﻿Pris Sę Ebo Bomai Po.
8.
Te Genuai Bidigo Mosesbolo e tiwai po wai dao, 
“Te Aron me aga ogwa dabe dali selama, te eno sel Ugwa Be sunumiba pao. Te pris dabego gudubo ugwa me, te sęde augwali dąį ilibo wel me somainu elama, tama te bulmakau omai me deli, me sipsip omai si, te sęgę sela sąyu ofa yabo nai selama, te basket wa me delide te yis meni yai bret pągąnama, tama te nai dabe me te sel Ugwa Beba selasa pao,” wali. 
“Tama nosali tigidali we bidi te sel Ugwa Beba asomainu i wao,” wali. 
Tialima, Mosesgo Genuai Bidigo po odama, te tama sę yali. Tama tigidali we bidi sisinagasali. 
Tama Mosesgo augwaliba walali, “Eno megi e yainogo ebo sę da, te Genuai Bidigo enabolo te sę yao po polobadu obaso ebao.” 
Tialima, Mosesgo Aron aga ogwa dabe dali selama, te we bidi augwali geduba dodolagaselama, tama agai augwali ąįgo paluali. 
Tama agai te holobo ugwa Aronba bolo gudulali. Tama agai te bobage name ugwa te Aron tabidu belali. Tama Mosesgo bobage aiyaba tagalalubo ugwa te genuai name ugwa Aronba gudulama, te welia kukulu au yai selama, te genuai ugwago te Aron tabidu soani kekalio. 
Tama agai te dwasianu name ugwa Arongo hagawiade kekelama, tama te Godigo homu kolesaga konebo masigi si muani, te ugwa agebele poketde muai elaluai dao. 
Tama agai bobage ugwa me deli te Arongo tobolude bagulama kęnani. Tama agai te dwasianu nai medal gol selama, Aron te Godigo bidi mu da olama dąį ilu, te ugwa name Arongo gesabidide ugwadu daganani. Mosesgo te sę dabe te Genuai Bidigo agabolo po wali gilama yai dao. 
Nosali Mosesgo te Godigo nai dabe dąį ilainogo te wel selama, te Godigo sel Ugwa Bede pilibadi, te be tomode elalubo nai tigidali me pilali. Tama te tiali kolesagade te nai doado bage dabe te Genuai Bidigo nai dolo da weyu, tama tiali dao. 
Tama agai te wel habu selama, te nogo a naga olama, me badu nogo si sogo te altaba sąwani, te altade sę yabo doado bage me, te wę paubo moni genuai disba me agai tebolba tama tialio. Te tiali kolesagade agai te nai dabe te Genuai Bidigo nai mu da weyu dąį iliyu tiai dao. 
Tama agai wel ąį dwasianu te Aron toboluba gelali, te tiali kolesagade te Aron te Genuai Bidigo pris mu tiwai da olama dąį ilai dao. 
Nosali Mosesgo te Arongo ogwa dabe sela asama, augwaliba te holobo ugwa gudulama, tama agai te bobage name ugwa pedai te kukulu tiwai augwaliba belama, te augwali tobolude name ugwa kęnani, te Genuai Bidigo wali po tiwai gilama yai dao. 
Te silama da, tialima Mosesgo te bulmakau omai te bidi augwaligo te sęgę sela sąbo ofa yainu sela asali, te Aron aga ogwa dabe daligo te bulmakau toboluba nogo mumainao wali. 
Tama nosali Mosesgo te kau kibu elama, te aga kaneme salio. Agai te kaneme dwasianu te nogo dani delide selama, te alta bogo me si me si badu te komde muna muna pali. Te kolesagade agai te alta God gedude wiegi yai tedali mu pedalumainu ilai dao. Nosali te elaluali kaneme tigidali selama te alta aiyaba dogwa saliba gelali, te tama kolesagade te alta te Godigo mu da olama, habu seliyu, te dąį tiwai ebao te po wali. 
Tama Mosesgo te kibu kau haliga bealubo kibu ili delegabe tigidali sobadi, te hasia polalubo dini homu te wiegi yai sobadi, te si wali homugo si siyu, te ili dali selama, tama agai te nai dabe altade ulama, te keli naga elalu yai dao. 
Tama agai te kibu kau pedai dage me badu dali, te wali me, kibu mi me, te haliga me, tigidali selama, te pesage nigali buluba sela soali. Tama agai te sia nogonama, te kau kibu ulama, te siago tigidali dela silai. Agai te Genuai Bidigo agabolo wali po gilama tama sę yai dao. 
Nosali Mosesgo te sipsip kibu omai si elaluali te me deli agai sela asali. Te isigo tigidali dela silabo ofa yabo sipsip dao. Tialima, Aron aga ogwa dabe daligo te sipsip toboluba nogo muai dao. 
Tama nosali Mosesgo te sipsip ela munama, te sipsip kaneme selama te alta pedai me si me si badu sąsągą bilai dao. 
