﻿LUKA A CIAPAW THAWNGCHAWBIA.
1.
Mehchaw cai a cangpaw Theofila, mehlupui tah kaa hrawng letei hming a va tlung ciapaw kong khah cia a pachia cy he ka, 
cia a pachiapaw he cawh mehkho ceingei tei a hmuh tawpaw sahlo le phung a reilaipaw sahlo he tei aa ma chingpaw hrakhei a cang. 
Macawtaco kama zong tah a hrangthonah taitah zezong a raering teitah ka khiahle khy taitah a pazui naning tei hratah na cawtah ciapah heh a chah thly a tatah ka rawh. 
Aa ca cawngpah pawhe vytei khah biahmuisui a cang tahpaw na hni khy nápawtah. 
Herod cawh Judia raang letah siangpahrang a cangning takhei Zakaria aa tahpaw tlangbui pakheh ung ka, ama cawh tlangbui Abija phu leteipaw a cang. A nupui Elizabet zong cawh tlangbui Aron hring a cang. 
Aa pahning tah Khazing hme letah a dingkong teitah khua a sahpaw cang he ka, suise a kawh ly tei Abuipaw biapeh le a phung le lang vytei khah a zuipaw a cang he. 
Canghrasala Elizabet cawh cing ka, sawteisah bei he. Aa pahning co, aa kung a macang ngetei myca he. 
Uikhehpaw cawh Zakaria phu khah aa raihre nápaw cai cawh va chuh ka, Zakaria cawh Khazing hmekaw leco tlangbui rai cawh hre ka, 
tlangbui cangnah rai a rainah phung tei hratah basung phe he ka, ama cawh Abuipaw behnah ing chung letei ringthopaw me tei ropaw rai khah a ting. 
Ringthopaw me ronah cai a va chua tihtah Khazing beh rua pawtei a pahmopaw zawpui sahlo cawh khungthing lang lekhei thlaw aa chang. 
Mataico, Abuipaw vaiming cawh ama khatah a va paly ka, ringthopaw ronah siasang cacang lang lekhei a daw thlang. 
Zakaria tah ama cawh a hmuh tihtah a pahly ka, a ci ngetei. 
Canghrasala vaiming taco, “Zakaria ci kheh, Khazing tah na thlawchangnah khah a ca thui pah. Na nupui Elizabet tah sawcapaw a ca sah pah a. A ming cawh Johan na sá a. 
Na thawchahnah le na lung a tlingnah ngetei a cang a. A pinah cawtah ming hlupui khah aa lung a lawng a. 
Abuipaw mehmuh letah mehlai a cang a. Zu le ahringpaw rui khy a cangpaw zong khah ding hrahring a be. A no chung taitah Thlawpaw Pathai tah a chih ciapaw a cang a. 
Israel cawngsaw mehlupui khah Abuipaw aa Khazing khatah a va chui kaw he a. 
Taico, Elija a hmingtuakhynah le a thlawpaw tah Abuipaw hmelang tah a sei a. Paw sahlo lungthing cawh aa sawtei sahlo lang letah le bia a nge lypaw sahlo cawh singnah a cangpaw dingnah lang letah a hui sá he a. Cawngsaw vytei khah Abuipaw cawtah a maipacia rua pawtah a pachia a paning he a,” tatah a tah. 
Zakaria tah vaiming hai letaco, “Ma cawh zehratamaw a cang khy a? Kama zong mehtaa cang myca neh ka, ka nupui zong kung macang pui a cang myca?” a tah. 
Vaiming taco, “Kama Gabriel cawh, Khazing hmekaw letah a dawpaw ka cang. Ma kong thawngchawbia heh nama ching rua tah tawpaw ka cang. 
Mataico nama cawh ma hming vytei heh a va tlung thlu hlai vytei na rei thlaw khy khaw bei ceh. Zecawtamaw tatah ma cai a tling tih tei, a va tlung lepaw ka reipaw bia khah na zing lynah cawtah,” a tah. 
Ma chung cawh zawpui vytei tah ama cawh heh thlang he ka, zecawtamaw behnah ing chung letah ma tlua co a ry zia tatah aa khuarawh a haa thlu. 
A ka piathlah tihtah aaning sahlo khah bia a ching khy khawh bei he. Behnah ing chung lekhei apalynah a hmuh tahpaw khah aa hni. Zemaw tahpaw co, a kihtua khei bia khah a ching he ka, a rei cawh thlaw khy hlui be. 
