su à ma kũ kũ fɛ̃nɛdanↄ kũ gònↄo yá? Madìgↄ̃ vutɛ Luda ↄnn lákũ gu dìgↄ̃ dↄ nà madìgↄ̃ yã daárɛ, ádi ma kũro. 
Ama yã pìi kɛ̀ pínki, de yã kũ annabinↄ kɛ̃̀ Luda yãn kɛ yãi. Akũ a ìbanↄ bàa lɛ̀ ń pínki ò a tòn. 
Gbɛ̃ kũ ò Yesu kũ̀nↄ gɛ̀ɛ kãao sa'oriki zↄ̃kↄ̃ Kayafa bɛa. Ludayãdannɛrinↄ kũ gbɛ̃ zↄ̃kↄ̃nↄ kakarana gwe. 
Pita tɛ́ a kpɛ zã̀ dire ari sa'oriki zↄ̃kↄ̃ↄ pìi bɛa. À gɛ̃̀ ↄnn, à vùtɛ kũ dogarinↄ de à yã pìi mìdɛna e. 
Sa'orikinↄ kũ Yuda yãkpatɛkɛrinↄ ń pínki tɛn sèeda wɛtɛ Yesua ò a dɛ. 
Bee kũ gbɛ̃nↄ sù ò ɛ́kɛyãnↄ dìdia dasi, adi kɛro. Kpɛkpɛ gbɛ̃nↄn pla kenↄ sù 
ò pì: Gbɛ̃ pìi pì, áni fↄ̃ à Luda kpɛ́ wí, áni ɛra à bo gↄrↄ aakↄ̃ dagura sɛ́! 
Akũ sa'oriki zↄ̃kↄ̃ↄ fùtɛ à zɛ̀ à pì Yesunɛ: Ń yãke vĩ ǹ weḿmaroo? Yã kũ òtɛn didimma dí de deraa? 
Yesu yĩtɛ kpɛ̃n, akũ sa'oriki zↄ̃kↄ̃ↄ pìi pìnɛ: Ma nannɛ Luda Wɛ̃̀ndidei, ǹ owɛrɛ tó Luda Nɛ́ Arumasihumɛ n ũ. 
Yesu wèa à pì: Lɛn n ò lɛ. Makũ sↄ̃, matɛn oárɛ, zaa gbãra áni Bisãsiri Nɛ́ e vutɛna Gbãnasĩndapinkide ↄplai, akũsↄ̃ áni a suna e ludambɛ lukun. 
Akũ sa'oriki zↄ̃kↄ̃ↄ pì a utanↄ gà à kɛ̃̀ à pì: A dↄkɛ̀ kũ Ludao! À kɛ̀ dera ótɛn sèedade pãnde kenↄ wɛtɛ dↄↄ? A mà lákũ à dↄkɛ̀ kũ Ludao nà. 
Yã kpaten a zɛo teraa? Akũ ò wèa ò pì: A taari kà ò a dɛ. 
Akũ ò lɛ́'i sù a ãnnwa, ò a lɛ̀lɛ kũ okũo. Gbɛ̃kenↄ a sãn kɛ̀kɛ 
ò pì: Arumasihu, ǹ annabikɛyã o ǹ gbɛ̃ kũ à n lɛ owɛrɛ. 
Pita vutɛna ↄnn, akũ zↄ̀nↄkpare ke sù à pìnɛ: Mↄkↄ̃n sↄ̃ ndìgↄ̃ kú lɛɛlɛ kũ Galili gbɛ̃ Yesu pìiomɛ. 
Akũ à ledi kpà ń pínki wára à pì: Mádi yã kũ ntɛn o dↄ̀rↄ dↄ̃ro. 
Akũ à fùtɛ à gɛ̃̀ gãnun. Nↄgbɛ̃ pãnde a è, akũ à pì gbɛ̃ kũ ò kú gwenↄnɛ: Gbɛ̃ díkĩna lɛɛlɛ kũ Yesu Nazɛraomɛ. 
Pita ɛ̀ra à ledi kpà à la dà à pì: Má gbɛ̃ pì dↄ̃ro. 
Kũ à kɛ̀ saa fíti, gbɛ̃ kũ ò zɛna gwenↄ nà Pitai ò pì: Yãpuramɛ, ń gbɛ̃ domɛ n ũ, zaakũ ó n dↄ̃ n yã'onaaamɛ. 
Akũ à fùtɛ à a zĩda kà à la dà à pì: Má gbɛ̃ pì dↄ̃ro. Zaa gwe gↄ̃̀nↄn ko lɛ́ zù. 
Akũ yã kũ Yesu òo dↄ̀ Pitagu kũ à pì, ari ko gↄ̃ gɛ́ lɛ́ zu, ani ledi kpáai gɛ̃̀n aakↄ̃. Akũ Pita bò bàai à pↄsira ↄ́ↄ dↄ̀. 
