﻿Godigo Aga We Bidi Dabe Boi Bidi Nogode Ma Dobola Sali.
15.
Tama te sogo Moses dali te Israel dabe augwaligo tęąbi po me deli te Genuai Bidibolo e tiwai tęąbi wali, “Megi te eno Genuai Bidi Yawebolo tęąbi waibao, magi basowe, agai te genuai wąbi mu hwįnama, tama tede genuai wiegi yai nogi sai dao. Agai te hosde duawali bidi dabe dali, te hos dali, augwali te tamu ąį tomoba sąwai. 
Genuai Bidigo digi ena bomo ilali, tama eno tęąbigo aga nogi ugwaba saibao. Agai ena ma dobola sali, aga da te eno God mu dao, tama eno aga nogi ugwaba sobao. Tama aga te eno ayago God, tama agai genuai nogide eno tęąbi po waibao. 
Tama Genuai Bidi aga te boma pai ami bidi mu dao. Genuai Bidi Yawe naga te aga nogi dao. 
Agai te Isip tuni bidigo ami bidi dabe dali, te hwįbo nai karis dabe dali, augwali te tamu ąįba sąwai. Tama te tuni bidigo ami bidi dabego polasa pabo bidi kapten te wę tulama, tama te mama tamu węde isai dao. 
Genuai węgo augwali mesegai, tama augwali aiyaba mu dulama, te kemi masigi tiwai yai.” 
“Genuai Bidi, nago dolo nogogo bomo genuai elalubao, tama agai te boi bidi ągąlama, tama augwali mu mia sąwai. 
Te nago genuai bomogo digi nago naga boi bidi augwali aiyaba elaluai. Nago sębę te sia tiwai pedaliyu, tama augwali te wa pai nosa tiwai siago ulai. 
Nago te bomai wali hodolai. Tama waligo te wę bo ugwadu ilali, tama wę te obo tiwai dolo dolaluai. Tama aiyadu mu elaluali tamu wę dila pai pedelai.” 
“Te boi bidi dabe augwaligo te po wai, ‘Dago augwali pobelama, tama augwali dąų waibao. Tama dago augwaligo wiegi wiegi yai nai dena hanibolo dobola saibao. Tama tigidali nai dago sainogo yali nai te dago siyu naga yaibao. Tama dago augwali dali te poapi ge hwągo hwįnama, tama dena bomogo digi te dago augwali dolaibao.’” 
“Tiali goli nago mobo deli sogo naga ponani, tama tamu ąįgo Isip dabe mesega sai. Tama augwali aiyaba tomoba mu te tamu wę tomoba masigi dulubo tiwai yai.” 
“Genuai Bidi Yawe, mena gasa god bidibo te nago bomo tiwai dawe? Me deli menio. Nage te polalubo tuni bidi te nage ugwadu tama tigidali wiegi yai tedali mu dao. Tama niwai bidi te nage dali usu tiwai dawe? Me menio. Nago te bidigo isąwai bomai sę eyu, tama genuai sę ebaso, te we bidi augwali nagede wi mu ebo dao. 
Nago dolo nogo dodolobode tama tǫ dedage elama, tama te boi bidi dabe augwali te tǫ dedagego dalai.” 
“Tama nago da homu dene eyu, tau sabo silisiąbo kolesaga eyu, tama nago da ma selama, tama nage polasa peyu, da odasa pai. Tama nago bomogo digi da pabo dodolama, tama nago da te naga digi bidainogo yali wiegi yai buluba odasa pai. 
Tama meba tǫde bidibo bage augwaligo te sę yali po odolama, tama augwali wi mu eyu, tama augwali noma saibao. Tama te Filistia bage augwaligo me te po odolama, wi mu yaibao. 
Tama Idom tǫde bidibo genuai bidi augwali wi mu yaibao. Tama Moap bomai bidi dabe augwali didibili mu yaibao. Tama Kenan dabe augwaligo bomo te olo wę ayana pabo tiwai yaibao. 
