﻿Godigo Aga We Bidi Dabe Boi Bidi Nogode Ma Dobola Sali.
14.
Te Genuai Bidigo Mosesbolo te po wai, 
“Te Israel dabe augwalibolo te po olama, tama augwali ma geasa peyu pelama, tama te tamu ąį sesegede te bulu Pihahirot, tede te bidabo pesage nigao. Te bulu te Mikdol dali, te mama tamu ąį dali, te si tomode elalubao, te Balsefon bulu dolo si dao. 
Tama augwali tama tibaso da, teda te Isip tuni bidigo augwali soali gegelama suyu, te po waibao, ‘Te Israel hani augwali te pabo tų susiąma gegede biliyu, te masigi sane yai bulude olo bilama, tama augwaligo te badu tų taga pabo menio,’ tuni bidigo te homu yaibao. 
Tama eno te tuni bidigo homu hasegelama, tama agai dage pobeasa asomainogo yaibao. Tiali goli, eno aga te agai ami bidi dabe aiyaba elaluama, tama eno genuai nogi te sę ebode saibao. Tama Isip dabe augwaligo koneama, ena digi ena Genuai Bidi Yawe dao,” Genuai Bidigo te po wai. Tama po obaso, te Israel dabe augwaligo te Genuai Bidigo po odolama, augwali ma geasa pai. 
Tama te Isip we bidi dabego te Israel bage augwali wi pali po te tuni bidibolo wai, tama aga dali, te gavman sę ebo ofisa bidi dabe dali, augwaligo homu hasegelama, tama augwaligo te po wai, “Magi baso dago te Israel hani augwali tagala palaliwe? Tama megi da, augwaligo dago sę egobeo. Dago dwai geda mu muai dao,” te po wai. 
Augwaligo te po olama, tama tuni bidigo aga kibu hosgo kegela pabo hwįbo nai karis dali, te aga ami dabe augwali sai. 
Tama agai te bidi sese hauwa 600 te wiegi yai polasa peyu hwįbo nai karis dabe dali, te ami bagego gasa karis tigidali me, te agai karis tonalubo ofisa dabe augwali me selama, pai. 
Tama Israel hani augwaligo koneani, te Isip dabe augwali aiyaba elaluama, tama augwali dwagi yai homu dali pai. Tiali goli, Genuai Bidigo te tuni bidigo homu hasegelama, tama tuni bidigo augwali nosali polo pobeasa asai. 
Te Isip ami bidi dabego karis elaluai, tama te ami bidi dabe augwali te hosde duayu, tama ami bidi dabe meba tǫdu pali, tama augwali tigidaligo te Israel hani augwali pobeasa peyu, pai. Tama augwali te Israel bage bidibo pąba pedelai, te mama tamu ąį sesegede, te Pihahirot bulu pąde, te Balsefon bulu dolo si elaluali, tede pedelai. 
Tama te Isip tuni bidi aga ami dabe dali, augwali pąba polo asobo te Israel hani augwaligo suai. Tama augwali wi mu eyu, tama Genuai Bidigo augwali tau somainogo i wai. 
Tama augwaligo Mosesbolo te po wai, “Magi baso nago da e masigi yai kemi tǫ buluba olo odasa asaliwe? Nago da e olo bulude isimainogo yaliwe? Tama da te Isip tǫde bidibadi isigi sogo da, te usu igi dao. Te Isip bulude elalubo gų page te da usu igi dao. 
Dago te Isip taga soasiąbadi, tama dago nagebolo te tiwai sę pedelaiba, te po walio. Tama dago te po wai, ‘Da tagalama, da ede bidimainao, tama da te Isip dabego olo sę bidi bidimainao,’ te po wai. Tama da sę olo mu naga igi dao. Tama tiyu, da e olo masigi naga yai bulude isibo dwaibao.” Augwaligo te po wai. 
Tama Mosesgo augwalibolo te po wei ponoyu, te po wai, “Wibo tagalao. Bomonama dolaluyu, tama megi Genuai Bidigo dage tau selama, tigidali sę ebo suaibao. Tama megi dagego te Isip dabe subo, tiali goli nosali dagego augwali munu ma sugobeo. 
Odao, Genuai Bidigo dage tau siyu, hwįaibao. Tiali goli, duga digi magi sę me elamuo. Dagego pedauwali dąų naga wao,” wali. 
Tama Genuai Bidigo Mosesbolo te po wai, “Magi baso nago ena i wabo sę ebawe? Te Israel dabe augwalibolo te po weyu, augwali pomainao,” te po wai. 
“Tama nago dono ugwaba selama, tama te tamu ąį usu sao. Tama te wę si badu peda pelama, tama wa pai tǫ pedelama, tama Israel dabe augwali te tomodu pelama, te u badu pedalomainao. 
