﻿YAMISI.
4.
Bↄ́ mɛ́ àdi fìti kũ lɛ́kpakↄ̃anaao da á tɛ́ɛ? Òdi bo á pↄyeina kũ òtɛn ↄsi ká á mɛ̀ɛ gũnnↄ kĩnaanloo? 
Adìgↄ̃ ye pↄ́i, ama adì ero, akũ adì gbɛ̃ dɛ. Adì pↄ́ ni dɛ, akũ adì pↄ́ kũ átɛn pɛ́a lero. Akũ adì lɛ́kpakↄ̃a kɛ, adì fìti kɛ. Á a vĩro, kũ adì wɛ́ kɛ Ludaaro yãimɛ. 
Tó à wɛ́ kɛ̀, adì ero, kũ adì wɛ́ kɛ kũ nɛ̀sɛmanaoro yãimɛ, zaakũ adìgↄ̃ ye à a bↄkↄtɛ kɛ á pↄ́nidɛnanↄ gũmmɛ. 
Náanisaridenↄ, á dↄ̃ kũ gbɛ̃nnakpana kũ anduniao bi ibɛrɛsɛna kũ Ludaonloo? Gbɛ̃ kũ à ye à kɛ andunia gbɛ̃ ũ gↄ̃̀ Luda ibɛrɛ ũmɛ. 
Kũ ò kɛ̃̀ Luda yãn ò pì, Nini kũ Luda dà ó gũn nɛ̀sɛgↄ̃ba vĩ, átɛn da yã pãn yá? 
Ama gbɛ̃kɛ kũ Luda vĩ kũoo de abirekũla, zaakũ ò kɛ̃̀ Luda yãn ò pì: Luda dì ibɛrɛ sɛ́ kũ zĩdabirinↄ, ama à gbɛ̃kɛ vĩ kũ zĩdabusarinↄ. 
Abire yãi à mì natɛ Ludanɛ. À gí Ibilisinɛ, ani bàa síárɛ. 
À na Ludai, ani naái. Durunnakɛrinↄ, à ↄ bo durunnan. Nɛ̀sɛpladenↄ, à á swɛ̃̀ pípi. 
À ↄ́ↄ dↄ kũ pↄsirao kũ wɛ̃ndayão. À á yáadↄna litɛ ↄ́ↄdↄna ũ, à á pↄnna litɛ nɛ̀sɛyakana ũ. 
À á zĩda busa Dikiri arɛ, ani á kara. 
Ma gbɛ̃nↄ, àsun kↄ̃ tↄ́ bɛ̃̀nɛ síro. Gbɛ̃ kũ à a Yesude dake tↄ́ bɛ̃̀nɛɛ sì ke à a bɛ̃̀nɛɛ bò, à Luda doka sèeda vãni kɛ̀, à a vãni bò. Tó n Luda doka vãni bò sↄ̃, a màriimɛ n ũro, a vãniboriimɛ n ũ. 
Ludan dokaditɛri ũ kũ yãkpatɛkɛriio. Àkũ mɛ́ à gbɛ̃ surabana kũ a kakatɛnaao gbãna vĩ. Mↄkↄ̃n sↄ̃, dímɛ n ũ, kũ ndì n gbɛ̃dake vãni boo? 
À yã ma sà, ákↄ̃nↄ kũ adì pi, gbãra ke zia áni gɛ́ wɛ́ran, áni vutɛ gwe wɛ̃̀ do, áni laga tá à àre le. 
Á yã kũ ani á le zia dↄ̃ yá? Á dↄ̃ lákũ á wɛ̃̀ndi de nà yá? Á de lán suka bàmɛ. Tó à kpà fíti, akũ àdi gɛ̃tɛ gↄ̃̀nↄ. 
Yã kũ à de à on dí: Tó Dikiri wè, akũ ó aafia, óni kɛ lán dire bà ke lán dí bà. 
Tera sↄ̃ átɛn ĩa dã, a Luda bàkaa bò. Ĩadãna bire taka buri manaro. 
Gbɛ̃ kũ à yãmanakɛna dↄ̃, akũ adi kɛro durunna kɛ̀. 
