﻿Godigo Aga We Bidi Dabe Boi Bidi Nogode Ma Dobola Sali.
7.
Tama tialima, Genuai Bidigo Moses dali te po wali, “Odao, eno nage te God tiwai te tuni bidigo gedude nigiliyu, tama nago ama Aron, te nagede po sabo bidi tiwai nigilama, tama nago po agai te tuni bidibolo waibao. 
Tigidali nai po eno nagebolo wali, te po nago Aron dali wao. Tama agai te po te tuni bidi dali weyu, te agai te Israel hanigo te tuni bidigo tǫ tagalama, pomainao po waibao. 
Tiali goli, eno te tuni bidide iliyu, tama aga homu tomoba masigi sąwai bidi pedelaibao, tama agai te Arongo po odogobeo. Tama tibaso, eno genuai bomai sę hauwa te Isip tǫde yaibao. 
Tiali goli, te tobage bomai sę ebadi digi, tama te tuni bidi agai nago po odogobeo. Tama tibaso, eno te Isip tǫ dolama, augwali dene mu somainogo tiaibao. Tama ena polasa peyu, te Israel hani sibi dabe odasa peyu, augwali te eno we bidi hani, tama augwaligo te Isip tǫ mu taga paibao. 
Tama eno te Isip hani dali haniani dwai dene mabo, te sogo tama Israel hani odasa peyu, te Isip tǫ taga paibao, tama te sogo Isip hanigo koneyu, te Genuai Bidi Yawe aga digi te Israel hani odasa pabo homu emainogo tama tiwai dao,” wali. 
Tama nosali Moses de Aron augwali sigo te Genuai Bidigo wali po wali pelama, te sę tigidali yai. 
Te sogo Mosesgo kibu be 80 elalubadi, tama Arongo kibu be 83 elalubadi, augwali sigo te sogo te Isip tuni bidi po miai. 
Genuai Bidigo Moses de Aron si dali e tama wai, 
“Tuni bidigo dage sibolo te bomai sę meba agai suainogo, te sę yao po wabo si da, te eno dage si tagala palobao, tama Moses nago Aronbolo agai te bilibo dono selama, te tuni bidigo gedude tǫba sąyao. Tama te dono hasamani gagalama pedelaibao,” wali. 
Tama tibaso, Moses de Aron augwali si te Genuai Bidigo po wali pelama, te tuni bidi bidibo digi pai. Tama Arongo dono te tuni bidigo gedude, me te aga sę ebo bidi dabe gedude, Mosesgo dono tǫba sąwai, tama te dono hasamani pedelai. 
Tuni bidigo te tebo sulama, tama agai te tigidali po page koneai bidi dabe, me te haniani pobi wabo bidi dabe i olama, augwaligo me te pobi po olama, tama Arongo ebo kolesaga tiwai augwaligo me yai. 
Augwaligo me augwa dono sąbadi, tama hasamani gagawai, tiali goli Arongo hasamanigo augwaligo hasamani elama tuyu dalai. 
Tiali goli, tuni bidi aga homu kolesaga dąų ola sali, te Genuai Bidigo po wali gilama tama tiwai, tama Moses de Aron augwali sigo po odobeo. 
Tama Genuai Bidigo Mosesbolo te po wai, “Tuni bidi agai kolesaga te doyu, mu gagea pai eyu, tama agai te Israel hani pomainao te po wagobeo. 
Tama kigamu aga te ąį Nail tede nago aga gesabidi deliba sisinama sueibao. Tama nago te hasamani pedelali dono selama, aga te ąį sesegeba tonalugi pao. 
Tama nago tuni bidi dali te po wao, ‘God, da Hibru hanigo Genuai Bidi, agai ena tagala palali, nage te po omainogo, te agai we bidi te bidi meni yai buluba lotu po wagi pomainogo nago augwali tagala palao, te po wagasai. Tiali goli, megi nago te po odao. 
Tama megi Genuai Bidigo te po wai, “Nago eno ebo sę sulama, tama nago koneyu, ena digi ena te Genuai Bidi Yawe da, te po nago waibao,” Godigo te po nagebolo obao. Suao, eno donogo te ąįba elebode te ąį kaneme pedelaibao. 
Tama te sųgų dabe isilama, dwai kugumini mu yaibao. Tama Isip we bidi augwaligo te ąį tubo usugobeo,’ te po agabolo wao,” Godigo te po Mosesbolo wali. 
Tama Genuai Bidigo Mosesbolo te po ma naga weyu, te po wai, “Aronbolo agai dono sao te po olama, tama agai te donogo te genuai ąį, me te tigidali ąį gamia, me te tigidali Isip tǫde elalubo sigi ąį tigidali nago te donogo sa muao. Tama te wę dabe kaneme pedelaibao, tama tigidali Isip te badu te pede poude kaneme naga elaluyu, augwaligo te kaneme ni namego me te botolgo te masigigo nigai me, te kaneme pedelaibao,” Genuai Bidigo Mosesbolo te po wai. 
Tama Moses de Aron sigo te Genuai Bidigo augwa si dali wali po wali pelama, te sę yai. Tama te tuni bidi dali, aga sę ebo bage meba dali, augwaligo gedude Arongo dono selama, te Nail moni pabo ąįba elali, tama te ąį tigidali kaneme pedelai. 
Tama te Nail ąįde elalubo tigidali sųgų isilama, dwai kugumini mu te ąįde yai. Tama te Isip we bidi augwaligo te wę tuabo usu egobeo. Tama kaneme te Isip tǫ tigidalide elaluai. 
Tama te kolesaga page osola subo Isip bidi dabe, augwaligo pobigo te Arongo ebo kolesaga tiwai yai. Tama tuni bidigo augwali sigo po odobe. Menio. Agai kolesaga gagea pai me elaluai, te Genuai Bidigo tama tiaibao te po wai. 
Tama tuni bidi aga beba ma pelama, te sogo yali sęde me agai homu midigi siyu hodalobeo. 
Tama te Isip hani augwaligo te ąį tuabo usu ebeo, tibaso augwaligo te wę sesegede dedage nigai, te tuabo wę tede sainogo yai. 
Tama te wę Nail dwai elalubadi, te a naga olama, me badu nogo si sogo tama bidai. 
