﻿ROMUDENƆ.
3.
Karana kpaten dena Yuda ũ vĩi? Àre kpaten tↄ̃̀zↄ̃na vĩi? 
À karana vĩ zↄ̃kↄ̃ yã sĩnda pínki gũn. Káaku gĩa Luda a yã nàńnɛ ń ↄĩmɛ. 
Kũ ń gbɛ̃kenↄ náani vĩro, bↄ́n abirekũ vĩi? Ń kunna náani sari ni Luda náani gboro yá? 
Oi! Lɛnlo! À tó Luda gↄ̃ yãpura vĩ, bee kũ gbɛ̃ sĩnda pínki bi ɛ́kɛdemɛ, lákũ ò kɛ̃̀ Luda yãn nà ò pì: Tó n yã ò, n yã nigↄ̃ zɛ́ vĩ, tó n yãkpatɛ kɛ̀ kũńwo, n yã ni ble. 
Tó ó vãnikɛ dì Luda manakɛ bo gupuraa, bↄ́ yãn óni oo? Óni pi Luda vãni kũ àdi pↄfɛ̃ kipawá yãin yá? Matɛn o lán bisãsiri onaa bàmɛ. 
Oi! Lɛnlo! Tó Luda yãzɛ vĩro, à kɛ̀ dera ani fↄ̃ à yãkpatɛ kɛ kũ anduniaoo? 
Gbɛ̃ke ni pi, tó a ɛ́kɛkɛ tɛn Luda náani kara, akũsↄ̃ àtɛni a tↄ́ bo, bↄ́yãi ani yã daala lán durunnakɛrii bàa? 
Tó n ò lɛ ntɛni pi ò yã vãni kɛ, yã mana ni bon. Gbɛ̃kenↄ ma tↄ́ vãni sì ò pì lɛn madì o lɛ. Luda yãdanlana kↄ̃ sì kũńwo. 
Tↄ̀! Ókↄ̃nↄ Yudanↄ ó sã̀nan yá? Lɛnlo fá! Zaakũ ma Yudanↄ kũ buri pãndenↄ bòbo ń dàn ń pínki kↄ̀, ń pínki bi durunna zↄ̀nↄmɛ. 
Ò kɛ̃̀ Luda yãn ò pì: Gbɛ̃ke manaro, bee mɛ̀n do. 
Laakaride ke kunlo, Luda ki wɛtɛri ke kunlo. 
Ò sã̀sã ń pínki ò gↄ̃̀ dↄ̀rↄↄ sari, yãmanakɛri ke kunlo, bee mɛ̀n do. 
Ń kòto de lán mira wɛ̃naa bàmɛ. Òdi lɛ́nna kɛńnɛ, ń lɛ́gbɛ bi pitiko sɛwɛmɛ, 
yã ĩni kũ gbɛ̃kanaao ń lɛ́ pà. 
Ò wãna kũ gbɛ̃dɛnaao, 
òdi suńyĩ kũ kisirao kũ wɛ́tãmmao, 
ò aafia zɛ́ dↄ̃ro, 
ń wɛ́ dìgↄ̃ Luda wé'i vĩro. 
Ó dↄ̃ kũ Luda doka pínki de gbɛ̃ kũ ò na doka pì ↄĩnↄ pↄ́ ũmɛ, de gbɛ̃ sĩnda pínki lɛ́ gↄ̃ nakↄ̃ana, andunia gbɛ̃ sĩnda pínki gↄ̃ taaride ũ Luda kĩnaa. 
Zaakũ gbɛ̃ke ni bo mana Luda kĩnaa doka pì kũna yãiro. Luda doka mɛ́ àdi tó ò durunna dↄ̃. 
Deran Luda dì tó yã bo kũńwo nna nà bò gupuraa sà, lákũ a yã kɛ̃na Musa doka kũ annabinↄ takadanↄ gũn nà. Adi kɛ a doka kũna yãnlo. 
Luda dì tó yã bo kũńwo nna Yesu Kirisi náanikɛna yãimɛ. Gbɛ̃ kũ àtɛni a náani kɛ sĩnda pínki pↄ́mɛ. Gbɛ̃ke bona adoro, 
zaakũ baadi durunna kɛ̀, ò kĩ̀a Luda gakurii. 
Luda dì tó yã bo kũńwo nna gba ũ a gbɛ̃kɛ yãi kũ Kirisi Yesu kũ à ń bó gbãnao. 
Àkũmɛ Luda kpà durunna kútɛkɛbↄ ũ gbɛ̃ kũ òtɛni a aru náani kɛnↄnɛ, de à mↄ́ baadi pínkinɛ kũ adì yã kɛ a zɛ́aamɛ. À mɛna yã, adi durunna zĩnↄ yã daro, 
akũ à mↄ̀ńnɛ tera kũ adì yã kɛ a zɛ́a. Deran Luda dì yã kɛ a zɛ́a nàn gwe, akũsↄ̃ àdi tó yã bo kũ Yesu náanikɛrinↄo nna. 
Bisãsirinↄ ni fↄ̃ ò ĩa dã dↄ yá? Abirekũ ni sí kɛro. Bↄ́yãii? Zaakũ à de zĩkɛna dokaa yã ũro, Yesu naanikɛna yãmɛ. 
Zaakũ ma è yã dì bo kũ gbɛ̃o nna Yesu náanikɛna yãimɛ, zĩkɛna dokaa baasi. 
Luda bi Yudanↄ Ludamɛ ńtɛ̃nɛ yá? Buri pãndenↄ Ludan seroo? Ee, buri pãndenↄ Ludamɛ dↄ. 
Zaakũ Luda mɛ̀n domɛ. Ani tó yã bo kũ gbɛ̃ kũ à tↄ̃̀ↄ zↄ̃̀ↄo nna a náani kũ àtɛn kɛ yãimɛ, akũsↄ̃ ani tó yã bo kũ gyↄfↄrↄdeo nna a náani dokↄ̃nↄ pìi musu. 
Ótɛn doka da pↄ́ke ũro ludanaanikɛna yãin yá? Lɛnlo, ótɛn gbãna kpáaamɛ. 
