﻿FILIPIDENƆ.
4.
Abire yãi ma gbɛ̃ yenyĩde kũ matɛni á bɛgɛ kɛnↄ, ákↄ̃nↄ kũ á de ma ĩadãbↄ kũ madì pↄnna kɛo ũnↄ, àgↄ̃ zɛna gíngin Dikiri gũn lɛ, ma gbɛ̃nↄ. 
Ma kútɛ kɛ̀ Yuodianɛ kũ Sintisio ògↄ̃ lɛ́dokↄ̃nↄ vĩ Dikiri gũn. 
Mↄkↄ̃n sↄ̃ ma gbɛ̃ndo náanide, ma wɛ́ kɛ̀mma, ǹ kpá nↄgbɛ̃ pìnↄi, zaakũ ò ↄsi kà kũmao baaru nna kpanaa gũn kũ Kɛlɛmɛntio kũ ma zĩkɛri dakenↄ. Ń tↄ́ kú wɛ̃̀ndi takadan. 
Àgↄ̃ pↄnna kɛ Dikiri gũn gↄrↄ sĩnda pínki. Ma òárɛ dↄ, à pↄnna kɛ. 
À á zĩda busa gbɛ̃ sĩnda pínkinɛ. Dikiri sunaa kà kãni. 
Àsun yãke damu kɛro. Yã sĩnda pínki gũn à adua kɛ, à yã gbɛka Ludaa kũ sáabukɛnaao, à á yã'ũmmananↄ onɛ, 
ani á nɛ̀sɛ kũ á laakariio kpátɛárɛ Kirisi Yesu gũn. Nɛ̀sɛkpatɛnaa pìi zↄ̃kↄ̃, à de bisãsiri dↄ̃na la. 
Ma gbɛ̃nↄ, yã kũ à gↄ̃̀árɛn dí: Yã kũ à yãpura vĩ akũsↄ̃ à bɛ̀ɛrɛ vĩ, yã kũ à zɛ́ vĩ akũsↄ̃ à gbãsĩ vĩro, yã kũ à nna akũsↄ̃ à arubarika vĩ, yã kũ à mana akũsↄ̃ òdi a sáabu kpá, àgↄ̃ laasun lɛ́ yã birenↄ musu. 
Yã kũ ma dàárɛ a sì, yã kũ a mà ma lɛ́i akũsↄ̃ a èma, à yã birenↄ kɛ, Luda aafiade nigↄ̃ kú kãáo. 
Ma pↄ nna à kɛ̀ zↄ̃kↄ̃ Dikiri gũn, zaakũ á laasun ɛ̀ra à sùma sà. Á ma yã kũna yã fá, zɛ́n ádi lero. 
Mádi o lɛ kũ matɛn takasi kɛ yãinlo, zaakũ ma dà ma zĩdanɛ màgↄ̃ sáabu vĩ gwena sĩnda pínki gũn. 
Má takasikɛna dↄ̃ akũsↄ̃ má nnamana dↄ̃. Gↄrↄ sĩnda pínki gu sĩnda pínkia kãna ke nàa, pↄ́dinyĩ ke pↄ́kĩammana yãke vĩmɛnɛ doro. 
Mani pↄ́ sĩnda pínki fↄ̃ Kirisi kũ àdi ma gba gbãna yãi. 
Bee kũ abireo kũ á bàka kú kũ ma takasikɛnaao, a yã mana kɛ̀. 
Filipidenↄ, á dↄ̃ kũ á zĩdao, ma baaru nna kpanaárɛ káaku gũn, kũ ma bo Masedonia bùsun, sↄsi ke kun kũ à kpàmai kũ ↄgↄ yã bↄkↄtɛnaaoro, sé ákↄ̃nↄ. 
Bee gↄrↄ kũ má kú Tɛsalonika, a pↄ́ kũ matɛni a ni dɛnↄ kpã̀zãmɛnɛ de gɛ̃̀n dola. 
Adi kɛ gban matɛn wɛtɛro, á àre karana Luda kĩnaan matɛn wɛtɛ. 
Ma pↄ́ kũ a kpã̀zãmɛnɛ lè, à pàpa ari à dìrɛ. Ɛpafarↄditu á gbanↄ kpàma, pↄ́ mↄ̀ma sà. À de sa'obↄ kũ a gbĩ nna Ludanɛ akũsↄ̃ àdi káagu à sí ũ. 
Ma Luda ni pↄ́ kũ á a ni vĩnↄ kpááwa Kirisi Yesu gũn a aruzɛkɛ gakuride lɛ́n. 
Ògↄ̃ ó Luda ó De tↄ́ bo gↄrↄ sĩnda pínki! Aami. 
À fↄ kpá Luda gbɛ̃nↄa ń pínki kunna Kirisi Yesu gũn. Ma gbɛ̃ kũ ó kú lɛɛlɛnↄ fↄ kpàáwa. 
Luda gbɛ̃nↄ fↄ kpàáwa ń pínki, atɛ̃nsa gbɛ̃ kũ ò kú Siza bɛanↄ. 
Dikiri Yesu Kirisi gbɛ̃kɛ kɛárɛ á ninin. 
