﻿Tigidali Nai Gagalama Nigali Side.
15.
Nosali Abramgo na tiwai ebaso, tama Yawego agabolo te tiwai po wai, “Abram, nage wi munu me elamuo,” wali. “Eno nage te auwago bugagia mu seselalubo tiwai gilama ebao. Eno nage dali dwagi yai sę eyu, tama nage te genuai nogi elalubo bidi pedalumainu iliyu yaibao,” te po wai. 
Tiali goli, Abramgo te po wai, “Yawe, ena hobede ya, eno Genuai Bidi, ena wai meni yai bidiyu, tama nosali isaibao. Te nago magi ilama, te ena genuai nogi elalubo bidi pedelaibawe? Te ena isibosi, te bidi me deligo te eno doado bage saibao, te Damaskus bulu bidi Elieser dao. 
Nago enabolo wai me mabeo. Tama tibaso, ena isibosi, te ena sę bidi Elieser agai te ena hasegelama, tama eno doado bage tigidali somainu yaibao,” wali. 
Tiali goli, Yawego Abrambolo te po wai, “Te nage isibosi, te sę ebo bidigo nage hasegelama, te nago doado bage tigidali me sogobeo. Te nago ogwa wai mu te nago doado bage tigidali te nosali sabo bidi pedelaibao,” te po wai. 
Tama Yawego Abram buluba odasa solama, tama agabolo po bomonama weyu, te po wai, “Nago te dagalude te hǫ dabe suao. Te nago tigidali nedebo usu yaibawe? Tialima, nago wąį dabego wai dabe augwali te hǫ tiwai umabo mu pedelaibao,” wali. 
Tama Abramgo te po mu po naga dao homu eyu, tama te Yawego wali po aga homude dąų wai. Tama tibaso, Yawego aga doloba pai bidi nogi poai dao. 
Tama Yawego Abrambolo te tiwai po wai, “Ena Yawe dao. Eno nage i obaso, te naga bidali bulu Ur te Kaldia tǫ pedaide bidali te taga soai. Eno tama tiali, eno e tǫ nagebolo mawainogo yali, tama e tǫ nago tǫ mu pedelaibao.” 
Tiali goli, Abramgo te po wai, “Te Yaweo, eno Genuai Bidi, te mena tama eno koneama, te e tǫ te eno tǫ dao po wagowe? Nago magi ilama, tama eno te tiwai koneaibawe?” 
Tama tibaso, Yawego po wei ponani, “Te e tama tiwai nai dabe te enabolo selasa asao, te tamadi dilai bulmakau so te kibu be sela yai sesebadi, te meme me deli me te kibu be sela yai sesebadi, me te sipsip omai te kibu be sela yai sela asobadi, te dwasianu ba hi si sesebadi yao,” te po wali. 
Tialima, Abramgo te nai tigidali selama, te Yaweba sela pali. Tama Abramgo te kibu dabe te tomode si hwągo pedama, tama te nai dabe dedelage te si badu wasi sili pali. Tiali goli, te ba si da te agai elali goli, te togobeo, sese muani. 
Tama te ba kemodage meba aselama, te kibu dabe tuainogo ebaso, te Abramgo augwali ela gudulali. 
Tama elama, tama te giliga degegi painu ebode te Abram aga godege pialima, te isai tiwai mu yai. Agai pilamubadi, te agai nade subo nai tiwai te moni dwai be huli mu sulama, te aga wi dwai mu eyu bidali. 
Tama edubadi, Yawego agabolo tama po wali, “Mu tama koneao, te nago wąį dabego wai dabe te augwali gasa hani bidi dabego tǫde te bulu meni yai bidi dabe te bulu wau bilibo bidi dabe pedelaibao. Te augwaligo olo sę ebo bidi dabe pedaliyu, tama gasa hanigo dolobo sę ebo dologode augwali bididubadi, te bidi sese nogo si sągą si 400 kibu be tama usu naibao. 
Tiali goli, eno te kolesaga ebo hani augwalibolo te eno sęgę mawaibao. Tama nago wąį te augwaligo wai dabego te doado bage hauwa mu selama, tama te bidali bulu taga paibao. 
Tiali goli, te sę esiąbadi, te nage digi te nage homu nagame bugagia elama, bidiyu elama, te nage monu dabe mu elama, te nage isibaso, tama augwaligo nage pubulaibao. 
Te nago wąį dabe augwali te e tǫba polo ma asogobeo. Te megi ede bidalubo Amor hani augwaligo te dwai kolesaga hauwa me isiąbadi. Te nosali mu te Amor hani augwaligo dwai sę ela silai digi, teda eno augwali dolobo sę elama, tama augwali ela gudulaibao. Tama te sogo, nosali mu, te nago wąį hani dabe augwaligo wąį hani dabe tama pedalubode, te sogo augwali ma begasa aselama, e tǫde bugagia bidaibao,” Yawego te po wai. 
Te giliga dega sigi pelama, tama be hulia sali, tialima polo tama te baket tiwai nai me deli pedelali, tama tede hano eyu, sia bogoli eyu yai. Tama te nai aga digi tama te Abramgo dodolali hasa hani si tomodu bilibo suali. 
Te side digi tama te Yawego tau sabo bomai po Abram dali dąų weyu, tama agai tama po wali, “Te eno te e tǫ tigidali te nago nosali ame nabo bulai wai, te hani dabe augwalibolo mawaibao. Tama te tǫ dąį te wę sesedu te Isip dabe tǫ pedai badu gagalasa, te genuai wę Yufretis teba saboligi paibao, moni tǫ mu. 
Te augwaligo te Kin dabego me, te Kenis dabe me, te Katmon, te augwaligo tǫ sobadi, 
tama Hit dabe me, te Peres dabe me, Refaim dabe, 
te Amor dabe me, te Kenan me, te Girgas me Jebus, te tama hani bidi dabe augwali tǫ saibao. Eno tama po mu dąų obao,” Yawego Abrambolo te po wai. 
