﻿Pris Sę Ebo Bomai Po.
13.
Te Genuai Bidigo Moses de Aron sibolo te tama po wai, 
“Te bidi me deli ma we te tigide keni ma dili keni pedalubaso, ma tigide magi sę me deli pedalubaso, tama te sęgo tonobo te oiyabe gasi tiwai pedelabo homu tiwai ebaso da, teda augwaligo te bidi ma we te Aronba me aga hani prisba odasa pao,” wali. 
“Tama te prisgo te sę bugagia osolama, te agai suali madi te tigi nisi tedela elama, te keni tigi tomoba paibaso da, teda te oiyabe gasi dolo tama ebao. Te prisgo te bidi suali sogo da, agai te tama po wao, ‘Te bidigo tigi wiegi yai me elalubeo,’ po wabo dao. 
Tialima, te dąį tedela yai pedelama, te prisgo suali keni te tigi tomoba pisąma, te tigi nisi tedela pedalisąbaso da, teda prisgo te bidi agaduba te be me deliba munama elalubadi, te Sarere deli, a naga me si sogo, usu nama bidimainao. 
Te 7 wabo side, prisgo te dąį yai elaluali ma osola suao, tama agai homugo te tiwai naga tama me elalubaso, te genuai pedalisąbaso da, teda te bidi agaduba te be me deliba munama bididubadi, te 7 sogoba usu nao,” te po wai. 
“Te Sarere si silibaso da, teda prisgo te bidi ma sulama, te nai genuai pedalisąma silainogo ebaso da, teda te bidi olo keni da homu yao. Tialima, prisgo agabolo walama, ‘Nage God gedude wiegi yai da,’ po wao. Te bidi aga ugwa wę tedelama, te aga wiegi yai mu pedalumainao,” te po wai. 
“Te tudi badu nosali, te keni ma pedalubaso da, teda te bidigo pris ma sugi pao. 
Tama prisgo te bidi bugagia sumainao, tama te keni genuai pedalubaso da, teda te bidigo oiyabe gasi elalueibao. Te prisgo agabolo te tiwai po waibao, ‘Nage wiegi yai me ebeo.’” 
“Te bidi me deli bomai keni elalubaso, te augwaligo aga te prisba odasa pao,” wali. 
“Te bidi te prisgo bugagia osa yao. Te keni tedela eyu, te tigi nisi tedela pedelama, tama te kenide keni bole pągąną pobaso da, 
teda te bidi te oiyabe gasi dolo elalubao. Tama prisgo te bidiba te tiwai po wao, ‘Nage wiegi yai me ebeo.’ Prisgo koneani, te bidi wiegi yai ebeo, tama tiyu, te bidi agaduba deli bidimainogo me elamu dao. 
Tama te gasi genuai mu pedelama, te bidigo tigi tigidali usu nubaso da, 
teda prisgo te bidigo tigi bugagia osa yao. Te prisgo suali digi te gasigo te bidigo tigi tigidali usu nama, te tigi tigidali tedela ebaso da, agai te bidibolo te tama po wao, ‘Nage Godigo gedude wiegi yai yalio.’ Te bidi wiegi yai mu yai dao. 
Tiali goli, nosali te keni ulu podilama, te tomode elalubo mi hanilibaso da, teda te bidi wiegi yai mu me ebe dao. 
Prisgo te keni ma sulama, agai suali keni te tiwai ulu podilaibaso, agai te bidibolo walao, ‘Nage wiegi yai ebeo.’ Te keni elalubo bidi te keni ulu podilama, te keni tomode mi elalubo bidi da, aga eno gedude wiegi yai me egobeo. Te tobage keni te dwai mu dao. 
Tialima nosali, te keni pedela selama, tigi tedela pedalubaso da, teda te bidi te prisba ma pomainao,” wali. 
“Te prisgo te bidi bugagia ma sulama, agai suali te keni pedela selama, te tigi tedela yaibaso da, teda te bidi eno gedude wiegi yai yalio. Te prisgo agabolo te tiwai po walao, ‘Nage wiegi yai mu yai dao,’ po wao,” wali. 
“Te bidi me deli tigide dili keni elama, te keni pedela selama, 
tama nosali dili keni yali madi du elama, tedela pedalubaso, ma tigi mama yai me tedela dali elalubaso da, teda te bidi prisba pao,” wali. 
“Tama prisgo te bidi dili keni yali pesage bugagia suao. Te keni dwasianu tomoba pelama, te badu tigi nisi te tedela pedelai baso da, teda prisgo te bidibolo te tiwai po walao, ‘Nage God gedude wiegi yai ebeo.’ Te gasi te dili keni pedela sali pesagede pedelali da, te dwai nai mu dao. 