Agai te kaneme sąsągą bila silibo si da, teda agai te sipsip kibu sikilama, te haliga bono dabe me, te kibu sipsip sągą si me ąį telawali. Te nosali agai te kibu tobolu me ili me te sipsip kibu delage tigidali selama, te altaba munama, te tigidali siaba ulama, te keli naga elalueibao. Agai te Genuai Bidigo po wali gilama yali. Te siago tigidali dabo ofa ebo sipsip te sipsip ofa ebaso, te Genuai Bidigo te denami odama, te bugai haliga eyu yai dao. 
Tialima, Mosesgo gasa kibu sipsip omai sela asali, te bidi pris sę emainogo dąį eliyu ofa ebo sipsip. Te Aron aga ogwa dabe dali augwaligo te sipsip toboluba nogo muai. 
Tama nosali Mosesgo te kibu sipsip elama, te dwasianu kaneme selama, te Arongo dolo olo aiyaba muani, te dolo nogode te a wabo nogo danide, me te dolo sągągo te a wabo sągą danide pilibadi yai dao. 
Nosali agai te Arongo ogwa dabe sela aselama, te dwasianu kaneme te augwaligo dolo olo badu aiyaba muani, me te dolo nogo te a wabo nogo danide mubadi, te dolo sągą te a wali sągą danide muyu yali. Tama agai te me badu elaluali kaneme selama, te alta bogo me si me si badu sąsągą bilai dao. 
Nosali agai te kibu sipsip ili salio. Agai te nisa pai kibu danu me sali, te haligade bealubo kibu ili delegabe sobadi, te polalubo dini homu wiegi yai sobadi, te si wabo te kibu homugo si siyu te ili dali sali, te sipsipgo dolo sągą me sai dao. 
Nosali Moses te yis meni yai bret pągąnalubo basket te augwaligo Genuai Bidiba mabo bret munalubo madi pelama, tama agai augwaligo te yis dali ulisąwai bret sali, te augwa plauago nigai bret me deli te oliv wel dali begelali, me te bisket me deli sobadi yali. Tama agai te nai dabe te kibu ili me kibu dolo sągą te nai si daiba muai. 
Mosesgo te nai dabe te Aron dali aga ogwa dabe daligo nogoba muani, tama augwaligo nogogo te nai tolaluyu, te Genuai Bidigo gedude te nogo edaba ugwaba hoga walio. 
Tama nosali Mosesgo te nai dabe augwalide ma selama, tama te siago tigidali dabo ofa ulubo alta kibu sipsip daiba te muani, tama te nai tigidali mu te isiba ulama, dela silali. Te nai dabego te pris nigali bidi dąį ebo ofa elama, te denami ebo Genuai Bidigo odoyu, godolo eyu, bugai haliga yai dao. 
Tialima, Mosesgo te ofa yabo sipsip kibu bau selama, te nogode tolaluyu, ugwa eda te Genuai Bidigo gedude tama yalio. Te sipsip pedaigo te augwa pris dąį ebo ofa yali, te kibu mi Moses aga digi tumainu yai. Mosesgo te Genuai Bidigo agabolo wali po gilama te sę tigidali ela silai. 
Te Mosesgo wel habu dwasianu selama, te gesi pris dąį ilainu sali, te agai alta bogo badu sąsągą bilabo kaneme sali. Tama agai te kaneme me wel te Aron dali aga ogwa dabe daliba me augwaligo ugwaba me segene sągąwani. Te tama tiali kolesagade Mosesgo te Aron dali, aga ogwa dabeba dali te me augwa ugwaba me dąį ilama, te Genuai Bidigo mu dao wali. 
Nosali Mosesgo Aron dali aga ogwa dabeba me te tama po wali, “Eno dagebolo te kibu mi te Godigo sel Ugwa Be sunumiba sela pelama, te posolo ąįde ulama, te basketde munalubo bret dali tuao wali. Te basketde te pris dąį ilibo ofa ebo bisket me bret elalubao,” po wai. 
“Te dage tuali tabi baso da, teda te me badu munalubo kibu mi me bret, dagego te siaba ulama, te siago tigidali dela silimainao,” wali. 
“Dage te Godigo sel Ugwa Be sunumide bidaludubadi te nogo a naga olama, me badu nogo si wagi solama sogo bidao. Te dage pris sęba muani sogo 7 sogo elalueibao. Tama tibaso, dagego me tagaligio, te sogoba usu nama silimainao. 
Genuai Bidigo digi dabolo walama, te dagego sęgę sela sąyu, te tigidali sę emainogo yai. Te megi da dago te sę yali dao. 
Dage te sel Ugwa Be sunumide te giligade me hulide bidalubadi, te a naga olama, me si sogo usu nao, tama dagego te Genuai Bidigo dagebolo yao wali sę tigidali yao. Genuai Bidigo enabolo tama tiwai po wai. Tiyu, dagego agai po sela sąbaso, te dage isabuo wai dao.” 
Te Mosesgo pedauwalide naga Genuai Bidigo Aron dali aga ogwa dabeba me te sę yabo po walama, tama augwaligo te tiwai sę yai dao. 
