﻿Tigidali Nai Gagalama Nigali Side.
24.
Te Abraham te monu dabe mu yalio. Tama Yawego agai tigidali yali sęde te wiegi yai tau sabo sę eyu, tama Abraham bugagia mu bidali. 
Tama Abrahamgo aga sę yali monu dabe bidi i wali. Te bidigo te Abrahamgo doado bage tigidali tonalubo bidi da. Abrahamgo agabolo te po wali, “Naga nogo guni sisu muyu, nago dila pai po ena dali dąų walao. 
Nago te Yawego nogide te po bomo yai po dąų wao, te dagalu de tǫ dali sigo God dao, te tama tibaso, nago eno ogwago we te Kenan tomode we dabe me te noma sigio, te ena e bidibo tǫde. 
Nage te eno page buluba ma begasa pelama, tama ena hani tomode digi te we me deli gegelama, tama aga noma selama, tama eno ogwa Aisakgo somainu yao,” wali. 
Tiali goli, te sę bidigo te po wai, “Te wego te aga bulu taga soabo hagela homu eyu, te ena dali e buluba asabo homu isiąbaso da, teda magi yaibawe? Ma, te eno nago ogwa te naga page buluba tagala palagawe?” 
Tama Abrahamgo po wei ponoyu, te po wai, “Woo, nago te eno ogwa te eno page buluba munu me tagala palamuo! 
Yawe, te dagalude bidibo Godigo ena te eno ayago bede, me te ena hani dabego tǫde selama, asali. Tama agai bomai dąų wabo po wali, te agai e elalubo tǫ te eno hani wąį dabebolo mawaibao wai. Yawego digi te aga mobo bidi ensel te nage pabodu polasa tagala palaibao. Tama tibaso, nago tede te eno ogwago we gegela sueibao. 
Tiali goli, te we nage dali asisąbaso da, teda nago enabolo te dąų wali po te pogo nage dali munu me kęalugobeo. Tiali goli, nago eno ogwa te eno page buluba me odasa pelamuo.” Te po wai. 
Tialima, sę ebo bidigo nogo guni sisu muyu, aga genuai bidi dali bomo yai po dąų wai. Agai po dąų waliyu, te Abrahamgo agabolo ya wali sę tigidali agai mu yaibao po walio. 
Tama sę ebo bidigo te Abrahamgo te nogo si kibu kamel me te maiabo wiegi yai nai hauwa sali. Tama agai te tigidali doado bage sisi ilama, tama te Nahor bidibo bulu te Mesopotemia teba palio. 
Aga digibulu pelama, teba sabolama, tama agai te kamel dabe te wę ulu pąde te bulu sesege badu pila mumainu yalio. Agai tama tiali, te we dabe augwaligo te wę tuagasobo sogo te be pio ebadi dao. 
Agai tama tiwai gedu haluasa po wali, “Yaweo, eno genuai bidi Abrahamgo God, nago eno sę megi wiegi yai ilao,” wai. “Nago te eno genuai bidi dali megi dwagi yai tau sabo sę emainogo eyu, tama ena tau mao. 
Ena e ulu ąį tubo pąde bidibadi, tama e bulu page wegi mani te augwali asama, wę tuagasaibao. 
Te eno wegi ogwa me deli dali te tiwai po waibao, ‘Ae, nago genuai botol aiyaba munama, te ena wę dwasianu tuaio,’ po waibao. Tama agai te po olama, ‘Nage te wę tuao, tama te eno nago kamel dabe me te wę mawaibao,’ tama obaso da, teda eno homugo nago sę bidi Aisakgo sabo we te tama da po waibao. Tama te tiwai pedalubaso da, teda eno koneyu, nago te eno genuai bidi dali dąų wali tau sabo po te mu tama usu nubao po waibao,” te tiwai gedu haluasa po wai. 
Sę bidigo te tiwai gedu haluasa po odubadi, tama Rebeka sabolalio. Agai te wę sabo botol aga nagede tolasa asali. Rebeka te Betuelgo wegi dao. Tama Betuel te Milkago ogwa dao, aga te Nahor tego we, te Abrahamgo ama dao. 