Mataico a raihrenah cai cawh a chang tihtah ing lang khah a dih. 
Ma khy taico a nupui Elizabet cawh sawtei pho ka, thlah pangaw chung a nawh. 
Elizabet taco, “Ma heh Abuipaw tah ka cawtah a tuapaw a cang, atoning cai lehei a dukhuinah cawh palangsah ka, ming vytei hrong letei ka ningzawnah khah a pa lahpah hly myca,” tatah a tah. 
Taico, a thlahruhnah leco, Khazing tah vaiming Gabriel cawh Galili raang Nazaret khua lang khah taw ka, 
David teisaw a cangpaw Josef tah chui ruapaw tei a pahapaw laisaw pathai khakhei a taw. Ma laisaw pathai a ming cawh Mari a cang. 
Vaiming cawh ama khaco va sei ka, “Na kih ka ca tle, nama cawh dukhuinah a sangpui a cypaw na cang. Abuipaw cawh nama khatah a ung,” a tah. 
Mari cawh ma bia rawng taco a lung hna a hnawh ngetei ka, ma heh zehapaw kihtlenah maw a cang sialia, tatah a khuarawh a haa thlang. 
Canghrasala vaiming taco a hai letah, “Mari, ci kheh, Khazing dukhuinah na hmuh myca. 
Sawtei pho ceh ka, sawcapaw na sá a. A ming tah Zisu tatah na tah a. 
Ama cawh mehlai cang a ka, Cungnungcai Khazing Sawcapaw tatah y a cang a. Abuipaw Khazing tah a pathlahtu paw David abui dyching khah a pae a. 
Jakob mingphing sahlo cung letah bia a hnui paria a. A painah raang cawh changnah hnui be,” a tah. 
Mari taco, “Zekhatamaw ma hming heh a cang thai a? Kama cawh laisaw pathai pui ka cang caw!” tah ka, 
vaiming taco, “Thlawpaw Pathai cawh na cung letah tlung ka, Cungnungcai Khazing hmingtuakhynah tah a ca bakhu a. Macawtaco, mehpathai a va pi lepaw cawh Khazing Sawcapaw tatah y a cang a. 
Na sawny no Elizabet tahmai a tá khy tah sawtei a sá a. A cing tatei aa tah teipaw khah atoheh cawh a thlahruhnah a cang myca. 
Khazing khaco a cang khy lypaw zehmai ung be,” tatah a palei. 
Mari taco, “Kama cawh Abuipaw a saecanu ka cang, na reipaw hratah ka cung letah tlung ky seh,” tatah a tah. Mataico, vaiming tah ama cawh a seisai. 
Ma ningcai leco Mari cawh a pachia ka, Judia raang tlaang cung letei a ungpaw khua lang khah rairang tah a sei. 
Zakaria ing leco a nae ka, Elizabet cawh a kih a tle. 
Mari tei bia a chingpaw khah Elizabet tah a thui tihtah a chung letei a ungpaw ny cawh a pathlo ka, Elizabet cawh Thlawpaw Pathai tah a chih. 
A thangpui tah y ka, “Canu vytei letah bonghnang a ting cai no cang ceh ka, na sah lepaw ny zong bonghnang a tingpaw a cang! 
Canghrasala zecawtamaw ma tlua hei dukhuinah ka ting tu tlong! Ka Buipaw a no, kama khatah na vong thlangpaw heh! 
Na kih tlenah o khah ka naw tah a thui cangkaw tei leh ka chi chung letei a ungpaw ny cawh a lawng ka, a pathlo. 
Abuipaw tah ama khatei bia a reipaw, a va tlung ceingei a, tatei a zing no cawh bonghnang song tah ung ky seh,” tatah a tah. 
Taico Mari taco, “Ka hringnah tahei Abuipaw cawh reithai ka, 
ka thlawpaw cawh Khazing, a pa Pachahtu cung letah a lawng. 
A saecanu a ny pahnai zia cawh monghly be ca ka, atoning ri taihei co, chai a va chuh lepaw letei cawngsaw vytei tah bonghnang a ting no aa pa tah a. 
Meh thawtlungpaw taco, ka cawtah hming rungnawpaw a tua myca, a ming cawh a pathai. 
Chaikheh hning chaikheh Ama a cizawpaw sahlo he cung letah a ningdonah a palang. 
A kiá tah hming rungnawpaw sahlo cawh tua ka, aa lungchung tei a palai a patuinah a hnuipaw sahlo khah a papaipatlaw thlu he. 
