﻿1 TƐSALONIKADENƆ.
2.
Ma gbɛ̃nↄ, á dↄ̃ kũ á zĩdao, kũ ó zɛ́ lena á kĩnaa dí kɛ pãro. 
Á dↄ̃ lákũ ò wɛ́ tã̀wá nà, o wari kɛ̀ káaku zaa Filipi, akũ Luda ó gbá swɛ̃̀ɛ, o a baaru nna kpàárɛ kokari kũ kokario. 
Ó nakaranaáwa de ɛ́kɛ zɛ́ yã ũro. Ódi kɛ laasun vãni ke á takikɛna yãinlo. 
Lákũ Luda ó ká a baaru nna kpanaaa nà, lɛn odì kpáńnɛ lɛ, adi kɛ bisãsiri pↄyeinan ótɛn wɛtɛro, sé Luda ó laasun tàasikɛri pↄ́. 
Á dↄ̃ kũ ódi yã nnanna o gbɛ̃kenɛro, akũsↄ̃ ódi yãke kɛ kũ manafikio wãkũ yãiro. Ludan ó sèedade ũ. 
Ódi sáabu wɛtɛ bisãsiri kĩnaaro, ákↄ̃nↄ ke gbɛ̃ pãndenↄ. 
Bee kũ ó a zɛ́ vĩ ò gↄ̃árɛ aso ũ ó Kirisi zĩ̀rikɛna yãi, o kɛ̀ kãáo busɛbusɛ, lákũ nↄgbɛ̃ nɛ́rande dì laakari dↄ a nɛ́a nà. 
Kũ ó yeái manamana yãi, ódi zɛo ò baaru nna kũ à bò Luda kĩnaa kpáárɛ adoro, kũ ó zĩda kpááwanaaomɛ dↄ, zaakũ a gↄ̃ ó gbɛ̃ yenyĩdenↄ ũ. 
Ma gbɛ̃nↄ, à tó ó zĩkɛna kũ wario yã dↄágu. Gↄrↄ kũ ótɛn baaru nna kũ à bò Luda kĩnaa pì kpáárɛ, odìgↄ̃ zĩ kɛ fãnantɛ̃ kũ gwãanio, de òsun gↄ̃ á gbɛ̃kenɛ aso ũro yãi. 
Ákↄ̃nↄmɛ ó sèedadenↄ ũ, kũ Ludao dↄ, kũ ó kú ákↄ̃nↄ kũ a Yesu náani kɛ̀nↄ tɛ́ a zɛ́a nɛ̀sɛpuradenↄ ũ taari sari. 
Á dↄ̃ kũ o yã kɛ̀ á baadinɛ lákũ de dì kɛ a nɛ́nↄnɛ nà. 
O lɛ́ dàáwa, o á nɛ̀sɛɛ kpàtɛárɛ, o nakaraáwa, de á kunna kɛ lɛɛlɛ kũ gbɛ̃ kũ Luda ń ká kpata gakuride kũ à bò a kĩnaannↄo. 
Kũ a Luda yã kũ o òárɛ pìi mà, ádi ditɛ bisãsiri pↄ́ ũro, a sì lákũ à de nà, Luda yã yãpura ũ. Àkũ mɛ́ àtɛn zĩ kɛ ákↄ̃nↄ kũ átɛni a náani kɛnↄ gũn. Abire yãi dↄ odìgↄ̃ Luda sáabu kpá lakanaa sari. 
Ó gbɛ̃nↄ, á yã kɛ̀ lɛɛlɛ kũ Luda gbɛ̃ kũ ò kú Kirisi Yesu gũn zaa Yudeanↄo, zaakũ á bùsudenↄ wɛ́ tã̀áwa se lákũ Yudanↄ tã̀ḿma nà. 
Yudanↄ Dikiri Yesu dɛ̀ kũ annabinↄ dↄ, akũsↄ̃ ò pɛ̀wá. Ń yã dì ká Luda guro, ò ibɛrɛɛ sɛ̀ kũ gbɛ̃ sĩnda pínkio. 
Òdi kpáwɛrɛ ò yã kũ Luda dì gbɛ̃ sura bao o buri pãndenↄnɛ. Lɛn durunna kũ òdigↄ̃ kɛ gↄrↄ sĩnda pínki dìgↄ̃ didikↄ̃a lɛ. Luda pↄfɛ̃ kìpa ń musu sà. 
Ó gbɛ̃nↄ, kũ o kɛ̃kↄ̃a gↄrↄ pla, wɛ́ mɛ́ adi kↄ̃ ero, ama ó laasun kúáwa. O á bɛgɛ kɛ̀ manamana, o mɛ̀ɛ wã̀ kũ ò wɛ́ sikↄ̃lɛ. 
Ó ye ò su á gwa dↄ. Makũ Pↄlu ma suna zɛ́ wɛ̀tɛ à de gɛ̃̀n do ke gɛ̃̀n plala, akũ Setan kpàwɛrɛ. 
Tó ó Dikiri Yesu sù, dí mɛ́ anigↄ̃ de ó tãmaa kũ ó pↄnnao kũ ó gã̀zubↄↄo ũ a arɛ á baasii? 
Zaakũ ákↄ̃nↄmɛ ó gakuri kũ ó pↄnnao ũ. 