Tama eno te Isip bage augwaligo homu kolesaga te homu tomoba masigi sąwai bidigo homu tiwai ilama, tama augwaligo dage Israel dabe wali pobasa asaibao. Tama eno te tuni bidi aga karis dabe dali, me te hosde duawali ami bidi dabe tigidali, augwali aiyaba elaluama, tama eno te sę yalide te eno genuai nogi saibao. 
Tama eno te Isip dabe aiyaba elalubaso, tama augwaligo homugo ena digi te ena Genuai Bidi Yawe dao,” agai te po wai. 
Te Godigo Ensel Mobo Bidi te Israel hani dabe polasa pabo bidi, tama augwali tede tagalama, aga augwali nosali pai. Tama te Israel dabe pabo tedu polasa pabo pǫ, te me geasa te augwali tudi badu ma doligi sai. 
Tama te sogo hulide te pǫ te Isip dabe dali, te Israel dabe dali, augwali tomode dąį tiwai elaluai. Tama te pǫgo te Isip dabe augwali bidibo badu te be hulia sai mu elaluai. Tiali goli, te pǫgo te Israel dabe bidibo digi, te badu te ula elaluai. Tama tibaso, te sogo hulide te Isip dabe augwali te Israel hani pąba pabo te usu ebeo. 
Tama Mosesgo nogo ugwaba selama, tama tamu ąį hulide usu sai, tama Genuai Bidigo bomai wali te sia ge pedalobo badu asiyu pedelali, tama te waligo te tamu ąį te sia ponobo tiwai edubadi, tama be posai. Tama waligo te tamu ąį ma sela sąbode, tama tamu ąį tomode si peda pai. 
Tama tomode tǫ tigidali wa pai, tama Israel dabe augwali tedu uba pai. Tama te tamu ąį si dali si badu te be daga tiwai dolaluai. 
Tama tigidali Isip ami bidi dabe augwaligo te Israel dabe elainogo wali pobasa peyu, augwali me te tamu ąį tomodu pai. Te hos dabe, me te karis, me te hosde dua yali ami bidi dabe, tigidali hodobo pai. 
Tama Genuai Bidi te bobage pǫde me te siade bidiyu, tama te be posobo pąde agai te Isip ami bidi aiyaba tonono bilama, tama agai augwaligo homugo kolesaga te polobo bidigo homu tiwai ilama, tama augwali midigi dwai mu yai. 
Genuai Bidigo te augwaligo karis nadoba te tǫde dąų ilali, tama te karis dabe bomonama uda wainogo yali usu ebeo. Tama te Isip dabego te po wai, “Odiąo. Te Genuai Bidi Yawe aga hani Israel augwali tau siyu, da dali hwįbao. Da polo wi pinao. Dago augwali polo taga pinao,” wali. 
Tama tibaso, Genuai Bidigo Mosesbolo te po wai, “Nago nogo ugwaba selama, te tamu ąį usu sao, tama te ąį ma asiyu, te Isip ami bidi dabe dali, me te karis, me hos dabe me, augwali te ąįgo mesega sagasaibao,” wali. 
Tama Mosesgo nogo ugwaba selama, te tamu ąį usu sali, tama be posobode te ąį ma asiyu, tama te polobadu elaluali tiwai ma yai. Tama te Isip dabe augwali wi pabo usu sali, tiali goli augwali usu meni yai, magi basowe, Genuai Bidigo augwali tigidali te tamu wę tomoba popogolo pai. 
Tama te Isip tuni bidigo ami bidi dabe augwali te Israel hani wali peyu, te tamu wę tomoba pali bage, te wę ma asiyu, te Isip ami bidi dabe augwali mesega sai. Tama agai te ami dabe tigidali, me te hos, me karis dabe, augwali dali agai te węgo mesegelali, tama deli me bidibeo. Tigidali isai. 
Tiali goli, te sę pedalisiąbadi, te Israel dabe augwali te tǫ wai digi pali, tama te wę te be daga u badu me e badu elalubo tiwai yai, tama augwali pelama, te wę u badu hasia sabolai dao. 
Tama te sogo Genuai Bidigo te Israel dabe te Isip dabego nogode ma dobola sai, tama Israel dabe augwaligo te Isip isai bidi dabe te wę sesegede munalua pai suai. 
Augwaligo te genuai sę Genuai Bidigo eyu, te Isip dabe aiyaba elalubo suai. Tama Israel we bidi augwali wi elama, Genuai Bidi dologode bidiyu, tama augwaligo bomo yai homu agade dąų weyu, tama aga sę bidi Moses dali tiwai. 
