﻿ROMUDENƆ.
8.
Yãkpatɛ ni gbɛ̃ kũ ò kú Kirisi Yesu gũnnↄ ble doro, 
zaakũ kunna Kirisi Yesu gũn Luda Nini kũ àdi wɛ̃̀ndi kpáḿma gbãna ma bo durunna kũ gao ikon. 
Yã kũ Musa doka dí fↄ̃ à kɛ̀ro bisãsiri gbãnasarikɛ yãi, Luda kɛ̀. À a zĩda Nɛ́ zĩ̀ bisãsiri ũ lán ókↄ̃nↄ durunnadenↄ bà durunna kɛ̃ḿmana yãi, akũ à wé'i dà durunnaa a Nɛ́ mɛ̀ɛ pìi gãi, 
de yã kũ doka tɛn wɛtɛ yãpura kɛwá, ókↄ̃nↄ kũ ó dàa dì dowɛrɛ arɛ doro, sé Luda Nini. 
Gbɛ̃ kũ ń dàa dì dońnɛ arɛnↄ dì laakari dↄ ń dà yãa, gbɛ̃ kũ Luda Nini dì dońnɛ arɛnↄ dì laakari dↄ Luda Nini yãa. 
Dà donnɛna arɛ bi gamɛ. Luda Nini donnɛna arɛ bi wɛ̃̀ndi kũ aafiaaomɛ. 
Dà donnɛna arɛ bi ibɛrɛsɛna kũ Ludaoomɛ. Ade dì mì natɛ Luda dokanɛro, ani fↄ̃ sero. 
Gbɛ̃ kũ ń dàa dì dońnɛ arɛnↄ yã dì ká Ludaguro. 
Ákↄ̃nↄ sↄ̃, á dàa dì doárɛ arɛro, sé Luda Nini, tó à kú á gũn yãpura. Tó gbɛ̃ Kirisi Nini vĩ sↄ̃ro, à kun Kirisi pↄ́ ũro. 
Tó Kirisi kú á gũn, bee tó á mɛ̀ de gɛ̀ ũ durunna yãi, á nini kummɛ, kũ Luda tò yã bò kãáo nna yãi. 
Tó Luda kũ à Yesu bò gan Nini kú á gũn, Luda kũ à Kirisi pìi vù gan ni wɛ̃̀ndi kpá á mɛ̀ kũ à gàa pìia a Nini kũ à kú á gũn gãi. 
A yã mɛ́ à tò ma gbɛ̃nↄ, tɛna ó dàai bi tilasinlo, pↄyeinaamɛ. 
Tó á tɛ́ á dàai, áni gamɛ. Tó a á yã vãni kɛnanↄ mìi dɛ̀ kũ Luda Nini gbãnao sↄ̃, ánigↄ̃ kun. 
Gbɛ̃ kũ Luda Nini dì dońnɛ arɛnↄ mɛ́ ò Luda nɛ́nↄ ũ. 
Zaakũ nini kũ àdi tó ò zↄ̀ ble kũ vĩ̀naaoon a lèro, Luda Nini kũ à tò a gↄ̃ Luda nɛ́nↄ ũn á vĩ, akũ odì ↄ́ↄ dↄ Ludanɛ kũ a gbãnao ò pi: Baa, ó De. 
Nini pìi dì o ó nininɛ kũ Luda nɛ́nↄn ó ũ. 
Lákũ a nɛ́nↄn ó ũ nà, a túbiblerinↄn ó ũ. Luda túbiblerinↄn ó ũ, óni ble lɛɛlɛ kũ Kirisiomɛ. Tó o wari kɛ̀ kãao, ónigↄ̃ kú kãao a gakuri gũn. 
Ma è óni fↄ̃ ò gↄrↄ díkĩna wari lɛkↄ̃a kũ gakuri kũ Luda ni boowɛrɛ gupuraaro. 
Luda pↄ́kɛnanↄ sĩnda pínki wɛ́ dↄ a nɛ́nↄ bona gupuraai lakanaa sari. 
Zaakũ Luda tò a pↄ́kɛnanↄ gɛ̃̀ pãpãkɛnaa gũn pínki Adi kɛ ń pↄyeinaanlo, Luda mɛ́ à kɛ̀ lɛ, de ń wɛ́dↄinaa gũn 
andunia bo yakana kũ àtɛn zↄ̀ blenɛɛ gũn, gbasa àgↄ̃ a zĩda vĩ Luda nɛ́nↄ gakuri gũn. 