Te wegi ogwa we te gasa sawi yai mu tonani, tama aga te bidi dali me pisąwai. Tialima, aga te wę ulu tugi soyu, aiyaba dulama, tama edaba ma holalio. 
Tama te sę bidi aga pageba udulama, tama te po wai, “Ae, nago te botol węgo enanu dwasianu tuaio,” wali. 
Tama Rebekago te po wai, “Genuai bidi, nage tuao.” Tama polo agai te botol wę aiyaba mugulama, tama nogogo tolalubadi, tama aga tumainu yalio. 
Agai te wę tula silibo si, tama Rebekago po ma wai, “Te eno nago kamel dabe me wę menama, te augwali tulama, usu elama, pągąmainu yaibao,” wali. 
Tama polo agai te botol ąį habuge te masigi ąį gamia te kibu kamel dabego ąį tubo madi gelali. Tama aga ma udulama, te wę geninama sigi pedu geani, te tigidali kamel usu elama, mu pągąmainogo yai. 
Tama te sę bidigo po me wabeo. Agai tonalu naga yalio. Agai koneainu, Yawego te agai sę wiegi yai ilibowe naga koneainogo, tama tialio. 
Te kamel dabego wę tula silibo si, tama Abrahamgo sę bidigo agai te ring gol te gasa sawi yai mu selama, tama te Rebekago guniba muanio. Tama agai te golgo nigai nogo mo si te Rebeka nogoba holali. 
Tama agai te po wai, “Ae, nago enabolo walao. Nage te dego wegi dawe? Tama magi yaliwe? Te nago ayago be habu te usu yabo elalubawe, te ena eno hani dali bidabo madi te po obao.” 
Tama Rebekago te tiwai po wei ponani, “Ena te Betuelgo wegi da, aga te Nahor me Milka te bidi de we sigo ogwa dao. 
Awe, te kamel dabe pibo pesage wiegi yai elalubo, tama augwali tuabo nai me elalubao. Tama be dąį togwali habu me elalubo, tama dage tede bidiagameo,” wali. 
Tialima, Abrahamgo sę bidigo aga kidu sugunama, tama Yawebolo lotu po walio. 
Tama agai te po wai, “Dago Yawe nogi ugwaba sao, te eno genuai bidi Abrahamgo God dao. Agai te eno genuai bidibolo dąų wali po te mu usu nanio, te aga dwagi yai tau sabo kolesaga ebo me, te Abraham dali homu kolesaga kęą pai bidi kolesaga ebo me, te Yawego tagalobeo. Yawego te eno genuai bidi aga amago hanigo beba dolo ena sela asama, tagalagasali dao,” tama wali. 
Tialima, te wegi ogwa we aga udulama, te aga idago beba palima, tama tede bidali bage augwalibolo te tigidali sę yali po wai. 
Tama Laban, te Rebekago abe, agai te ring gol me, te golgo nigai nogo mo si me, te aga gunide walali me, te nogode holali suali. Tama agai odali, te bidigo yali sę po tigidali Rebekago pusali. Tama aga udayu, te bedu buluba teda solama, tama aga te Abrahamgo sę bidi me bididubo madi saboligi pai, aga te aga kamel dabe dali te ulu wę tubo pąde dolaludai. 
Tama Labango te po wali, “Abagio, Yawego te wiegi yai sę te nage dali yalio. Magi baso nage te bulude dolaludubawe? Da si beba pinao. Eno nage bidabo pesage dodolalio. Tama te kamel dabe me bidabo pesage usu yai elalubao,” wali. 
Tialima, te sę bidi aga dali pelama, te be tomoba pai. Tama Labango po aga sę bidibolo obaso, augwaligo te kamel dabego tudide munasa asali walu dabe sela munama, tama augwaligo te nosai me nai te augwali mani. Tama augwaligo wę te Abrahamgo sę bidi aga hani dali teba selasa pelama, te augwali sągą wę telamainu yalio. 
Augwaligo nai sela asali, tiali goli sę bidigo te po wali, “Eno nai asena polo tugobeo. Eno hasiabolo po pusaibao.” Tama Labango te po wai, “Te usu dao. Nago po weyu bolo yao.” 
Tialima, sę bidigo te po wali, “Ena te Abrahamgo sę bidi dao. 
