﻿Godigo Aga We Bidi Dabe Boi Bidi Nogode Ma Dobola Sali.
23.
Tama Mosesgo Genuai Bidigo po pusuyu, te tiwai po wai, “Tama dagego te magi nai po me deli pedelali te po odoyu, tama te mu po meni homu eyu da, teda dagego te sę yali po subigila ola biligio. Tama bidigo te dwai kolesaga ebaso da, teda dagego aga tau siyu, te po tų ebode tibo po wagio. 
Tama bidi hauwa augwaligo te dwai kolesaga ebaso da, teda augwaligo te ebo kolesaga wali pigio. Ma, augwaligo te po tų ebode augwaligo tibo po weyu, te po tų dodolobo sę doloyu eyu da, teda augwali dali deli homu eyu, augwaligo te ebo kolesaga me wali pigimio. 
Tama bidi mebago te magi nai meni yai bidi po tų ela mainogo, tama augwaligo dage te sę ebo suali tiwai po omainogo dage i obaso da, dagego te magi nai meni yai bidi tau siyu, te po mesegelama tibo po wagio.” 
“Tama dagego duga boi bidigo te bidi dualasa pabo donki, ma bulmakau te obo tagalama wi pai yai subaso da, teda dagego selama, te bidi agabolo ma magibao. 
Tama dagego boi bidigo te donki, ma te bulmakau te walu dali tula muai elalubaso da, dagego te boi bidi tau selama, aga ma hodolao. Dagego aga te tǫde pila mumainogo tagaligio.” 
“Tama te magi nai meni yai bidigo magi nai me delide po tų yagasobaso da, dagego agai po tų ebo mesegelama, aiyaba elalugio. 
Dagego gasa bidi tibo pode po tų ela magio. Tama doloba pai bidi agai dwai kolesaga me isąbadi, tama augwaligo aga po tų olo mu ilibaso da, teda dagego aga ela mugio. Magi basowe, te tiwai dwai kolesaga ebo bidi eno aga po tų ilama, tama aga hagawaibao.” 
“Tama bidigo dage homu bega siyu, te po tų ebode tibo po omainogo te mone mobaso da, dagego te mone sigio. Magi basowe, te tiwai kolesagago te wiegi yai bidigo homu te tibo po wabo bidi tiwai pedelama, tama te dwai kolesaga isąwai bidigo po tų ebo aiyaba mesegelaibao.” 
“Dagego bulude bidibo gasa bulu bidi dali dagego dwai kolesaga me igio, magi basowe, polobadu dage te Isipde bidibadi, te aga tǫ mude bidisąbo we bidi ebo kolesaga te dagego bugagia koneai dao.” 
“Dagego gide nai bulama tuyu, tama te kibu be a naga olama nogo me badu deli, te kibu bede te nai bulama siyu, beba sisinao. 
Tiali goli, te kibu be 7 wabo, te kibu be me delide dagego nai bulisąma, te tǫ toma tuyu, olo elalumainao, tama dagego te tǫde olo pedalobo nai sigio. Tama te wain gide me, te ni du oliv gide me, dagego te tiwai kolesaga naga yao. Tama te magi nai meni yai bidi dabe augwaligo naga te gide olo holobo nai siyu, tama te magi nai meni yai bidi dabego sisąma tagalali nai me badu, te uni hasa dabego tula silimainao.” 
“Tama tigidali Sarere dagego sę te nogo a naga olama me deli, te tama sogo dagego sę eyu, tama te a naga olama nogo me badu si wali, te me deli sogo dagego sę igio. Tama tiyu da, te donki dabe, me te bulmakau, me te sę ebo bidi dabe, me te sę ebo we dabe, me te dage dali bidibo gasa bulu bidi augwali me, te toma tuyu, tama bomo ma saibao.” 
“Tama dagego eno te mabo po tigidali bugagia odolama, wali pao. Tama dagego tibo godibolo te gedu haluasa po me wagio. Tama dagego augwaligo nogi me wagio. Habu mu dao,” te po wali. 
“Tama deli deli kibu bede sela sogo dagego genuai lotu enaba wabo bodolu muao. 
Tama dagego te Bo Disiąwai Nai Bret te genuai side te me bodolu munama, tama sisinama, lotu po wainogo, te eno wali po gilama tiwai yao. Tama dagego te bo disiąwai nai bret te a naga olama nogo me badu si, te tama sogo polua nogi Abip, te sogode te nai tuabo bodolu muai dao. Magi basowe, te poluade naga dagego te bulu Isip taga soai. Tama dagego enaba lotu po wagasainogo da, dagego te ofa yabo nai deli me selasa asiąo.” 
“Tama dagego te wit tau yali gagalama hasia bolo nai sabo sogo, tama dagego enabolo usu da po weyu, tama wiegi yai homu te nai tuyu yabo, te sogo genuai bodolu muao.” “Tama dagego te genuai side te poluade te nedu du tau ebo sogo, te me bodolu muiąo. Tama te sogo dagego te wain gide te wain du siyu, osogo bidabo dwasianu be sęnama, tama te bede bidiyu, te wain me, oliv ni du dabe me, te gide siąo.” 
