﻿LUKU.
21.
Kũ Yesu wɛ́ sɛ̀ musu, akũ à è ↄgↄdenↄ tɛni ń gbanↄ ká ↄgↄdaki gũn. 
Akũ à gyaanↄ takaside ke è gwe, à kↄbↄ pla dàn. 
Akũ à pì: Yãpuran matɛn oárɛ, gyaanↄ takaside pì ↄgↄ dàn de gbɛ̃ sĩnda pínkila. 
Zaakũ ń ↄgↄ dasi gũnn ò bòn ò kàn ń pínki. Nↄgbɛ̃ pì sↄ̃, a takasikɛ gũn pↄ́ kũ à vĩ à pↄ́ bleon à dàn pínki. 
Gbɛ̃kenↄ tɛn Luda ↄn yã o, ò pì ò a kpɛ́nↄ kɛ̀kɛ mana kũ gbɛ̀ mananↄ kũ pↄ́ kũ ò Luda gbànↄ, akũ Yesu pì: 
Gↄrↄke ni su, pↄ́ kũ a è dínↄ, bee gbɛ̀ ken oni tó dikↄ̃aro, oni gboro pínkimɛ. 
Akũ ò a là ò pì: Dannɛri, bↄrɛn yã dínↄ ni kɛɛ? Bↄ́ mɛ́ anigↄ̃ de a kɛgↄrↄ sèeda ũu? 
Akũ à wèḿma à pì: À laakari kɛ, àsun tó ò á sãtɛro, zaakũ oni su dasi kũ ma tↄ́o, onigↄ̃ pi Arumasihumɛ ń ũ, gↄrↄ pì sↄ̃ à kà kãni. Ásun tɛ́ńyĩro. 
Tó a zĩ̀nↄ baaruu mà ke futɛkↄ̃ina yãnↄ, àsun tó vĩna á kũro. Sé abirekũnↄ kɛ káaku gĩa, ama andunia ni láka gↄ̃̀nↄro. 
Akũ à pìńnɛ: Buri kũ burio ni futɛkↄ̃i, lɛmɛ dↄ bùsu kũ bùsuuo. 
Zĩtɛ yĩgãyĩgãna pãsĩnↄ kũ nàao kũ gagagyãnↄ nigↄ̃ kú gukenↄa. Àlesi bɛ̃̀nɛ vĩna yãnↄ ni bo ludambɛ. 
De yã pìnↄ kpɛ́ à su pínki oni á kũkũ ò wɛ́ tãáwa. Oni á na aduakɛkpɛdenↄnɛ ń ↄĩ, oni á ká kpɛ́siran, oni gɛ́ kãáo kínanↄ kũ bùsu gbɛ̃ zↄ̃kↄnↄ arɛ ma tↄ́ yãi, 
ánigↄ̃ deńnɛ ma sèedadenↄ ũ. 
À á laakari kpátɛ, àsun káaku yã kũ áni o damu kɛro, 
zaakũ makũ mɛ́ mani yã daárɛ á lɛ́n, mani á gba ↄ̃ndↄ̃, de á ibɛrɛ ke sún gí a yãi ke à á ɛ́kɛ boro. 
Bee á de kũ á dao kũ á vĩ̀ninↄ kũ á dakũnanↄ kũ á danɛnↄ kũ á gbɛ̃nnanↄ ni á kpáḿma, ò á gbɛ̃kenↄ dɛ. 
Gbɛ̃ sĩnda pínki ni zãágu ma yãi, 
ama bee á mìkã wɛ́n do ni zukũnaro. 
Zɛna gbãna gũn áni wɛ̃̀ndi le. 
Tó a è zĩ̀karinↄ lìka Yurusalɛmui, àgↄ̃ dↄ̃ kũ a kakatɛnaa zã̀ doro. 
Gbɛ̃ kũ ò kú Yudeanↄ bàa sí ò mì pɛ́ kpinↄa, gbɛ̃ kũ ò kú Yurusalɛmunↄ fãkↄ̃a. Lakutudenↄ sún gɛ̃ a gũnlo. 
Zaakũ gↄrↄ pì bi wɛ́tãmmagↄrↄmɛ, de yã kũ ò kɛ̃̀ Luda yãn papa pínki yãi. 
Waiyoo nↄ̀sindarenↄ kũ nɛ́randenↄ gↄrↄ birea, zaakũ bùsuu pì wari nigↄ̃ zↄ̃kↄ̃, Luda pↄfɛ̃ ni kipa gbɛ̃ pìnↄa. 
Oni ń gbɛ̃kenↄ dɛdɛ kũ fɛ̃nɛdao, oni ń gbɛ̃kenↄ kũkũ ò tá kũńwo bùsu sĩnda pínki gũn zĩ̀zↄnↄ ũ, buri pãndenↄ ni kìti pá Yurusalɛmua ari ń gↄrↄ papa. 
Sèedanↄ nigↄ̃ kú ifãntɛ̃a kũ mↄvuraao kũ susunɛnↄ, buri sĩnda pínki nigↄ̃ kú pↄsiran andunia gũn. Onigↄ̃ kú bídi gũn ísira kĩni kũ a zuzunaao yãi. 
Vĩnakɛna yã kũ àtɛni su anduniaaa yãi gídi ni tó gbɛ̃nↄ gbãsĩ lɛ́, zaakũ pↄ́ kũ ò kú ludambɛnↄ ni sãtɛ ń kúkia, 
gbasa wà Bisãsiri Nɛ́ suna e ludambɛ lukun kũ gbãnao kũ gakuri zↄ̃kↄ̃ↄo. 
Tó yã birenↄ nà kɛnaaa, à futɛ à zɛ, à á mì sɛ́ musu, zaakũ á surabana mɛ́ à kà kãni. 
Yesu yã lɛ̀kↄ̃ańnɛ à pì: À kaka lí gwa kũ lí kparanↄ. 
Tó a è ò lá bↄ̀tↄↄ kù, adì dↄ̃ á zĩda kũ guwãnagↄrↄ kà kãni. 
Lɛmɛ sↄ̃, tó a è yã pìnↄ tɛn kɛ lɛ, àgↄ̃ dↄ̃ kũ kína kũ à bò Luda kĩnaa sunaa kà kãni. 
Yãpuran matɛn oárɛ, gↄrↄ dí gbɛ̃nↄ ni gɛ̃tɛro ari yã pìnↄ gɛ́ kɛo pínki. 
Musu kũ zĩtɛo ni gɛ̃tɛ, ama ma yãnↄn gɛ̃tɛna vĩro. 
À laakari kɛ. Ásun tó pãpãkɛna kũ wɛ̃dɛkɛnaao kũ wɛ̃̀ndi damukɛnaao á laakari síáwaro, de a sugↄrↄ sún á kũ kãnto lán tankutɛ bàro yãi. 
Zaakũ ani kútɛ gbɛ̃ kũ ò kú andunia gũnnↄa gu sĩnda pínki. 
À itɛ̃ kɛ, àgↄ̃ adua kɛ baala'i, de à fↄ̃ à piti yã kũ àtɛn sua pínki à zɛ Bisãsiri Nɛ́ arɛ. 
Lákũ gu dìgↄ̃ dↄ nà Yesu dìgↄ̃ yã dańnɛ Luda ↄnn. Tó ↄkↄsi kɛ̀, àdi bo à gɛ́ i Kùkpɛ sĩ̀sĩgɛrɛɛi. 
Kↄnkↄkↄnkↄ gbɛ̃ sĩnda pínki dì futɛ à gɛ́ a yã ma Luda ↄnn. 
