﻿EBERUNƆ.
12.
Abire yãi ókↄ̃nↄ se, lákũ sèedadenↄ diwái nà lɛ, ò ↄ kpá pↄ́ kũ òdi kpáwɛrɛnↄi kũ durunna kũ àdi ó kakũn aragao pínki, ò bàkpakũsũna kũ Luda dìtɛwɛrɛ lɛ́ kũ mɛnao. 
Ò wɛ́ pɛ́ Yesua kũ à bò kũ ó ludanaanikɛna zɛ́o akũsↄ̃ à zɛ́ pìi kɛ̀ papana. À gana líaa fↄ̃̀, adi a wé'iyã daro pↄnna kũ à ditɛnanɛ lena yãi, akũ à gɛ̀ɛ à vùtɛ Luda kíblegba ↄplai. 
À laasun lɛ́ a yãa, lákũ à mɛna fↄ̃̀ kũ durunnakɛri kũ ò ibɛrɛ bire taka sɛ̀ kãaonↄo, de àsun kpasa á nɛ̀sɛɛ yakaro yãi. 
Zaakũ á ↄsikana kũ durunnaoo gũn, ádi zɛ a gi ari a gɛ a gaoro. 
Nɛ̀sɛyĩdakũna yã kũ ò òárɛ lán nɛ́nↄ bà sã̀águn yá? Ò pì: Ma nɛ́, tó Dikiri tɛni n toto, ǹsun ditɛ pãro. Tó à kpã̀kɛ̃nyĩ, ǹsun tó n kã garo. 
Zaakũ gbɛ̃ kũ Dikiri yeiin àdi toto, àdi wɛ́ tã gbɛ̃ kũ à sì a nɛ́ ũa. 
À wɛ́tãmma ditɛ totona ũ. Luda mɛ́ àtɛn abirekũ kɛárɛ, kũ a nɛ́nↄn á ũ yãi. Nɛ́ ke kun kũ a de ni gí à a totoi yá? 
Tó adi á toto lán a nɛ́ kparanↄ bàro, á de a nɛ́nↄ ũro, yìgisarinɛnↄn á ũ. 
Ó denↄ vĩ andunia la kũ ò ó toto, akũ o ń yã mà. Lákũ à de lɛ nà, ò mì natɛ ó De kũ à kú musu de abirekũla ògↄ̃ kun. 
Ó denↄ ó toto gↄrↄ pla pↄ́ ũ ń ↄ̃ndↄ̃ lɛ́n. Luda dì ó toto ó karana yãimɛ, de ó kunna le àgↄ̃ adona lán a bà. 
Totona ke pↄnna vĩ a gↄrↄaro, sé pↄsira, ama gbɛ̃ kũ totonaa pì ń kɛ́kɛnↄ dì a gbɛ̀ le zã bona mana kũ aafiao ũ. 
Abire yãi à á ↄ kũ ò gↄ̃̀ dↄáinↄ kũ á gbá kũ ò gↄ̃̀ tererenↄ gba gbãna, 
à zɛ́ sɛ́ súsu, de ákↄ̃nↄ kũ átɛn tↄ̃ↄtɛnↄ sún kakũnlo, ò gↄ̃ kũ aafiaao. 
À wɛtɛ àgↄ̃ nna kũ gbɛ̃ sĩnda pínkio, á kunna gↄ̃ adona, zaakũ tó gbɛ̃ kunna adonaro, ani Dikiri ero. 
À laakari kɛ, á gbɛ̃ke sún kura Luda gbɛ̃kɛkɛnnɛnaai à gↄ̃ gↄ̃nna ũ á tɛ́, à wari dↄ gbɛ̃nↄa dasi à ń yakaro. 
Á gbɛ̃ke súngↄ̃ de pãpãkɛri ke ludayãdarisari ũ lán Isau bàro. À a daudukɛzɛ yìa pↄ́ gɛ̃̀n do blena yãi. 
Á dↄ̃ kũ à sa'olɛ wɛ̀tɛ a dea zã, akũ Luda gìnɛ. Bee kũ à wɛ̀tɛ kũ wɛ́'io, adi zɛ́ le à yã kũ à kɛ̀ litɛro. 
Adi kɛ Sinai kpi kũ oni fↄ̃ ò ↄ naaan a nairo, kũ àtɛn tɛ́ kũ, à gusira vĩ kũ gu bùgubuguuo kũ zàga'ĩao 
kũ kãkãki yĩsãmpanaao kũ Luda kòto gbãnao. Kũ Isarailanↄ kòtoo pìi mà, ò kútɛ kɛ̀nɛ ò pì, àsun yãke ońnɛ doro, 
zaakũ oni yã kũ à dìtɛńnɛ díkĩna fↄ̃ro à pì: Bee pↄ́kãde mɛ́ à nà kpi pìia, ò pápa kũ gbɛ̀ɛo ò dɛ. 
Luda kipanaa pì bi vĩna yãmɛ manamana ari Musa pì, vĩna a kũ, átɛn lukaluka. 
Ama a na Zaiↄ̃ kpii kũ Luda Wɛ̃̀ndide wɛ́tɛ Yurusalɛmu kũ à kú musuo kũ a malaika dasidasi kũ ò kakarana gwenↄ 
kũ daudu kũ ń tↄ́ kɛ̃na gwenↄ kↄ̃kakaranaao kũ Luda kũ à de gbɛ̃ sĩnda pínki yãkpatɛkɛri ũo kũ gyãwãn gbɛ̃ mana kũ ò gↄ̃̀ papananↄ 
kũ Yesu kũ à de Luda bàka kunna kũńwo dufu yãkɛkɛri ũo kũ a aru fãfãna kũ àtɛn yã mana o de Habila pↄ́lao. 
À laakari kɛ, àsun gí yã'orii pì yã mairo. Lákũ gbɛ̃ kũ ò gì Luda lɛ́damma mai zĩtɛ lanↄ dí boro nà, ókↄ̃nↄ se, lákũ Luda tɛn lɛ́ dawá zaa musu, tó o kpɛ lìnɛ, oni ó pↄ́ o dↄ yá? 
A kòto zĩtɛ lùkaluka yã, akũ à lɛ́ sɛ̀ à pì, áni gu lukaluka gɛ̃̀n do dↄ, adi kɛ zĩtɛ adonlo, kũ musuomɛ sà. 
Kũ à pì, gɛ̃̀n do dↄ, abirekũ tɛn piwɛrɛ Luda pↄ́kɛna kũ ani lukaluka pìnↄ ni gɛ̃ zɛ́lamɛ, de pↄ́ kũ àdi lukaronↄ le àgↄ̃ kun. 
Abire yãi lákũ ótɛn kpata kũ àdi yĩgãro ble nà, ò Luda sáabu kpá, ògↄ̃ donyĩ kɛnɛ lákũ à yei nà, ògↄ̃ mì natɛnɛ vĩnakɛnanɛɛ gũn. 
Zaakũ ó Luda bi tɛ́ kũ àdi kũḿmamɛ. 
