﻿Godigo Aga We Bidi Dabe Boi Bidi Nogode Ma Dobola Sali.
21.
Tama Genuai Bidigo po me wadolama weyu, te po wai, “Nago te po tų dodolabo bomai po te Israel we bidi augwalibolo mao. 
Bidi me deligo te olo sę yabo bidi me deli te duga Israel hanide me abelebaso da, teda agai te bidigo sę te kibu be 6 kibu bede te sę yaibao. Tama te kibu be 7 wabo, te kibu be delide te aga pomainogo tagala palao. Tama hasia agai mone meba mobaso, te sigio. Mu menio. Aga olo mu pomainao. 
Tama aga te we sisąbadi te sę ebo bidi pedelai baso da, teda agaduba deli naga pomainao. Tiali goli, hasia aga we bolo selama asai yai baso da, teda agai te sę ebo taga pabo sogo, te aga we dali sela pomainao. 
Tama te bidi aga dali sę yali bidigo we menama, tama te wego wai dabe ame nai baso da, tama te we me, te wai dabe dali, augwali te aga sę yali bidi dali bidaibao. Tama bidi naga aga te sę yali tagalaibao. 
Tiali goli, te sę bidigo te po weyu, ‘Eno ena genuai bidi godolo mu yali, tama ena we me wai dabe godolo elama, tama eno augwali taga pabo hagela homu ebao,’ te po obaso da, teda aga genuai bidigo aga te po tų dodolabo beba selasa pao. Tama te sę ebo bidi te be tųde elalubo pos nide dolalubadi, tama aga genuai bidigo te nel selama, te sę bidigo olo podolama, dedage nigilao. Tama aga te genuai bidigo sę olo ebo bidi bidada pelama, tama aga isiyu, te sę tagalaibao.” 
“Tama bidi me deligo masigi dabe sabo homu eyu, tama aga wegi muyu, Israel hani gasa bidigo te wegi abelebaso da, tama te kibu be 7 wabo kibu bede te genuai bidigo te we tagala palagio, tama agai te sę bidi dali hasia yali tiwai kolesaga naga yai. 
Tama te bidigo te we te olo sę yabo we tiwai abelebaso da, tama hasia agai homugo te we sainogo yai, tiali goli nosali agai te we sabo homu isąyu da, teda te we aga ayago ma abelama, somainao. Te bidigo te we dali te doloba pai kolesaga ebe, tama agai te we te gasa bulu bidigo abelemainogo elamo dao. 
Tama agai te we aga ogwabolo mawainogo homu eyu da, teda agai wiegi yai sę aga dali ilama, te aga wegi dali ebo kolesaga tiwai gilama te we dali me tama tiao. 
Tama te genuai bidigo gasa we siyu da, teda agai te hasia sali te olo sę ebo we te bugagia tonaluao. Agai te we nai mayu, te ugwa me mayu elama, tama aga te we dali piyu, te agai polobadu yali tiwai gilama yao. 
Tama agai te tobage sę sela te we dali isąyu da, teda agai te we pomainogo tagala palama, tama te wego agabolo te mone meba magio,” wali. 
“Bidi me deligo gasa bidi bomonama elai digi, tama te bidi isai baso da, teda dagego te bidi elali te bidi aga me ela muao. 
Tiali goli, agai homugo te bidi mu ela muabo homu isąyu da, tiali goli agai geda muyu naga te bidi elama, nosali aga isimainogo yai, tama te bidi elali bidi aga wi pomainao, te bidigi wi pabo buluba, te eno dagebolo sa muaibao, tama tede aga bugagia bidaibao. 
Tiali goli, bidi me deli agai gasa bidi dali sębę eyu, aga ela muabo homu ebaso da, tama nosali agai tama tiyu da, teda dagego aga digi ela muao. Te aga eno nai ulubo alta teba aselama, bugagia bidabo homu ebo tagaliyu, te dagego aga selasa pelama, aga ela muao.” 
“Mena bidigo aga aya, ma aga ida si elebaso da, teda dagego te bidi aga ela muao.” 
“Tama bidi me deligo aga abagi me deli wi selama, tama aga sę ebo bidi bidimainogo yai, ma agai gasa bidigo te bidi abelemainogo eyu da, teda dagego te tiwai kolesaga ebo bidi ma suyu, dąų olama eyu, tama aga ela muao.” 
“Niwai bidigo aga aya de ida si dali wado po weyu, dwai dolabo bomai po wabo bidi, teda te bidi aga dagego ela muao.” 
“Bidi me aga si wado po olama, tama bidi me deligo nogo sugunama, tama gasa bidi me elali, me ma masigi selama elali, tiali goli agai te bidi aga mu ela musiąyu da, teda dagego te bidigo yali dwai sę wei ponogio. Tama elama, tigi dolai bidi aga te betide pila munama, tama nosali aga dono tulama, be bulu badu bilibaso, teda te elali bidigo te mone wei agabolo mao. Te monego agai sę te tigidali sogo isąwani te usu nao. Tama te bidi elali bidi aga te bidi bugagia tonaluama tama, tama aga tigi usu ma ebo si te usu dao.” 
