﻿Tigidali Nai Gagalama Nigali Side.
4.
Adam aga we dali pilama, tama we haliga yai. Tama wego ogwa me deli ame nenama, tama agai te po wai, “Yawego ena tau selama, tama eno ogwa salio.” Tama tibaso, agai te ogwa nogi Kein poai. 
Nosali agai Abel ame nani, te Kein aga ama dao. Tama Abel te kibu sipsip dali, meme dali si tonalubo bidi pedelai, tama Kein te gi sę ebo bidi pedelali. 
Tama nosali Keingo te gide nai dabe selama, tama agai selasa asama, tama te masigigo nigai alta sai daide munama, siago te nai uduyu, tama Yawebolo olo mayu, te ofa tama ilali. 
Tama Abelgo te gomunai sipsip wai dabe meba selama, tama agai augwali elali. Tama agai te meba dwagi yai ili dabe me selama, tama ofa yali. Yawego dwagi yai homu pemene te Abelbolo elama, te aga ofa dali me tiali, 
tiali goli agai te Kein dali, aga ofa dali, te agai godolo me ebeo. Tama Keingo wado homu dwai mu elama, tama agai gesabidi hulia sigi pai. 
Tialima, Yawego Keinbolo te po wali, “Magi baso nage dwai sębę ebawe? Tama magi baso nago gesabidi gasagi yai pedelaliwe? 
Te nago dwagi yai kolesaga eyu da, teda eno nage dali dwagi yai homu yaibao. Tiali goli, nago dwai kolesaga eyu da, teda dwai sę ebo kolesaga nage pąde bidiyu, tama tego nage godolo eyu, tama nage aiyaba elaluabo sogo tonalubao, te moni nasi yai bulu hasa tiwai dao. Tiali goli, nago bomo elama, te dwai sę ebo kolesaga aiyaba elaluao,” Yawego Keinbolo te po wai. 
Tama nosali Keingo aga ama Abelbolo te po wai, “Da si gasaba gana dwasianu biligi pinao,” wali. Augwali si te nosa elalubo tǫba biligi pali, tama Kein hodaluyu, tama aga ama ela muani. 
Nosali Yawego Keinbolo hanalu wai, “Naga ama Abel mena bidibowe?” Tama Keingo te po wali, “Eno konebeo. Magi yaliwe? Nago homugo ena te eno ama tonalubo bidi naga bidimainogowe?” 
Tialima, Yawego Keinbolo te po wai, “Nago magi baso te dwai dwai sę yaliwe? Te naga amago kaneme te tǫba gelali, tama te kaneme te bidi me deli dogoni tiwai elama, tama i wabo eno odali, ‘Boi eyu, Kein ela muao,’ te tiwai po obao. 
Megi te eno nage dolabo bomai po obao. Nage te naga gi sę yabo tǫde bidibo gudulama, paibao. Magi baso meni, te naga nogogo digi te naga ama kaneme te tǫba gelalio. Tama te tǫ te penane dalalubo tiwai elama, tama te kaneme tualio. 
Tama tibaso, nago nai te tǫde bulubaso da, te nai bugagia me hologobeo. Te nago page bulu mu meniama, tama nage te tǫ sibi usu nama, te bulu wau bilibo bidi tiwai bidaibao,” te po wai. 
Tama Keingo Yawebolo te po wali, “Te nago enabolo mabo sęgę te genuai mu dao. Eno te sęgę tolobo usugobeo. 
Te nago ena e tǫde nago gedude me te sela sąwaibao po wai. Te ena bidabo bulu meniama, tama ena subigila te tǫde bilaibao. Tama bidi me deligo te ena suali da, teda agai ena ela muaibao,” wali. 
Tiali goli, Yawego te po wai, “Menio. Te nage bidi me deligo ela muyu da, mu tama te eno genuai sęgęgo wei ponaibao.” Tialima, Yawego te dąį me deli Keinde muani, tama bidi dabego aga suyu, tama te dąį ilali subaso da, teda augwaligo aga me ela mugobeo. 
Tama Kein te Yawe bidibo madi tagalama, wi pelama, tama tǫ me deli teba bidigi pali, te augwaligo te tǫ nogi poali “Subigila Bilibo,” te nogi poali. Te tǫ te Iden gi elaluali madi te giliga asobo badu elaluai. 
Tama nosali Kein te aga we dali pilama, tama we haliga yalima, ogwa me deli ame nani, aga nogi Enok. Nosali Keingo hanu me deli nigilama, tama aga ogwa Enok nogi te hanu nogi polali. 
Nosali Enokgo ogwa ame nenama, tama Enokgo te ogwa nogi Irat nogi poai. Nosali Iratgo ogwa ame nenama, tama Iratgo aga nogi Mehujael nogi poai. Nosali Mehujaelgo ogwa ame nenama, tama Mehujaelgo aga nogi Metusael nogi poali. Tama nosali Metusaelgo ogwa ame nenama, tama Metusaelgo aga nogi Lamek poali. 
Tama nosali Lamekgo we si sai. We me deli nogi Ada, tama mego nogi Sila dao. 
Adago Jabal ame nani. Jabalgo nosali ame nani wąį dabe augwali da te kibu bulmakau sibi negeyu, te ugwa bede bidaluali wąį hani dao. Jabal agai te kolesaga ebo hasia bolo gagalali, te sę page bidi mu dao. 
Te Jabal aga ama nogi te Jubal. Te Jubalgo wąį hani sibi da, te augwaligo tęąbi te musik gita me, genagigo ona elebo tiwai dali, te gagali yali wąį dabe dao. 
Tama nosali te we Silago te Tubalkein ame nani. Tubalkein da, te bras me ain te kapa sigo te haniani sę yabo nai tul dabe te nigibo wąį hani bidi dabe hasia bolo pedelai. Te Tubalkein aga abe nogi te Nama dao. 
Tama me sogo te bidi Lamek aga we sibolo te po wai, “Ada me Sila, dage sigo eno pedauwalide po wabo odiąo. Dage si da, te Lamekgo we da, dage sigo eno po bugagia odiąo. Bidi me deligo ena elibaso, tama eno aga ela muani. Te bidi aga gesi ogwa bidi bidibadi, tama agai ena subigila dodolama elibaso, te eno aga ela muani. 
Augwaligo te po wabo da, ‘Te bidi mego Kein ela muyu da, teda aga moni genuai sęgę mu saibao.’ Tiali goli, eno e po obao, bidigo ena elali da, teda aga moni genuai sęgę mu sesa pidubadi geaibao,” Lamek agai te po wai. 
Te nosali Adam aga we dali ma piai. Tama wego ogwa ame nobaso, tama te po wai, “Te Godigo enabolo te gasa wai te Abel bidali hasegelama mani, te Keingo aga ela muani.” Tialima, agai te wai nogi Set poai. 
Te nosali Setgo wai ame nenama, tama Setgo aga nogi Enos poali. Tama te sogo te bidi dabego te Yawe nogi wabo gagalama, tama agaba lotu po weyu bidali. 
