﻿Pris Sę Ebo Bomai Po.
11.
Te Genuai Bidigo Moses de Aron sibolo walama, 
te Israel dabeba te tiwai po omainogo yali, “Dagego e tobage tǫde bidibo hasa sibi naga tuagameo,” wali. 
“Te nogo sągą age si elalubo hasa sibi dabe naga, te augwaligo kibu bulmakaugo nosai tutudubo tiwai ebo dao. 
Tiali goli dagego te kamel kibu, me rabit, me te masigi gabalode bidibo bolo gesia, te me tulamuo. Te hasa dabego te kaugo nosai tubo tiwai ebo dao, tiali goli augwaligo nogo sągą te age si elalubeo. Tama tiyu, dagego homugo augwali te eno gedude wiegi yai meni da homu elama, te dagego habu sao. 
Tama te kibu mu me dagego tugio. Te nogo sągą dani age si elalubo, tiali goli agai te kibu kaugo nosai tubo tiwai gilama ebo meni. Tama tiyu, dagego homugo kibu mu te dwai nai da homu eyu habu selao. 
Dagego te tobage hasa sibi me tugio, te augwali isali sogo te dagego augwali tigiba nogo me mugio, magi baso meni, augwali eno gedude wiegi yai me ebeo,” wali. 
“Dagego te tobage sųgų tigidali te tigide pobolo yai me bogo elalubo, te tiwai sųgų tuagameo, te olo ąį dabede ma tamu ąįde bidibo sųgų dabe, te usu dao. 
Tialima, tigidali sųgų me te dwasianu nai tigidali te tamu ąįde bidibo, me olo ąį dabede bidibo, te tigi pobolo me bogo meni yai, dagego homugo augwali dwali homu yao. 
Tama eyu, dagego me tugimio, te augwali isai elalubadi te dagego nogogo me diągio. Te habu mu dao. 
Ma odao. Dagego te bogo meni yai sųgų me te tigide pobolo isąwai sųgų te węde bidibo me tugio. Te nai dabe dagego habu selao,” wali. 
“Te tobage ba meba dageba habu selibao, te dagego me tugio. Dagego te nai tigidali dwali homu yao. Te e tobage ba dabe, te tobage genuai me dwasianu ba kemodage, te tobage tigidali ba kemodage hani hulide bilibo ba me, te ba gaugau, me te kebi dabe, te kanai dabe, me te sągą dili bobage yai ba me, te tobage ba hopou, me te komoran wabo ba pato, me te dwasianu bogwą, me genuai bogwą, te dagego habu sao. Te nai tigidali dagego tubo habu selao. 
Te sągą si me nogo si me bogo elalubo nai tigidali, te augwali wiegi yai nai meni, te habu sabo usu dao. 
Te sągągo sasa mano pabo, te tobage nai yaibaso da, teda dagego tuabo usu yaibao. 
Tama dagego te tobage kuli mano tigidali tubaso usu yaibao, te genuai me dwasianu dabe te tuagameo. Te tama dao. 
Te gasa nai tigidali te nogo si sągą si te bogo me elalubaso da, teda augwali dagego te dwai nai da te homu elama, habu sao,” wali. 
“Te me badu gasa tobage hasago me te dage eno gedude meda pedalubo sę yaibao. Te bidi me deli te isai hasago tigi diąwai baso da, 
ma agai gasaba me tolasa pai baso da, teda te bidi eno gedude meda pedelama, te bididubadi be pioba mu usu naibao. Tama te hasa tolali bidigo ugwa me ąį telayao,” te po wai dao. 
“Te sągąde age elalubo tobage hasa dabego, te sągą dani age si elalusiąyu, ma te bulmakaugo nosai tubo tiwai isąbo hasa dabe, te hasa hani dabe dagego te wiegi yai nai meni da, te homu yao. 
Te tobage tigidali hasa te sągąde dani elalubaso, te wiegi yai hasa menio. Dage te tobage hasa isai tigi me diąwai baso da, teda dage eno gedude meda pedelama, tama dage tiwai bididubadi te giliga dega sigulaibao,” Genuai Bidigo te po wai. 
“Bidigo te tobage hasa tigi gasaba me tolasa peyu da, agai ugwa ąį telayao, tiali goli aga meda elaludubadi te giliga dega sigulaibao. Te tobage hasa dabego dage meda ilibo dao,” wali. 
“Te tobage hasa hani me habu selali, te bolo gesia dabe me tǫde bolo me, te dwasianu yogwa dabe me genuai yogai dabe, te habu saibao. 
Eno te hasa dabe dageba habu selibao, te augwali isai madi dagego augwali tigi diąbaso da, te dage meda pedelama, te elaludubadi giliga dega siguluboba usu naibao. 