“Ena God, dagego Genuai Bidi, tama eno te kibu be deli delide sela sogo lotu wabo bodolu muani, tama te tigidali bidi dage aselama, enaba lotu po te sogo wagasiąo.” 
“Dagego te kibu sipsip me bulmakau enaba ofa ebo sogo, dagego te bo dai yis elalubo bret dali ofa igio. Tama dagego te ofa ebo kibu ili dabe tigidali te siaba ulama, tama dagego te nosali kigamu ofa yabo me tagalama elalumainogo igio.” 
“Tama dagego te polasa mu tau yali wiegi yai nai mu te gasa nai elalubadi, te nai dagego Genuai Bidi God eno beba sela pao.” “Dagego te meme ame pę te seneba munama, tama te memego digi wai elama, aga tigi mi te seneba munama, ulama tugio.” 
“Odiąo, te eno sę ebo Ensel Mobo Bidi tagala palama, polasa peyu, tama dage tųdu pabode tonalua paibao. Tama agai te dage eno mawainogo sisi yai elaluali te bulu tǫba odasa peyu, teba sabolaibao. 
Tama dua dao, dagego agai po bugagia odolama wali pao. Dagego agai po sela sągio, magi basowe, ena digi ena aga dali mu bidiyu, tama agai te po sela sąbo we bidigo dwai kolesaga te sela sągobeo. 
Tialima, dagego agai po wali pelama, tama eno te po wali sę tiwai tigidali ebaso da, te eno dagego boi bidi dabe augwali dali hwįnama, tama te dage dene mabo homu ebo bage me, te eno augwali aiyaba elaluaibao. 
Eno sę ebo Ensel Mobo Bidi agai te dagego polasa pabo bidi pedelama, tama dage te Amor dabe, me te Hit dabe, me Peres, me te Kenan dabe, me te Hivi dabe, me te Jebus dabe, te hani augwaligo tǫba dage odasa pelama, tama eno augwali hani mu ela silaibao. 
Dagego augwaligo tibo godiba kidu sugunama, lotu wagio. Tama dagego augwaligo lotu wabo te kolesaga sigio. Dagego augwaligo te tibo god dolama, tama augwaligo te lotu wabo masigi dabe pepedela sąyao. 
Tama dagego lotu po enaba naga wao. Ena God, dagego Genuai Bidi dao. Dagego tama tiyu da, te eno dage wiegi yai iliyu, tama dage nai me te wę me mayu, tama dage gasi dabe me tigidali sela sąwaibao. 
Tama eno te wai haliga elalubo we dabego wai bugagia ame nomainogo yaibao. Tama eno te bidigo sai wego tabi dąų me walogobeo, te tigidaligo wai ame nomainogo yaibao. Tama dage polo me isigobeo. Menio. Te eno dage tigidali e tǫde bobobage sogo bida waibao.” 
“Tama ena dage pabo digi polasa peyu, tama eno te boi bidi dabe augwaliba wi genuai ilama, tama eno augwali homu didibili ilaibao. Tama eno augwali dagede wi ilama pomainogo yaibao. 
Tama eno te bidi gąų kelebo nai nenemo dabe polasa tagala palama, dage nosali asobadi, tama augwaligo te Hivi dabe me, te Kenan dabe me, te Hit dabe me, te hani augwali sela sąmainogo yaibao. 
Tiali goli, eno augwali te kibu be delide naga sela sągobeo. Eno tama tiyu da, te tǫ olo elalubo digi te bulu uni hasa dabe hauwa tede pedelama, tama dage dolidalio. 
Te eno boi bidi dabe augwali dua dua digi sela sąyu, tama dage hauwa pedelama, tama dagego te tǫ tigidali usu na silao.” 
“Tama eno dagego tǫ dąį e tiwai ilaibao, te wę sanede, te mama tamu ąį badu, te Akaba tǫ te badu pelama, te tǫ tomode elalubo genuai tamu ąį Mediterenian teba sabolama, tama genuai wę Yufretis te badu peyu, te masigi kemi elalubo badu teba te dąį sabolaibao. Tama eno bomo dageba menama, tama te tǫde bidibo hani augwali aiyaba elaluama, tama dage te tǫ tomoba peyu, augwali sela sąwaibao. 
Tama dagego augwali dali po dąų weyu, me ma augwaligo tibo god dali me te tiwai kolesaga igio. 
Dagego augwali te dagego tǫde bidimainogo sula tagaligio. Tama tiyu, augwaligo dage dwai kolesaga tomoba kegeyu, tama enabolo sęgę ilidalio. Tama dagego augwaligo tibo godiba lotu weyu da, te dage tulaluama, tama mu dolaibao,” wali. 