Yawego eno genuai bidibolo wiegi yai mobo menama, tama aga genuai bidi nigilali. Yawego agabolo nai hauwa mani, te e nai dabe dao, sipsip, meme, bulmakau, silva me gol, sę bidi me, sę ebo we me, kamel me donki, te tama doado bage hauwa mawai dao. 
Tama aga we Sara aga te mosi dabe yai madi te aga ogwa ame nai. Tama eno genuai bidigo tigidali doado bage aga te ogwabolo mawai dao. 
Agai enabolo po bomo elama weyu, te po wai, ‘Nago eno ogwa we te Kenan dabe augwali tomode te we munu me gegelamuo. Menio. Nage pelama, tama eno hani, te eno ayago hani tomode digi, tede te we me deli gegelama, tama eno ogwa Aisakgo somainu yao,’ wai. Agai tama po obaso, tama eno te po wali peyu, tama ena aga dali po dąų wai. 
Tama eno ena genuai bidibolo tama tiwai po wai, ‘Tama te we ena dali ma asobo hagela homu ebaso da, teda magi yagawe?’ 
Tama agai te po wai, ‘Ena te Yawego po wali pabo bidi dao. Te agai aga mobo bidi ensel te nage dali tagala palama, tama nago sę wiegi yai bugagia ilaibao. Te nago eno ogwago we me deli te eno ayago hani tomode sesaibao. 
Te nago tama tibaso da, teda te dąų wali pogo te nage me kęalugobeo. Te nage eno haniba pelama, tama augwaligo nago po obadi usu da po wasiąyu da, teda te tiwai naga eyu, te dąų wali pogo nage me kęalugobeo,’ Abrahamgo enabolo te po wai.” 
“Megi e tama side, te bubugade ena te wę ulu elalubo madi pedelama, dolaludu, tama eno te tiwai gedu haluasa po oduali, ‘Yawe, te eno genuai bidi Abrahamgo God, nago eno sę te wiegi yai ilao,’ po wali. 
‘Megi ena te wę ulu tubo pąde bidibao. Tama te wegi ogwa we me deli te wę tuagasu asobode, teda eno te tiwai po agabolo waibao, “Ae, nago te botolde wę enanu dwasianu menama, ena tuaio.” 
Tama agai te po wabosi, “Nage tuao,” olama, “tama eno nago kamel dabe me wę mawaibao,” obaso da, teda eno homugo te we naga te nago sa muani we dao, te eno genuai bidigo ogwago we da homu yaibao.’ 
Eno gedu haluasa po udubadi, tama Rebeka sabolali. Agai te wę tubo botol te aga nagede tolasa, tama aga te wę ulu tugi soyu, aiyaba dulalio. Tama agabolo eno te po wali, ‘Ae, nago węgo enanu dwasianu menama, ena tuaio,’ te po wali.” 
“Tama polo agai te botol wę aiyaba mugulama, tama nogogo tolaluyu, tama po wai, ‘Genuai bidi, nage tuao,’ wai. ‘Tama eno nago kamel dabe me wę mawaibao,’ wai. Tama ena wę tuali silibo si, tama agai te kamel dabe me wę mani. 
Tama eno aga hanalu wali, ‘Nage dego wegi dawe?’ Tama agai te po wai, ‘Ena te Betuelgo wegi dao, aga te Nahor tego ogwa, aga ida Milka dao,’ te wegigo te po wai. Tama eno aga gunide te ring waliyu, te nogo side mo holiyu yai. 
Tama eno kidu sugunama, te eno Yawebolo lotu po wali. Tama eno Yawe nogi ugwaba sali, te eno genuai bidi Abrahamgo God. Agai te ena genuai bidi aga amago hanigo beba dolo ena odasa asai. Tama eno te wegi ogwa we gegali, te eno genuai bidigo ogwago sabo we sualio, te eno genuai bidi aga amago ogwago wegi dao. 
Megi te dagego te dwagi yai tau sabo kolesaga me, te homugo kęą pai kolesaga me, te eno genuai bidibolo yainogo homu eyu da, teda dagego po waiąo. Tama dagego homugo hagela homu ebaso da, teda dagego enabolo olama, tama ena homugo digi te mena sę yainu te ena tiaibao,” Abrahamgo sę bidigo te po wai. 
