﻿Pris Sę Ebo Bomai Po.
9.
Te dei 7, te tama side augwaligo Aron dali aga ogwa dabe te pris sęba muna silibo sę ela silali. Te 8 wabo side Mosesgo te Aron dali aga ogwa dabe dali i obadi, te Israel tobolu bidi dabe me sisinagasao olama, i walio. 
Augwali agaba sisinagasobo si da, Mosesgo Aronbolo te tiwai po wai, “Te ogwa bidi bulmakau omai me deli sobadi, te omai sipsip kibu me deli sao, augwali si te keni kenigo tigi me dolisąwai dabe tama sao. Tama nago te kibu si Genuai Bidiba ofa yao. Te kibu kaugo te sęgę sela sąbo ofa ebadi, te sipsip kibugo te isiba tigidali ulama dela silibo ofa yao,” te po wai. 
“Tama nago te Israel we bidi dabeba waliyu, te sęgę sela sąyabo meme kibu omai deli sesao po wao. Te kibu be deli yai omai kau kibu me deli sobadi, te kibu be deli yai sipsip kibu me deli sobadi elama, te isigo tigidali dabo ofa yaibao. Augwaligo te wiegi yai kibu naga sao, te keni kenigo augwa tigi me dolisąwai naga sabo usu dao. 
Tama te we bidi augwaligo te omai bulmakau me deli sobadi, te omai sipsip kibu me deli sobadi elama, te deli haliga yabo ofa yaibao. Augwaligo te kibu si Genuai Bidiba ofa emainao, te wit ulubo ofa augwaligo te oliv wel dali taluali. Te megi tama side Genuai Bidi augwali geduba pedalubaso da, teda hasia bolo te ofa augwaligo yao wao,” wali. 
Tialima, Aron dali te we bidi augwali pelama, te Mosesgo augwalibolo sigi pao po wali nai dabe selama, tama augwaligo te Godigo sel Ugwa Be pąba selasa asali. Te tigidali we bidi te Genuai Bidiba lotu wainogo te sel Ugwa Be pąba sisinagasalio. 
Tama Mosesgo augwaliba te tiwai po wali, “Genuai Bidigo te po wali, dagego te ofa ebaso da, te Godigo moni bomai ula te dageba pedalumainu yaibao,” wali. 
Tama nosali Mosesgo Aronbolo te po walali, “Nage te altaba pelama, te sęgę sela sąbo ofa me yao. Nago te naga sęgę dali, te we bidi dabego sęgę sela sąbo ofa dali, si tama yao. Nosali, te tigidali we bidigo sesali ofa selama, te augwa sęgę sela sąbo ofa yao, te Genuai Bidigo po wali gilama te sę yao,” wali. 
Tialima, Aron te altaba pelama, te ogwa bidi kau kibu omai elali, te aga digi aga sęgę sela sąmainu yalio. 
Te aga ogwa dabego te kibu kaneme selama, agabolo mani, tama agai nogo dani te kanemeba holama, te dwasianu kaneme te gąų me si me si te alta dage me si me si badu teba muai. Tama agai te me badu munaluali kaneme selama, te alta aiya dogwa saliba gealuali. 
Tama nosali Arongo te kau kibu ili tigidali sobadi, te haliga bealubo delegabe, me te si wabo homugo si siyu, tama te altaba ulai dao, te Genuai Bidigo Mosesbolo po wali gilama yai dao. 
Tama agai te kibu mi tigidali me kibu tigi wali te we bidi bidibo madi bulu badu nogani isiba ulama, te isigo tigidali dela silai dao. 
Arongo te silibo si da, teda agai te isiba tigidali ulama dabo ofa yabo kibu elali. Tama aga ogwa dabego te kibu kaneme selama, agabolo mani, tama agai te kaneme te alta bogo me si me si badu sąsągą pai dao. 
Te augwaligo te kibu tobolu dali, te kibu me badu delage pedai me tigidali agabolo menama, tama te tigidali te isigo tigidali dela silibo altaba ulalio. 
Agai te kibu tabi haliga bono dabe ąį telawali, te kibu sągą si me. Tama agai te me badu pedai tigidali te isiba tigidali ulubo ofa daiba munama, te isigo mu dela silai dao. 
Nosali Arongo te we bidi augwaligo ofa dabe selama, te Genuai Bidiba ofa ilali. Te we bidi dabe augwa sęgę sela sąwainu sesali kibu meme agai salio. Agai ela munama, tego ofa yali, te agai aga sęgę sela sąyu, te ofa yali kibude yali sę tiwai te ofade tama tialio. 
Te we bidi augwaligo te isiba tigidali ulabo ofa yainu sesali kibu si dabede te me deli agai sali, te ofago bomai pode wali po tiwai gilama, te augwaligo tigidali sogo kigamude ofa eyu yai. Tama agai te plaua selama, te wit ulubo ofa yali. Agai te dwasianu plaua nogogo selama, te plaua te isigo dela silibo ofa ebo altaba ulali. 
Nosali Arongo te we bidi dabego Genuai Bidi dali deli haliga pedalubo ofa yainu sesali kau kibu me sipsip elali. Te kibu sigo kaneme aga ogwa dabego selama, te agabolo mani, tama agai te kaneme te alta bogo me si me si badu sąsągą bilai dao. 
Tama Arongo te nisai sipsip kibu danu sobadi, te kibu sigo te ili sali. Agai te haliga bealubo delegabe me te si wabo homugo si siyu, te polalubo deli wabo dini homu wiegi yai deli sai dao. 
Tialima, augwaligo te nai dabe te kibu si bauba munama, te tigidali altaba sela pali. Tama Arongo te kibu ili tigidali te altaba ulai dao. 
Tama agai te kibu kau me sipsip bau, me kibu dolo sągą me agai nogode tolaluyu, te Genuai Bidigo gedude iba eda hoga yali, te Mosesgo po wali gilama yai dao. 
Arongo te ofa dabe ela silama da, teda agai nogo si te we bidi dabeba ugwa selama, te po weyu, te Godigo augwali wiegi yai ilao wali. Nosali agai te alta tagalama, aiyaba dulalio. 
Te Moses de Aron si te Godigo sel Ugwa Be tomoba pai. Te augwali si buluba teda soabo sogo augwa si te po weyu, te augwa homugo te Godigo wiegi yai sę te tigidali we bidiba yao po wali, tama Godigo genuai ula hania haninama pedelama, te we bidi augwaligo suai dao. 
Te polo tama mu Genuai Bidigo isi te altaba tagala palama, tama isigo te siago tigidali mu dela silibo ofa dali te kibu ili tigidali me polo dela silai. Te we bidi dabego te sę ebo sulama, te augwa bomonama i weyu, te augwa gesabidi tǫba pǫgulama, te Genuai Bidiba lotu po wai dao. 