Tama te hasa dabe me deli isilama, te nai me deli daiba tulaluei baso da, te nai eno gedude meda pedalubao. Te naigo tigi te augwaligo nigo nigai nai, me name ugwaba, me kau kibu waliba, me beg daiba tulaluei baso, te aga mena sę elalubaso da, te tagalao, te augwali meda pedelaibao. Tama tiyu, te dagego ąį telayao, tialima te nai dabego meda elalubadi te giliga dega sigulubo sogoba usu naibao,” te po wai dao. 
“Tama te hasago tigi te tǫgo nigai sospen tomoba tulaluei baso da, teda te sospende elaluali nai tigidali te meda pedelaibao. Tama dagego te sospen sene alua sąyao. 
Te nai meba pąde munalubadi te sospen ąį teba gelai baso da, teda te nai me meda pedelaibao. Te sospende elaluali ąį te doyu, meda yali dao. 
Te hasa sibi te mena naiba me tulalubaso te tagalao, te nai te meda ilaibao. Te augwa tǫgo nigai stov ma aven me deli yaibaso, te me dagego aluao. 
Tialima, te hasa me te ulu pedalubo ąįba me te olo tǫde pedalubo ąįba ma te tank ąįba tulaluei baso da, teda te ąį meda pedalugobeo. Menio. Tiali goli, te mena gasa nai te hasa tigide keąlubaso da, te meda elama, dwali dao. 
Te hasa sibi me deli te isama, te dagego bulainogo ebo nai waiba tulaluei baso da, te usu dao, magi baso meni, te nai wai meda ilibeo, aga te wiegi yai elalubao. 
Tiali goli, te nai wai te ąįde munalubadi, te hasago tigi daiba tulaluei baso da, teda te nai wai dabe te eno gedude meda pedalubaso, te habu selabo usu dao,” wali. 
“Te eno dagebolo te tuao wali hasa dabe tuabo homu ebaso, te usu yaibao. Te hasa sibi hani me deli te odolali me isai madi, te bidi me we me deli teba nogo diąwani da, te bidi ma we eno gedude meda pedelaibao. Te tiwai agade elalubadi, te sia ge dega siguluboba usu naibao,” te po wai dao. 
“Tama bidi me deligo te hasa mi tubaso, ma agai te hasa tolai baso da, teda agai ugwa ąį telayao. Tialima, aga digi te meda elalubadi te sia ge dega sigi paboba mu usu naibao,” wali. 
“Dagego te dwasianu hasa dabe me, ma te tǫba tedela pabo binatang me tulamuo. Augwali te dwai nai da, dagego te homu yao. 
Te haligago bulu bilibo tobage hasa dabe, ma te nogo sągągo bilibo hasa, ma te sągą hauwa elalubo hasa me, te dagego me tugio. Augwali te wiegi yai nai dabe meni, te habu sao. 
Dagego te hasa sibide deli me tugio. Te dagego tubaso da, te eno gedude dage meda mu pedelaibao,” po wai. 
“Ena Genuai Bidi, ena duga God dao. Tama tiyu, te duga digi dage enabolo mayu, te dolo isąbo kolesaga tagaluyu, te doloba pai kolesaga wali peyu, te meda meni yai wiegi yai tedali mu bidao. Magi baso meni, ena digi ena te magi meda meni yai wiegi yai tedali bidiyu, eno te wiegi yai kolesaga me doloba pai sę mu ebo dao. Tama te tǫde bilalubo dwasianu hasa dabe me tugimio. Tiyu, dage eno gedude meda pedelabuo. 
Ena Genuai Bidigo, eno dage te Isipde selama, odasa asali, te ena dagego God bidainogo yali. Tialima, dage te tedali gasagi yai mu bidu, te wiegi yai doloba pai kolesaga naga wali piyąo, magi baso meni, ena digi ena te tedali gasagi yai mu bidiyu, te eno kolesaga wiegi yai doloba pai mu elalubo dao,” wali. 
“Te dagego megi sali te bomai pode elalubo po, agai te tobage hasa sibi me te ba dabe, te węde bidibo sųgų dabe, te dwasianu hasa sibi tigidali, te tǫde bilalubo binatang, te nai sibide bomai po wali dao. 
Tama dagego bugagia dagaliyu, te mena meda meni yai nai, me te mena naigo dage eno gedude meda pedelabo te bugagia dagaliąo. Te dagego tuabo hasa sibi dabe bugagia konebadi, dagego tusiąma habu sabo hasa sibi me konebadi tama yao,” Genuai Bidigo te Moses dali Aron dali sibolo te po wai. 