Ó dↄ̃ kũ Luda pↄ́kɛnanↄ sĩnda pínki tɛn nda kũ wãwão lán nɛ́'ipↄ bà ari tera. 
Adi kɛ abiremɛ adoro, ókↄ̃nↄ kũ ó Luda Nini vĩ zɛnkpɛkɛ ũnↄ, ótɛn nda kpãni se ari Luda gↄ̃ gɛ́ ó mɛ̀ litɛ à ó sí a nɛ́nↄ ũ. 
Luda ó sura bà de ò wɛ́ dↄ abirekũi. Pↄ́ kũ ò è kũ wɛ́o bi wɛ́dↄina yãn doro. Dí mɛ́ àdi wɛ́ dↄ pↄ́ kũ à gĩnakɛ à lèe? 
Tó ó wɛ́ dↄ pↄ́ kũ ódi leroi sↄ̃, odìgↄ̃ a dã kũ mɛnaomɛ. 
Lɛmɛ sↄ̃ Luda Nini dì kpáwái ó gbãnasarikɛ gũn, zaakũ ó aduakɛna dↄ̃ a zɛ́aro, akũ Luda Nini dì kútɛ kɛwɛrɛ Ludanɛ kũ ndana kũ a yã gɛ̃̀ onalao. 
Luda dì nɛ̀sɛ gũn e, akũsↄ̃ à a Nini laasun dↄ̃, zaakũ Luda Nini dì kútɛ kɛ Luda gbɛ̃nↄnɛ lákũ Luda yei nàmɛ. 
Ó dↄ̃ kũ yã sĩnda pínki dì bo mana gbɛ̃ kũ ò ye Ludainↄnɛ, gbɛ̃ kũ à ń sísi à ń sɛ́ lákũ àtɛn wɛtɛ nànↄ. 
Zaakũ Luda dìtɛ zaa káaku kũ gbɛ̃ kũ à gĩnakɛ à ń dↄ̃nↄ bokↄ̃a kũ a Nɛ́o, de àgↄ̃ de daudu ũ dakũna dasinↄ tɛ́. 
Gbɛ̃ kũ à ń dítɛ zaa káaku pìnↄn à ń sísi, akũ à tò yã bò kũ gbɛ̃ kũ à ń sísi pìnↄo nna, akũ à tò gbɛ̃ kũ yã bò kũńwo nna pìnↄ gↄ̃ gakuri vĩ. 
Óni o deramɛ yã birenↄ musuu? Lákũ Luda zɛ̀ kũoo nà, dí mɛ́ ani fↄ̃ à kpáwɛrɛɛ? 
Lákũ adi gí kũ a zĩda Nɛ́oro nà à a kpà ó pínki yãi, ani gí pↄ́ sĩnda pínki naawɛrɛ gba ũ sↄ̃i yá? 
Dí mɛ́ ani gbɛ̃ kũ Luda ń sɛ́nↄ káara kɛɛ? Luda mɛ́ àdi tò yã bò kũńwo nna. 
Dí mɛ́ ani yã daólaa? Kirisi Yesu gà, kũ à de abirekũla à ɛ̀ra à fùtɛ, à kú Luda ↄplai, àtɛn kútɛ kɛnɛwɛrɛ. 
Bↄ́ mɛ́ ani ó kɛ̃kↄ̃a kũ Kirisi yenyĩoo? Wari ke mɛ̀'ũmmana ke wɛ́tãmmana ke nà ke takasi ke kari ke fɛ̃nɛda, ń ke ni fↄ̃ yá? 
À kɛ̃na Luda yãn ò pì: N yãi ó kú ga lɛ́i zaa kↄnkↄ ari ↄkↄsi, òdi ó ditɛ lán sã kũ oni ń kùtu kpánↄ bà. 
Yã birenↄ gũn pínki ó de zĩ̀blerila kũ gbɛ̃ kũ à yewái gbãnao. 
Zaakũ má dↄ̃ sãnsãn kũ ga ke wɛ̃̀ndi ke malaikanↄ ke tãnanↄ ke tera yã ke zia yã ke gbãnadenↄ 
ke musu pↄ́nↄ ke zĩtɛ pↄ́nↄ ke Luda pↄ́kɛna pãndenↄ, ń ke ni fↄ̃ à ó kɛ̃kↄ̃a kũ yenyĩ kũ Luda vĩ kũoooro kunna ó Dikiri Kirisi Yesu gũn. 
