﻿Tigidali Nai Gagalama Nigali Side.
16.
Te Sarai, Abramgo we, agai wai meni yai. Tiali goli, agai sę ebo Isip we me deli bidali, aga nogi Hagar. 
Tama Saraigo Abrambolo tama po walali, “Nago koneani, Yawego eno tabi paliama, tama eno wai me ame nogobeo. Nage eno sę ebo we dali pigi pao. Te agai eno wai me deli ame naibao,” wali. Tialima, Abramgo aga we Saraigo wabo po odai, usu da wai. 
Tama Saraigo sę ebo te Isip we Hagar selama, tama aga te Abram aga we tiwai selama, bidali. Abram te Kenande kibu be nogo si bidai elalubadi, tama te sę pedelali. 
Tialima, Abram te Hagar dali pilama, tama Hagar haliga yali. Te Hagar aga haliga elalubo konebo sogo, agai te Sarai dali hagoma yali. 
Tama Saraigo Abrambolo po bomo elama weyu, te po wali, “Hagargo ena dali hagoma ebao. Te tiabo page naga digi yali. Mu tama, ena digi te ena sę ebo we te nagebolo mani. Tiali goli, megi aga koneani, te aga haliga ebaso, te agai ena dali hagoma ebao. Yawego digi te da si dagalumainu yaibao,” wali. 
Abramgo po wei ponani, “Odao. Hagar te naga sę ebo we dao. Te nago aga tonalubao. Te nago mena sę agabolo yainu, te homugo tiao,” wali. Tama Saraigo te Hagar dali boi bidi elama dwai sę ebaso, tama Hagar wi palio. 
Hagar te bidi meni yai pedai badu te Sur pabo sunumidu pai. Aga te wę ulu tubo madi dulalubadi, te Yawego Ensel Mobo Bidi te agaba pedelali. 
Tama Mobo Bidi Enselgo agabolo tama tiwai po wali, “Hagar, te Saraigo sę ebo we, nage menadu aselama, tama nage menaba painogo ebawe?” Tama Hagargo po wei ponoyu, te po wali, “Sarai aga da, te ena tonalubo we dao, tama eno te Sarai taga soyu, ena wi sobao,” wali. 
Tama Mobo Bidi Enselgo te po wai, “Nage Sarai pageba ma geasa pelama, tama agai po tigidali wali pao.” 
Nosali agai po ma weyu, te po wai, “Te eno nago hani wąį te wai dabe hauwa umabo pedelama, tama bidi dabe augwaligo nedainogo ebo usu me egobeo.” 
Tama Mobo Bidi Enselgo po ma wali, “Te dwasianu sogo pąde tama nago te wai ogwa ame naibao. Tama nago aga nogi Ismael poao. Magi baso meni, nage sęgę elalubadi, tama Yawego nago gela wabo odai. 
Tiali goli, nago wai da, te uni yowi tiwai bidaibao. Te agai tigidali bidi dali boi bidi eyu, tama tigidali bidigo agabolo boi bidi eyu yaibao. Te aga deli kaneme dabe dali te bugagia homu nagame elama, me bidigobeo,” wali. 
Hagargo te homu yai, ‘Sesemane sogo Godigo ena sudu geyu, tama megi eno aga suali, tiali goli, te ena bidibo ula me elaluba, isibeo,’ te homu yali. Tama agai te agabolo po wali Yawe nogi gasa me wali, “Nage da, te ena subo God dao.” 
Tama te tialigo naga, te bidi dabego te wę ulu asobo te Kades de Beret tǫ si tomode suali, augwaligo te nogi poali, “Te ena subo Bidibo Ula Elalubo Bidigo wę ulu dao,” tama nogi poali. 
Tama nosali Hagargo te Abramgo wai ogwa ame nani, tama Abramgo aga nogi Ismael poai. 
Tama te sogo Abramgo kibu be te 86, te tama kibu be elalubadi dao. 
