﻿2 TIMƆTI.
3.
Ǹgↄ̃ dↄ̃ kũ gↄrↄ kpɛdenↄ nigↄ̃ pãsĩ. 
Gbɛ̃nↄ zĩda yã ni dońnɛ arɛ, ↄgↄ ni ń swɛ̃̀ ble. Onigↄ̃ de karambaanidenↄ ũ, zĩdabirinↄ, gbɛ̃sↄ̃sↄ̃rinↄ, de kũ dao yãdarisarinↄ, guturunↄ, ludayãdarisarinↄ, 
gbɛ̃yãkɛrisaridenↄ, sùrusaridenↄ, gbɛ̃yakarinↄ, fayasaridenↄ, aniapãsĩdenↄ, yã mana ibɛrɛnↄ, 
bonkpɛdenↄ, laasunsaridenↄ, yↄ̃̀gↄ̃denↄ. Onigↄ̃ ye pↄnnakɛnaai de Luda yãla. 
Òdi donyĩ kɛ, ama ò ye a gbãnairo. Ǹ kɛ zã̀ kũ gbɛ̃ bire takanↄ. 
Ń gbɛ̃kenↄ dì gɛ̃ nↄgbɛ̃ kũ òdi mì gbãkɛnnɛronↄi, ò ń fu kũ lɛ́o. Durunna sàa dà nↄgbɛ̃ pìnↄn, dà vãni mɛ́ à gↄ̃̀ńnɛ, 
òdigↄ̃ yã dada gↄrↄ sĩnda pínki, ama òdi fu yãpura kũnaa. 
Lákũ Yanɛ kũ Yambɛrɛsio bò Musa kpɛ nà, lɛn gbɛ̃ pìnↄ dì bo yãpura kpɛ lɛ. Ń laasun lɛ́kpɛrɛmɛ, ó donyĩzɛ gũn pↄ́ ginyĩnanↄmɛ. 
Ò gɛna arɛ vĩ doro, zaakũ gbɛ̃ sĩnda pínki ń yↄ̃nkↄkɛ dↄ̃, lákũ ò Yanɛ kũ Yambɛrɛsio pↄ́ dↄ̃̀ nà. 
Mↄkↄ̃n sↄ̃, ń tɛ́mai. Ń ma kunna dↄ̃ kũ ma yãdannɛnaao kũ yã kũ matɛn pɛ́aao kũ ma ludanaanikɛnaao kũ ma mɛnakɛo kũ ma yenyĩo kũ ma zɛna gbãnao 
kũ wɛ́ kũ ò tã̀mao kũ wari kũ ma kɛ̀ɛo. Ń yã kũ à ma le Antiↄku kũ Ikↄniuo kũ Lisitirao dↄ̃ kũ wɛ́tãmmana zↄ̃kↄ̃ kũ ma fↄ̃̀ↄo. Ama Dikiri ma bo a sĩnda pínki gũn. 
Gbɛ̃ kũ ò ye ògↄ̃ kun ludayãmarinↄ ũ Kirisi Yesu gũnnↄ ni wɛ́tãmmana le. 
Gbɛ̃ vãninↄ kũ manafikidenↄ vãnikɛna nigↄ̃ karamɛ. Oni gbɛ̃nↄ sãtɛ, mↄ́kↄ̃nↄ se onigↄ̃ sãtɛna. 
Mↄkↄ̃n sↄ̃, ǹ zɛ kũ yã kũ n dàda n sì yãpura ũo. Ń gbɛ̃ kũ ò dàdannɛnↄ dↄ̃, 
zaakũ ń Luda yã dↄ̃ zaa n nɛ́fitikɛgↄrↄa. Ani fↄ̃ à n gba ↄ̃ndↄ̃ à n ká Kirisi Yesu náanikɛna kũ àdi ń sura baa. 
Yã kũ à kú Luda yãn bò Luda kĩnaa pínkimɛ. À àre vĩ, zaakũ àdi yãpura dańnɛ, àdi ń ɛ́kɛ káńnɛ ń ↄĩ, àdi ń gba laakarii, àdi lɛ́ daḿma yãkɛna a zɛ́aa gũn, 
de Luda gbɛ̃ sorukɛna ma yãmanakɛna sĩnda pínki zɛ́ gũn. 