Laban me Betuel augwali sigo po wei ponoyu, te po wai, “Yawe aga digi te sę pedalumainu yali. Te dago po meni. 
Rebeka te bidibao. Nago aga selasa, tama naga pao. Aga te nago genuai bidigo ogwago somainao, te Yawego wali po tiwai gilama emainao,” te po wai. 
Te Abrahamgo sę bidigo te augwaligo wabo po odama, tama aga tobolu te tǫba basi gulama, tama aga Yawebolo lotu po wai. 
Tama tilama, nosali aga te haniani au dobage te silva me gol me, te gasa sawi yai gudubo ugwa me sobadi elama, te Rebekabolo mawai. Agai te haniani gasagi yai sawi yai dila pai nai dabe te Rebeka aga abebolo mobadi, te aga idabolo me mayu yai. 
Tama te po ola siminama, tama Abraham aga sę bidi aga hani dali te augwali nai tuyu, wę tuyu elama, tama augwali piali. Tama kigamu digi augwali hodaluama, tama Abrahamgo sę bidigo tama po wai, “Ena te ena genuai bidi bidiboba ma paibao,” wai. 
Tiali goli, Rebeka aga ida de aga abe sigo te po wai, “Te wegi ogwa we da dali te nogo si sogo bidimainu elama, tama nosali aga pomainu yaibao.” Te po wai. 
Tama Abrahamgo sę bidigo te tiwai po wei ponai, “Dagego ena dąų ola sigimio. Yawego eno sę wiegi yai ilama pedelai. Ae, te ena genuai bidi bidibo madi ma painu ebao.” 
Tama augwaligo te tiwai po wai, “Dago te wegi ogwa we i olama, tama agabolo te aga homu kolesaga hanaluinao,” wai. 
Tialima, augwaligo Rebeka i olama, asobosi, tama augwaligo aga hanalu wai, “Nage te bidi dali paibawe?” Tama agai te po wai, “Awe, te ena paibao,” wali. 
Tama tibaso, augwaligo augwa abe Rebeka aga tonalubo we dali augwali si te Abrahamgo sę bidi aga hani dali pomainu tama tagala palai. 
Tama Rebekabolo wiegi yai sę pedalumainu eyu, augwaligo te tiwai wai, “Abe, dena homugo te nage umabo bidi mugo ida pedelaibao. Te nago wąį hani augwaligo te augwa boi bidi aiyaba elaluama, tama augwaligo hanu dabe somainao” te po wai. 
Tama Rebeka dali, aga sę ebo wegi ogwa we dabe dali, augwali hogodama, tama augwali te kamelba duagulama, tama augwali te Abrahamgo sę bidi wali pai. Tama sę bidigo Rebeka oda selama, tama augwali te digibulu buluba pabo gagalali. 
Te Abrahamgo sę bidi agai te we gegeyu, tama digibulu mu peyu, digibulu ma asu, tama tibadi, te Aisak agai te bidi dabe augwali bidisiąwani badu taga soali, augwaligo te bulu nogi poali ‘Te ena subo Bidibo Ula Elalubo Bidigo wę ulu.’ Te nogi poai. Tama aga pelama, te Negeb pedai badu bidigi pai. 
Te nosali me sogo be pio ebode aga te nosai elalubo digi pebeli dilide biliduai, tama agai te kamel meba aselabo suali. 
Tama Rebekago Aisak sulama, tama aga te kamel daide dulaluali tagalama, aiyaba dulai. 
Tama agai te Abrahamgo sę bidibolo hanalu wai, “Te mena bidi da tiąba asobawe?” Tama sę bidigo te po wai, “Te eno genuai bidi dao.” Tama tibaso, Rebeka aga tobolude elaluali ugwa namego te aga gesabidi au palia sai. 
Tama ma sabolama, tama te sę bidigo agai yali sę po tigidali te Aisakbolo pusali. 
Tama Aisakgo Rebeka te aga ugwa beba odasa pelama, tama agai aga salio. Aisakgo te Rebeka godolo mu elama, tama aga homu wiegi yai ma yali. Polobadu te aga ida isibaso, tama aga homu dene eyu, homu sęgę elaluai dao. 