Tiali goli, prisgo te tigi sulama, agai te tigi nisi tedela isąwai sulama, te keni tigi wali tomoba pisąwai, agai te usu ma yabo tiwai tonobo homu ebaso da, teda prisgo agaduba munama bidibadi, te Sarere deli bidama, te nogo a naga olama, te me badu nogo si wagi solama sogo usu nama bidao. 
Te nosali te 7 wabo sogo te nai genuai pedalubaso da, teda te dwai nai mu da, te prisgo bidibolo te tama po walao, ‘Nage te God gedude wiegi yai ebeo,’ po wao. 
Tiali goli, te tigide dąį ilali te tiwai me tama elaludu, te genuai pedalisąbaso da, teda te dili kenigo dila pali tigi wali te masalu pedela salio, te tama dao. Tama te prisgo te bidibolo te tiwai po wao, ‘Nage te God gedude wiegi yai yali dao,’” wali. 
“Te isigo bidi me deli tigi dai madi, te keni mama yai ma tedela yai te pedalubaso da, 
teda prisgo te keni bugagia osola suao. Te keni tedela yali madi te kenide tigi nisi pedelama, te siago ulali madi keni tomoba paibaso da, teda te keni dwai nai mu dao. Tibaso, prisgo te bidibolo te tama po wao, ‘Nage God gedude wiegi yai ebeo,’ po wao. 
Te keni elalubo madi tigi nisi te tedela yai pedalisąma, te keni tomoba pisąma, te suali madi pedela sabo homu tiwai ebaso da, teda prisgo te bidi agaduba munama bidibadi, te 7 wabo sogo usu nama bidimainao. 
Te 7 wabo side te prisgo aga ma osola suao. Te keni genuai pedelai baso, te keni dwai mu dao. Te prisgo agabolo te tiwai po walao, ‘Nage dwagi yai me ebeo,’ te po wao. 
Tiali goli, te keni me tama elalubaso, te genuai pedalisąbaso da, teda te tigide isigo ulali madi masalu naga elalubao. Tialima, prisgo te bidibolo te po walao, ‘Nage God gedude wiegi yai dao,’” wali. 
“Te bidi me deli ma we buluba keni keni te tobolude pedalubaso, ma penanede keni ebaso da, 
teda prisgo te buluba keni bugagia suao. Te prisgo homugo te keni keni tigi tomoba pali homu elama, te agai suali te buluba keni yali pesagede te tigi nisi hauwa elalu, te tigi nisi sęwa yaibaso da, teda prisgo koneama, te buluba keni keni dwai nai mu da homu yaibao. Agai te po te bidibolo walao, ‘Nage God gedude wiegi yai ebeo,’ wao. 
Tiali goli, prisgo aga subo sogo, te agai suali te buluba keni kenigo tigi wali tomoba sela pabeo, te buluba keni elaluali madi tigi nisi wiegi yai me pedalisąwai, tialima agai te bidi agaduba munama, te Sarere deli bidimainao,” te po wai. 
“Te 7 wali side me tama elalubaso da, prisgo te bidigo tigi ma osola suao. Te buluba keni me tama elaluyu, te genuai pedalisąma, te prisgo homugo te tigi tomoba pogobe homu eyu, tama te badu sęwa yai tigi nisi pedalisąbaso da, 
teda te bidi aga tobolu nisi me penani nisi tigidali poayao, tiali goli te keni elalubo madi poagio. Te nosali prisgo te bidi agaduba tedali bididubadi, te nogo a naga olama, me badu nogo si wagi solama sogo ma bidimainao. 
Tama te 7 wabo sogode prisgo te bidigo keni keni ma suao. Te keni keni te tama tiwai me elalu, te genuai me isąyu, tama prisgo homugo te keni tigi tomoba pabe homu eyu da, te agai te bidibolo te tiwai po wao, ‘Nage God gedude wiegi yai yalio.’ Tialima, te bidigo ugwa ąį telabaso, te wiegi yai ebo dao. 
‘Nage wiegi yai yalio,’ te prisgo te po wali sogo tudi badu nosali te habo keni genuai pedelai baso da, 
teda te prisgo aga ma osola suao. Te habo keni genuai pedelai baso da, teda prisgo te tiwai koneao, te bidi wiegi yai ebeo homu yao, tama agai te sęwa yali nisi munu me gegegio,” wali. 
“Tialima, te prisgo aga suali madi, te habo keni te tiwai me elaluabo homu eyu, te genuai pedalugobe homu elama, tama te keni yali madi wiegi yai tigi nisi pedalubaso da, teda te habo keni silalio. Tialima, prisgo agabolo te tama po walao, ‘Nage God gedude wiegi yai yalio.’” 
