﻿KƆLƆSEDENƆ.
1.
Makũ Pↄlu, Kirisi Yesu zĩ̀rii Luda pↄyenyĩnaa gũn kũ ó gbɛ̃ Timↄtio, ókↄ̃nↄ mɛ́ o takada dí kɛ̃̀ 
ó gbɛ̃ náanide kũ ò kú adona Kirisi gũn zaa Kↄlↄsenↄnɛ. Luda ó De gbɛ̃kɛ kɛárɛ, à á gba aafiaa. 
Gↄrↄ sĩnda pínki tó ótɛn adua kɛárɛ, odìgↄ̃ Luda ó Dikiri Yesu Kirisi De sáabu kpámɛ, 
zaakũ o á Kirisi Yesu náanikɛna baaruu mà kũ yenyĩ kũ á vĩ ó gbɛ̃nↄnɛɛo ń pínki, 
kũ á wɛ́ dↄ pↄ́ kũ à ditɛnaárɛ ludambɛi yãi. A yãpura yã mà zaa káaku baaru nna kũ o kpàárɛ gũn. 
Baaru nna pì tɛn nɛ́ i àtɛn dagula andunia gũn pínki, lákũ à kɛ̀ á tɛ́ nà zaa gↄrↄ kũ a mà, akũ a Luda gbɛ̃kɛ súsu dↄ̃̀. 
Ó gbɛ̃ yenyĩde ó zĩkɛri dake Ɛpafara mɛ́ à yã pìi dàárɛ ó gɛ̃nɛ ũ. Kirisi zĩkɛri náanidemɛ, 
àkũ mɛ́ à yenyĩ kũ Luda Nini á káa òwɛrɛ. 
Abire yãi zaa gↄrↄ kũ o á baaruu mà, odìgↄ̃ wɛ́ kɛárɛ Ludaa lakanaa sari, de à tó à a pↄyenyĩna dↄ̃ swáswa, a Nini á gba ↄ̃ndↄ̃ kũ wɛ́zɛ̃o pínki, 
de àgↄ̃ kun lákũ Dikiri yei nà, á yã sĩnda pínki káagu, de á yã mana sĩnda pínki kɛna gↄ̃ dagula, á Luda dↄ̃na gↄ̃ kara, 
de àgↄ̃ gbãna yã sĩnda pínki gũn a gbãna gakuride lɛ́n, de à pↄ́ sĩnda pínki fↄ̃ kũ mɛnao kũ pↄnnao, 
de àgↄ̃ De Luda sáabu kpá, zaakũ à ó ká baka kũ à dìtɛ a gbɛ̃nↄnɛ gupuranwa. 
À ó bó gusira ikon, à ó ká a Nɛ́ mɛ̀n do yenyĩde kpatan. 
A gãin o gↄ̃ zĩdadenↄ ũ, ó durunna kɛ̃̀wá. 
Kirisi bi Luda kũ òdi e kũ wɛ́oro takamɛ, Àkũmɛ daudu ũ Luda pↄ́kɛnanↄ tɛ́ pínki. 
Luda pↄ́ kũ à kú musu kũ zĩtɛoo kɛ̀ pínki a gãi, pↄ́ kũ òdi enↄ kũ pↄ́ kũ òdi eronↄ, kpatablerinↄn yá ke dikirinↄ ke gbãnadenↄ ke ikodenↄ. Pↄ́ sĩnda pínki bò a kĩnaamɛ, akũsↄ̃ ò kun a pↄ́ ũ. 
À kun pↄ́ sĩnda pínki ã, pↄ́ sĩnda pínki kun a gãimɛ. 
Àkũmɛ sↄsi gbɛ̃ kũ ò de a mɛ̀ ũnↄ mì ũ. Àkũmɛ naana ũ, gàavu káaku ũ, de à gↄ̃ pↄ́ sĩnda pínki mìde ũ. 
Zaakũ à kà Ludagu a kíkɛ pínki pɛkɛrɛa. 
À tò pↄ́ sĩnda pínki kɛ̀ kãao nna a gãi, pↄ́ kũ ò kú zĩtɛ ke musunↄn yá. A aru kũ à kↄ̀tɛ lía mɛ́ à sù kũ kɛna nna pìio. 
A kɛ̃ Ludaa yã. A ibɛrɛnↄn á ũ á laasun kũ á vãnikɛnanↄ yãi, 
akũ Luda tò a kɛ kãao nna Kirisi gana a bisãsirikɛmɛɛ gũn yãi sà, de à á kpan'arɛ kɛ gbãsĩ sari, mamberu sari, taari sari, 
tó á zɛna gbãna á ludanaanikɛnaa gũn yĩgãnaa sari gíngin, tó ádi kɛ̃kↄ̃a kũ tãmaa kũ á vĩ baaru nna kũ a màa gũnworo. Ò baaru nna pìi kpà gbɛ̃ kũ Luda kɛ̀ zĩtɛ lanↄnɛ pínki kũ makũ Pↄlu, ma gↄ̃ a kpàri ũ. 
Tera sà matɛn pↄnna kɛ kũ wari kũ matɛn kɛ á yãiio. Wari kũ Kirisi kɛ̀ sↄsi gbɛ̃ kũ ò de a mɛ̀ ũnↄ yãin matɛn pↄ́ kũ à gↄ̃̀ papa ma mɛ̀ɛ gũn. 
Luda zĩ dàmɛnɛ, akũ ma gↄ̃ sↄsi gbɛ̃ pìnↄ kpanyĩri ũ. À ma zĩ mà a yã oárɛ papana. 
Asiriyã kũ à utɛna gbɛ̃nↄnɛ zaa káaku zaade Luda dí andunia kátɛro mɛ́ à bò Luda gbɛ̃nↄnɛ gupuraa sà, 
Luda ye ò dↄ̃ lákũ asiriyã pì gakuri zↄ̃kↄ̃ nà buri pãndenↄ kĩnaa. Asiri pìn dí: Kirisi kú á gũn, akũ á wɛ́ dↄ gakuria. 
A waazin odì kɛ gbɛ̃ sĩnda pínkinɛ, odì lɛ́ daoḿma, odì yã dao gbɛ̃ sĩnda pínkinɛ kũ ↄ̃ndↄ̃ sĩnda pínkio, de ò gɛ́ kũ baadio papana Luda arɛ Kirisi gũn. 
Abire yãi matɛn zĩ kɛ, matɛn kokari kɛ kũ a gbãna kũ àtɛn zĩ kɛ ma gũnwo gbãnagbãna. 
