﻿ROMUDENƆ.
7.
Ma gbɛ̃nↄ, matɛn yã oárɛ lán gbɛ̃ kũ ò Musa doka dↄ̃nↄ bà. Á dↄ̃ kũ doka iko vĩ gbɛ̃a gↄrↄ kũ à kun kũ wɛ̃̀ndiionloo? 
Lɛn doka pì nↄzãre yĩ̀ a zãnɛ lɛ gↄrↄ kũ à kun kũ wɛ̃̀ndiio. Tó a zã gà, akũ doka pìi dì poroa. 
Gↄrↄ kũ a zã kun, tó à gↄ̃̀ gↄ̃ pãnde pↄ́ ũ, oni pinɛ zinakɛriimɛ. Tó a zã gàmɛ sↄ̃, doka pìi pòroaan gwe. Tó à gↄ̃̀ gↄ̃ pãnde pↄ́ ũ sà, abirekũ bi zina yãmɛ doro. 
Lɛn ákↄ̃nↄ se ma gbɛ̃nↄ, a ga doka musu Kirisi mɛ̀ɛ gãi, akũ a gↄ̃ gbɛ̃ kũ à vù gan pì pↄ́ ũ, de ò le ò karana le Luda pↄ́ ũ. 
Kũ ó dàa dòwɛrɛ arɛ yã, doka mɛ́ à tò durunna ni ó kũ ó mɛ̀ɛ gũn, akũ o karana lè ga pↄ́ ũ. 
Tera sà o ga pↄ́ kũ à ó kũ zↄ̀ ũ pì yã musu, o bo dokan, akũ ótɛn do Ludai a Nini zɛ́ dufu gũn, adi kɛ doka takada zɛ́ zĩ gũnlo. 
Óni pi deramɛɛ? Luda doka bi durunnan yá? Lɛnlo fá! Doka pì mɛ́ à tò ma durunna dↄ̃̀. Tó doka dí pì òsun pↄ́ ni dɛroro, de má dↄ̃ deran pↄ́nidɛna dìgↄ̃ de nàro. 
Durunna zɛki lè Luda yãditɛnaa pìia, akũ à tò pↄ́ sĩnda pínki ni ma kũ. Zaakũ má doka dↄ̃ro, durunna demɛnɛ yãke ũro. 
Má kun yã doka sari, ama kũ ma yãditɛnaa pìi mà, durunna vù in, 
akũ ma ga. Yãditɛna kũ à de à wɛ̃̀ndi kpáma pìi sùmɛnɛ kũ gao. 
Durunna zɛki lè yãditɛnaa pìia, akũ à kɛ̀kɛ à ma dɛ yã pìi gãi. 
Lɛmɛ doka pì kunna adona, akũsↄ̃ Luda yãditɛnaa pì kunna adona, à zɛ́ vĩ akũsↄ̃ à mana. 
Yã mana mɛ́ à tò ma ga yá? Lɛnlo fá! De durunna le à bo gupuraa, à ga ìmɛnɛ yã mana gãi, de ò durunna dↄ̃ durunna ũ yãditɛnaa pìi gãi. 
Ó dↄ̃ kũ doka pì bò Luda kĩnaamɛ. Makũ sↄ̃, dàden ma ũ, má na durunna ↄĩ. 
Madìgↄ̃ yã kũ matɛn kɛ gbá dↄ̃ro, zaakũ madì yã kũ má ye mà kɛ kɛro, yã kũ má ye mà kɛron madì kɛ. 
Tó yã kũ ma kɛ̀ dí kↄ̃ sí kũ ma pↄyeinaaoro, ma we kũ doka pì mana. 
Adi kɛ makũ mɛ́ matɛn kɛro, durunna kũ à kú ma gũmmɛ. 
Má dↄ̃ kũ yã mana kú ma gũnlo, ma dà manaro. Madìgↄ̃ ye mà yã mana kɛ, ama madì fↄ̃ mà kɛro. 
Yã mana kũ má ye mà kɛ, madì kɛro. Yã vãni kũ má yeiron madì kɛ. 
Tó yã kũ má yeiron matɛn kɛ, adi kɛ makũ mɛ́ matɛn kɛro, durunna kũ à kú ma gũmmɛ. 
Ma è tó má ye mà a mana kɛ, a vãni mɛ́ àdi domɛnɛ arɛ. 
Luda doka mɛ́ àdi kɛmɛnɛ nna ma swɛ̃̀ɛ gũn, 
ama ma è iko pãnden kú ma mɛ̀ɛ gũn, àdigↄ̃ zĩ̀ ká kũ iko kũ à kú ma laasun gũnwo, akũ má na durunna iko kũ à kú ma mɛ̀ɛ gũn pì ↄĩ. 
Makũ wɛ̃ndade ina, dí mɛ́ ani ma sí ma mɛ̀ kũ à ma kpa gai dí ↄĩi? 
Ma sáabu kɛ̀ kũ Ludao! Kũ ó Dikiri Yesu Kirisi gbãnao. Lɛn má de zↄ̀ ũ Luda dokanɛ ma laasun gũn lɛ, akũsↄ̃ má de zↄ̀ ũ durunna ikoonɛ ma dàa gũn. 