“Te bidi ma we me deligo tigide tedela yai nai meba pedelai elalubaso da, 
teda prisgo te tigide dąį elalubo bugagia suao. Te dąį elalubo te olo tedela elaluyu, te ula mu meni baso da, teda te dąį olo tama te tigide pedelali homu yao. Tama tialima, te bidi eno gedude wiegi yai yali dao,” wali. 
“Te bidigo tobolu nisi meniama wane paibaso da, teda aga eno gedude meda elalubeo. Menio. Aga wiegi yai bidi dao. 
Te tobolu nisi tomo bulude naga, te wane pai bidi yai baso da, teda te bidi aga eno gedude meda meni yai wiegi yai bidi dao. 
Tiali goli, te wane pai bidi tobolude te keni pedelama, te kenigo au te mama yai me tedela elalubaso da, teda te keni dwai mu dao. 
Te prisgo bugagia osola suao. Te kenigo au te mama yai ma tedela yai elalu, te oiyabe yai bidigo keni tiwai elalubaso da, 
teda te tobolu wanede keni te dwai nai mu dao, te prisgo agabolo te tiwai po wao, ‘Nage Godigo gedude wiegi yai ebeo.’” 
“Bidi me delide te tobage keni elalubaso, agai te pisila pai ugwa munama, te tobolu nisi yaga sigio. Tama aga nogogo pedauwali pania selama, te tiwai i wao, ‘Ena dwagi yai menio. Ena dwagi yai menio,’ te tama po wao. 
Sesemane sogo te tobage keni elalubo bidi, aga eno gedude wiegi yai me ebeo. Agai te aga abagi dabe tagalama, te bidibo pesage bulu badu tedali bidao,” te po wai dao. 
Genuai Bidigo po ma weyu, te Moses de Aron sibolo te tama po walio, “Me sogo te nai mebago te ugwa dolobo sę eyu, te gudubo ugwa dabede, me name ugwade, me augwa te sipsip nisigo nigali, ma te wiegi yai hobigo nigali, te bulmakau tigi walide pedaliyu, te tobage naigo nigali naide pedaliyu yaibao,” wali. 
“Tama te nai te ni yano tigi poai, ma mama yai pedalubaso da, teda augwaligo te ugwa dabe prisba waselama, ola magasao,” te po wai. 
“Te prisgo selama, bugagia sulama, te nai gasa, badu munama, te nogo a naga olama me badu nogo si sogo elalumainao. 
Te 7 wabo side te agai ma suao, tama te ugwade genuai pedelaibaso da, teda te oiyabe gasi tiwai ebao, tama te ugwa ma kau wali te eno gedude wiegi yai egobe dao. 
Tama prisgo te ugwa isiba ulao. Te oiyabe pedalubo tiwai yali nai, te isiba ulama, mu siago dela silimainao,” wali. 
“Tiali goli, prisgo te nai suali te tiwai tama me elaluyu, te ugwade genuai pedalisąbaso da, 
teda agai augwalibolo olama, te ugwa wę tela yao olama, te munalubadi te 7 wabo sogoba usu nao. 
Nosali agai ma suao, te oiyabe tiwai yali te au me tama elaludubaso, te ugwa menade te nai pedelali madi elalu, te nai elaluali pesagede me genuai pedalisąbaso da, tagalao, te eno gedude wiegi yai me egobeo. Tialima, prisgo te ugwa isiba ulao. 
Tialima, augwaligo ąį telawai madi te prisgo ma suali madi, te oiyabe tiwai yali nai silainu ebaso da, teda agai te ugwa pedai te nai pedelali madi togwa sąyu, te tigi wali me peda sąyao, te dolali naga sela sąyao. 
Tialima, nosali te ugwa me kau tigi wali dolali nai ma pedalubaso da, teda te ugwa aga ayago ma kau wali me te isiba ulao, te mu dela silimainao,” wali. 
“Tialima, agai te ugwa me kau wali ąį telabo sogo, te oiyabe tiwai nai menia sobaso da, teda agai si sogo ąį tedelama, te ugwa eno gedude wiegi yai mu pedelaibao,” wali. 
“Te tobage naigo te gasa tobage nai dolo bomai po elaluali, te ugwa ma te name ugwa augwa te wiegi yai hobigo nigali, ma te sipsip nisigo nigali, te tigidali nai augwa te kau waligo nigali nai. Te bomai pode te nai dabe te eno gedude wiegi yai yali, ma wiegi yai isąwani te bomai po wai dao,” wali. 