Genuai Bidi, nago genuai bomo augwaligo sulama, tama genuai wigo augwali mesegelama, tama augwaligo magi sę me deli yabo usugobeo. Augwali te ni tigi tiwai, olo naga dolalubadi, tama naga we bidi da ela soala silibo usu yaibao. Genuai Bidi, nago da Isipde ma sela asaligo tama da olo bugagia bidaibao. 
Tama nago da odasa asiyu, te da naga bulu dude bugagia dualama bidimainogo yaibao. Tede te naga digi naga be sęwai dao, te bulu nago nogogo digi bugagia dodolama muai dao. 
Tama Genuai Bidi nage tuni bidi sesemane sogo bidada paibao.” Moses agai te Genuai Bidi Yawebolo te tęąbi po wai. 
Te mama tamu ąį te tǫ wa tiwai pedelai tiwaidu tama te Israel dabe pelama, u badu pedelalio. Tiali goli, Isip tuni bidigo ami bidi dabe dali, te hos dali, te karis me, augwali te Israel dabe augwali wali asai, tama Genuai Bidigo te tamu ąį ma asomainogo ilama, tama augwali te węgo mesega sai. 
Tama nosali, Genuai Bidigo po pusubo we Miriam, te Aron aga abe, agai te dwasianu kilikili wabo habili tiwai nai musik sali, te tigidali we dabego me te tobage habili tiwai nai musik selama, te Miriam pabo wali pai. Tama augwaligo te musik dabe eliyu, tęąbi eyu, tigi bebege eyu, danis me yai. 
Tama Miriamgo tęąbi e tiwai augwalibolo wali, “Genuai Bidibolo tęąbi wao, magi basowe, agai genuai wąbi mu hwįani aiyaba elaluai. Agai te hos dabe dali, te hosde duayali bidi dali, augwali te tamu ąį tomoba sąwai dao.” 
Nosali Mosesgo Israel dabe augwali te mama tamu wę tagalama odasa pali, tama augwali te wa pai ni meni yai bulu Sur tedu pai. Tama augwali sela sogo te wa pai nai meni yai buludu pai, tama augwaligo wę me subeo. 
Tama nosali augwali te ąį me elalubo bulu me Mara teba pedelali, tiali goli te wę dwai ha pedauwalide ebo wę, tama augwaligo te wę tuabo usugobeo. Te Mara nogi page e tiwai, te pedauwalide ha ebo nai dao. 
Tama te we bidi augwaligo wado po weyu, tama po hauwa Moses dali weyu, tama augwaligo agabolo te tiwai po hanalu wai, “Te dago magi nai tuguwe?” 
Tama tibaso, Mosesgo gedu haluasa po bomonama, Genuai Bidibolo wali, tama Genuai Bidigo aga ni me deli ola mani. Tama Mosesgo selama, te węba sąwai, tama te wę wiegi yai pedelai, tama augwaligo tuabo usu yai. Te bulude Godigo te Israel bagebolo bomo yai po meba augwaligo te po wali pomainogo mawai, tama me agai augwali usu sela suali, te augwaligo aga wali asobowe naga suainogo yai. 
Tama Godigo augwalibolo te po wai, “Dagego eno po bugagia odao, te dagego God Genuai Bidi, tama te sę dabe ena digi te dwagi yai sę da homu ebo, tama dagego eno bomo yai po tigidali wali piąo. Dagego tama tibaso da, teda eno dagebolo te haniani dwai gasi te Isip we bidi augwalibolo yali te tiwai dagebolo me magobeo. Ena digi ena te Genuai Bidi dao. Tama eno naga te dagego gasi dabe usu ma ilibo dao,” wali. 
Tama nosali Israel dabe augwali te Elim buluba pedelai. Tama Elimde wę ulu pedalobo dedage nogo si olama sągągo si, tama ni bidi sese sela olama nogo si, 70 ni det elaluai. Tama Israel dabe augwaligo augwa name ugwa be dabe te wę ulu dedage pąde dodolama, bidai. 
