﻿Tigidali Nai Gagalama Nigali Side.
50.
Josep aga aya bauba pigiluama, tama aga gela olama, tama agai aga gesabidide nono nani. 
Nosali Josepgo te aga dokta bidi dabebolo olama, te aga tigiba te tobage wel muao wali, te tigi polo me dolidali weyu tama tiali. Te dokta dabego te Josepgo wali po tiwai gilama yali. 
Augwaligo te tiwai sę te bidi sese si sogo, te 40 dei, te tama sogo yali, te tama sogo augwaligo te sę yali bodolu muani. Nosali te Isip bidi dabego Jekopde gela udubadi, te 70 sogo bidali. 
Te Josep aga ayade homu dene eyu, gela weyu yali te silibo side, teda agai te tiwai po te Ferogo ofisa bidi dabe dali wali, “Te dagego enade wiegi yai homu eba wida, teda eno e wabo po te dagego Ferobolo wagi pao, 
‘Te eno aya isainogo ebo sogo, agai enade po dąų walu, te eno aga te aga tigi te Kenande nigali gų pageba pubaligi pao po wai. Tama tibaso, nago ena tagala paloyu da, te eno aya bolo pubaligi pelama, tama nosali te ena ma asaibao,’ te po wao,” Josepgo te po wali. 
Ferogo te tiwai po wei ponani, “Nago te naga ayago nagebolo te po dąų wali gilama tama naga aya pubaligi pao,” wali. 
Tialima, Josep pelama, te aga aya pubaligi pali. Te tigidali ofisa bidi dabe, me te Ferogo bede bidalubo genuai bidi dabe, me te Isipde bidalubo tigidali tobolu bidi dabe me, augwali te Josep dali pepela wali. 
Te Josepgo we wai me, te aga ama dede me, te aga ayago we wai me, tigidali te augwali pali. Te dwasianu wai dabe naga te sipsip dabe dali, te meme dabe me, tama te bulmakau dabe dali, augwali te Gosen tǫde bidaludali. 
Te karis dabe me, te hos kibude bilibo bidi dabe me, augwali te Josep dali pepela wali. Tama te genuai hani dabe mu augwali pai. 
Augwali tama pelama, tama te wit penibo pesage te Jordan ąį u badu, te augwali Atat teba pedelali sogo, augwaligo te bobage sesabi ebo gela genuai te bidi pubalubo gela tiwai wali. Tama Josepgo te homu dene ebo kolesaga elama, tama aga gela udubadi, te a naga olama, me badu nogo si sogo bidali. 
Te Kenan bage augwaligo te Isipdu asali bage te Atat bulude gela me homu dene ebo sulama, tama augwaligo te po wai, “Te sę ebo te Isip dabego genuai gela weyu, te homu dene ebo kolesaga dao.” Tama tibaso, augwaligo te bulu nogi te Abel Misraim nogi yali. Te bulu te giliga pedalubo te Jordan badu elaluali. 
Te Jekopgo ogomanigo po wali pelama, te augwalibolo wali po tiwai gilama yali. 
Augwaligo aga te Kenan tǫba tolasa pelama, tama augwaligo aga te Makpela ola bede pubulali, te bulu te Mamre te giliga pedalubo badu elaluali. Abrahamgo te tǫ te Efrongo tǫ pedaide abelali, aga te Hit hani bidi me deli da. Agai te tǫ abelali, te gų page nigabo pesage abelali. 
Josepgo aga aya pubulama, tialima aga te Isipba te aga ama dede dali badi, te aga dali asali bidi dabe tigidali te Isipba ma pepela wali. 
Te augwa aya isalima, te Josep aga ama dedego augwa hasi te po wai, “Megi da, magi yaliwe, te Josepgo da dali te dago aga dali dwai sę yali te tigidali wei ponoyu, te da dali wado me udugowe?” 
Tialima, augwaligo te po Josepba ola tolali, “Te nago aya isisąbadi, agai te po dabolo mawai, 
‘Te Josepbolo wao, “Eno nagebolo hanalu wali, te naga ama dedego te dwai sę genuai yali, te sęgę nago sela sąyao,” ’ te po wai dao. Da te nago ayago Godigo sę bidi dao. Da nagebolo dwai sę yali. Megi, nago te dago yali dwai sę sela sąyao.” Josepgo te po wali odolama, tama aga gela udali. 
Nosali te Josep aga ama dede sabolama, tama augwaligo augwa tobolu aiyaba basi gulai. Tama augwaligo agabolo te tiwai po wai, “Da nageba pedelali, te nago olo sę ebo bidi bidaibao,” wali. 
Tiali goli, Josepgo te po augwalibolo wai, “Dage wi munu me elamuo. Eno te God tiwai gagalama, te dagego te dwai kolesaga yali te eno wei ponogobeo. 
Polobadu dagego ena dolabo homu dąų wali. Tiali goli, Godigo te dwai kolesaga begelali, tama agai te bidi hauwa bidibo ula elaluyu, tama augwali me hagaidali weyu, wiegi yai sę pedalumainu ilali. Tama tialigo da, megi te we bidi dabe bidaluali. 
Tialima, megi dage wi munu me elamuo. Te eno dage me, te dagego wai dabe dali, tonalueibao.” Josepgo te tobage wiegi yai po aga ama dedebolo menama, tama te pogo augwali homu bugagia tegaluali. Tama augwali wi munu me ma ebeo. 
Te Josep te Isipde aga ayago hani dabe dali bidali. Te Josepgo kibu be 110 elama, tama aga isai dao. 
Aga te gedu pedalu bidibadi, tama aga ogomani me subadi, te Efraimgo ame nani wai dabe me suali. Te Makirgo wai dabe ame nani sogode, Josepgo te aga hani wai tomoba sela muani. Makir te Manasego ogwa dao. 
Josepgo te tiwai po aga ama dedebolo wai, “Te sia sabode ena isaibao,” wai. “Tiali goli, te Godigo dage tonalueibao, tama agai dage e bulude bidali sela peyu, taga paibao. Tama agai dage odasa peyu, te Abrahambolo me, Aisak me Jekop, te augwalibolo mawaibao olama, te po dąų wali tǫba dage odasa tagaligi paibao,” wali. 
Nosali Josepgo te Israelgo ogwa dabebolo te mu po dao po wao po me deli te hanalu wali. Agai te po wali, “Dagego enaba po dąų waliyu, te God asiyu dage tau sabo sogode, teda dagego ena pubulali pesagede te ena tigi dili hodolama, tama dage peyu, te dili sela piąo,” wali. 
Josep aga kibu be te 110 elama, te aga isali. Augwaligo te bidi tigi damusiąbo te tobage wel dabe te aga tigi damudali weyu, te aga tigide muani. Augwaligo te tiwai Isipde elama, tama augwaligo aga tigi te gų page nigali halobage me deliba muani. 