“Tama bidi me deligo wąbi selama, tama aga sę ebo bidi me, te aga sę ebo we me elama, tama aga te elali sogo dolo isibaso da, teda dagego te genuai bidi agabolo te dene mu ilao. 
Tialima, te bidi ma te we te deli sogo, me ma si sogo bidilama, tama nosali aga isibaso da, teda dagego te aga genuai bidibolo dene iligio. Magi basowe, sę ebo bidi, ma te sę ebo we, te bidigo digi te aga sę dao, te abelai mone te olo hagawai baso, te aga sęgę dao.” 
“Tama bidi meba wąbi hwįyu, tama bidi me deligo te wai tabi elalubo we elali, tama te wai dolama, te wego te wai polo ame nani, tiali goli te wai ame nani ida te dolisiąbaso da, teda te we elali bidigo te we page bidigo wabo po odama, tama agai te dwai sę yali dodoluyu wei begelama, te mone mao. Tiali goli, po tų ebode te mone sabo po usu da po weyu bolo elama, tama nosali te we aga bidigo te mone sao. 
Tiali goli, we ma aga wai tigi dolai baso da, teda dagego te bidibolo me te tiwai kolesaga naga wei ponao. Ma, te we isai yai baso da, teda dagego te we elali bidi aga ela muao. 
Tama te gedu, me ma te kele, me te nogo sągą dolai baso da, teda te tiwai kolesaga naga te aga dali wei ponao. 
Tama me ma, agai te we siago, me ma te we tigi dolama, te keni me te keloago elai baso da, teda dagego te bidibolo te tiwai sę naga yao.” 
“Tama bidi me deligo aga sę ebo bidi ma te aga sę ebo we te geduba elama, tama te gedu dolobaso da, teda aga te bidigo sę bidi ma, te sę ebo we ma, te sęde bidigio. Te bidigo te genuai bidi taga pao, te aga gedu dolali dali wei si ponao. 
Tama agai te sę ebo bidi me te sę ebo we me te elali digi, tama aga kele degebaso da, teda agai te sę ebo aga tagalao, te aga kele degali dali wei si yao.” 
“Tama bulmakaugo te bidi me deli, ma te we me, te agai gąųgo ela mubaso da, teda te bulmakau dagego ela muao. Tiali goli, dagego te bulmakaugo mi tugio. Tama dagego te bulmakau aga aya po tų ela magio. 
Tiali goli, te bulmakaugo te we bidi augwali te gąųgo eniyu ebaso, tama te we bidi augwaligo po bomonama te bulmakau page bidi dali wali digi, tama te bulmakau page bidigo te obo isąbaso da, teda dagego te tiwai kolesaga yao. Tama te bulmakaugo bidi me deli, ma te we me, ela mubaso da, teda dagego te bulmakau ela muyu, tama te bulmakau page bidi me ela muao. 
Tiali goli, po tų ebode te po obaso da, agai te isali bidi ma te we te aga hanibolo te bulmakaugo dwai sę yali me te aga dali te si ma abelama, tama te mone aga hanibolo mao. Tama tibo si, te aga isigobeo. Agai aga digi bidibo ula ma abelemainao. 
Tama te bulmakaugo te wai puluba, te ogwa me, te wegi me, elebaso da, teda te tiwai bomo yai po naga dagego wali piąo. 
Tama te bulmakaugo te sę ebo bidi ma te sę ebo we elebaso da, teda te kibu page bidigo te monego K300, te sę bidi ma te sę we te aga genuai bidibolo te mone menama, tama dagego masigi sąnama te bulmakau ela muao.” 
“Tama bidi me deligo te tǫ dedage haluali nai sela sąwani, ma agai genuai tǫ dedage nigilama halusiąwai, tama bulmakau me deli, ma te bidi duabo donki, te dedageba tulaluama isibaso da, 
teda te tǫ dedage nigali bidigo te kibu page bidi abelao. Tama te isali kibu aga somainao.” 
“Tama bidi me deligo bulmakaugo te gasa bidigo bulmakau ela mubaso da, teda te bidi si me bidigo te bidibo bulmakau te gasa bidigo abelemainogo elama, tama te bidi augwa si te mone selama, tama te isali bulmakau mi, te augwa si dobola sao. 
Tiali goli, te bulmakaugo hwįbo bulmakau yai baso, te kibu page bidigo obo bugagia isąwai yai baso da, teda agai gasa bulmakau te isali bulmakau page bidibolo wei ponao. Tiali goli, agai te isali bulmakau te bidi aga somainao,” wali. 