Uhtu bui sahlo khah aa buidyching taitah dawh thlah he ka, canghrasala nytawpaw sahlo cawh a cuicaling he. 
A ngaidipaw sahlo cawh hming chawpaw tah aa rivawsah he ka, canghrasala mehrung sahlo cawh aa kih longpaw tah a kawsah he. 
A sae Israel cawh bawkhang ka, Abraham le a pathlah sahlo 
letei a zaangsawnah cawh chaizaw tah a thui paria thlang ka, kaa mapaw sahlo letei a reipaw zong tai khah,” a tah. 
Mari cawh Elizabet khaco thlah thung hrawng a ung khy taitah ing lang a tlung kaw. 
Elizabet cawh ny a hnuinah ning le thlaw cawh va tling ka, sawcapaw a sah. 
A ingpaw le a sawny sahlo tah Abuipaw tah a cung letah a zaangsawnah alaipui tah a langsah tahpaw aa thui tihtah a lawng khui ngetei he. 
Ningreh ning taco nysai cawh a cingpatai rua pawtah va sei he ka, a ming cawh a paw ming Zakaria sah kaw pawtah aa tah. 
Canghrasala a no tei a tahpaw cawh, “Cang be, Johan tatah ypaw a cang,” a tah. 
Aaning sahlo taco, “Naa sawny hrong letah ma hapaw ming a phopaw cawh aa ung tlung be,” aa tah. 
Taico a paw cawh kihtua tah nypaw ming heh aho tah paseh la maw na du tatah aa hae. 
Ama taco, “Ca cianah calung pa pei law,” tatah a kih tuapah he ka, “A ming cawh Johan a cang,” tatah cia ka, cawngsaw vytei cawh aa khuarawh a haa thlang. 
Ma khy cangkaw leco, a lui cawh a catlai ka, a hmo a ka caw ka, bia ka reichua ka, Khazing khah a reithai. 
Ingpaw sahlo vytei cawh ningang tah ung he ka, tlaang raang a cangpaw Judia raang cawngsaw vytei taco, ma kong longtei khah aa rei. 
Ma aa thuipaw maikaw cawh aa khuarawh haa ka, “Ma nypaw heh zemaw a ka lo tae tu a?” tatah aa tah tlungmang. Abuipaw hmingtuakhynah kih cawh a cung letah a ungnah cawtah a cang. 
A paw Zakaria cawh Thlawpaw Pathai tah chih ka, bia phy ka, 
“Abuipaw, Israel Khazing cawh reithai tah ung ky seh. Zemaw tah pawco, Ama cawh a vong ka, a cawngsaw sahlo cawh a tlang myca he. 
A sae David pathlah taikhei pachahnah ki cawh kaa cawtah a patung myca. 
Abuipaw tah khuahlai ning taitei Khazing khuavang mehpathai sahlo hmang tei bia a ma taipaw cawh, 
kaa carae sahlo le a ma huapaw sahlo taitah pachah rua pawtah a cang. 
Khazing tah kaa mapaw sahlo cung letah zawnge a neh ka, ka biahrai pathaipaw cawh ka cingkai a, a tah. 
Kaa mapaw Abraham khatah ma biatainah a tuapaw cawh 
kaaning khah kaa carae kih chung taitah pachah chua pawtah le ciphang lytah le pathainah le ding ná tah, 
kaa hring chung vytei a hmekung letah a rai kaa hre khy nápaw cawtah a cang. 
Ka sawtei, nama cawh Cungnungcai Khazing khuavang tatah y na cang a; zecawtamaw tatah Abuipaw langpui parai pawtah a hme letah na sei lai a. 
A cawngsaw sahlo khah naa suanah ngethai a cangnah thongtah pachahnah naa hmuh a, tatah na ching he a. 
Zecawtamaw tatah kaa Khazing cawh ningdo a thaipaw le a ningnaipaw a cang, pachahnah khainah cawh avai taitah kaa cung letah khaisah ka, 
thihnah ningpahli le muinah chung letah a ungpaw sahlo cung letah khai sá pawtah le kaaning khah denah langpui lang chuithlah rua pawtah a cang,” tatah a tah. 
Taico nysai cawh ka changchy ka, thlawpaw lang letah thawzaang ka hnui longmang ka, Israel mingphing sahlo letei a va phyhlang hlai vytei cawh raangcaa lekhei khua a sah. 
