﻿Pris Sę Ebo Bomai Po.
21.
Te Genuai Bidigo Mosesbolo weyu, te Arongo hani pris augwaliba te po mao wali. Agai te tiwai po wali, “Te dage deli kaneme hani me deli isibaso da, teda diligi peyu, dagego te isali bidide homu dene ebo kolesaga wali pigimio. Te kolesagade dage eno gedude meda ilibo sę pedalubo dao. 
Tialima, te duga deli kaneme mu isai, te ida, ma aya, ma ogwa, me wegi ma ama, 
te abenu mu bidigo sisąwai te aya dali bede bidibadi, te tiwai deli kaneme dabe isibaso da, teda dagego te homu dene ebo kolesagade meda pedalidali homu ebo tagalao, dagego te homu dene ebo kolesaga yagameo. 
Tialima, te prisgo wego hanide, te aga wąį me deli isibaso da, teda prisgo te homu dene ebo kolesaga wali me pelamuo. Teyu, aga eno gedude meda pedalidalio,” wali. 
“Te dage prisgo homu dene ebo kolesaga wali pabo sogo da, teda dagego tobolu me badu tobolu nisi tigidali togogio, tama te penane nisi togolama pęwadage iligio, tama te homu dene ebo kolesagade duga tigi olo madi togogimio. 
Magi baso meni, te dage pris dabe enaba kęą pai bidi mu bidimainogo sa muai. Ena dagego God, te dagego eno nogi aiyaba me elalugio. Dagego enaba ofa ebo sę dabe elalubao, te ofa dabe te dagego enaba nai mabo tiwai ebao. Tibaso, dagego te dwai kolesaga tigidali tudiba munama, te ena dali naga bilao. 
Dage pris eno bidi naga elalubao. Tialima, dagego te penanide bilibo we me sigio, te gasa bidigo penani yai we, ma aga bidigo sela sąwai we me selamo dao. 
Te we bidi augwaligo homude dage pris te eno bidi hani dolo da homu emainao, magi baso meni, dagego te ofa ebo nai dabe enabolo mabo dao. Ena digi ena Genuai Bidi. Ena tedali wiegi yai elaluyu, ena te wiegi yai doloba pai kolesaga naga ebo God bidibao. Eno ena we bidi dabe tedali wiegi yai pedalumainu yaibao, te augwaligo wiegi yai doloba pai kolesaga naga wali pabo dao,” wai dao. 
“Te dage prisgo wegi me deligo te penani ebo we pedelama, te meda yai kolesaga wali pabo si da, agai aga aya hale mu ilibao. Tibaso, te we bidi dabego aga ela munama, tama aga tigi isiba ulao,” wali. 
“Hetprisgo aga sęde te nogi yai namba sali, te augwaligo aga toboluba wel gelebo sogo, te augwaligo aga te pris sę emainogo sa muai. Tama aga deli hani bage me deli isibaso, te homu dene ebo kolesaga wali pabo sogo, agai tobolu nisi olo elalumainogo igio, aga tobolu yaga bugagia sao. Te agai aga ugwa me pisągio. 
Hetpris te isali bidi munalubo beba me pigio. Tiyu, aga eno gedude meda pedelabuo. Te aga aya ida isibaso, tagalao, agai aga digi te homu dene ebo sogo te meda iligio. 
Tama aga te eno Ugwa Be tagalama, te bidi tigi munalubo beba pelamuo. Agai tama sę eyu da, agai eno sel Ugwa Be meda pedalubo sę ilaibao. Dagego aga wel pilali, te eno dagebolo mani welgo te aga hetpris pedalumainu sa muai dao, tama tialima aga te isai bidi tigi munalubo beba pigio. Ena Genuai Bidigo eno te po wai dao. 
Hetprisgo te bidi dali me pisąwai we sobaso usu dao. 
Agai te we, bidi me isiyu taga pai we me sigio, ma we aga bidigo sela sąwai we sigio. Agai te sunumide penani sę ela bilai we, ma we, gasa bidigo penani yai we me sigio. Te tama we dabe augwalide habu sali. Agai te bidi dali me pagela pisąwai we sao, tama agai we te pris augwa hanide naga sao,” te po wai dao. 
“Te agai eno te po wali pisąbaso da, teda agai wai dabe eno gedude meda pedelaibao. Ena Genuai Bidi, eno aga ena da olama, sa muani, tama eno aga te hetpris sęba muai dao,” wali. 
Genuai Bidigo Mosesbolo ma wali, 
“Nago Aronba te tiwai po wao, te bidi me deli nago hanide pedalubaso, ma nosali te aga tigi dwasianu dolai baso, te bidigo enabolo mabo nai ofa me elamo dao. 
Tigidali bidi augwali tigi dwasianu dolai baso, augwaligo enaba ofa me elamuo. Eno te tiwai tobage pris bidi dabede po obao, te gedu widai bidi dabe, ma sągą dwai bidi, ma gesabidi dwai bidi, ma te idago aga ame nani sogo te nogo sągą pęwadage elama gagea paibaso, 
ma bidi sągą ma nogo dolali, 
ma bidi tudi sugąsi bidi, ma pęwadage bidi mu yai baso, ma gedu dwai bidi, ma tigi dolali bidi yai baso, ma bidi aga domo dolai bidi, te tama tiwai bidi dabego pris sę eyu, enaba ofa nai me magio. 
Awe, te nago hanide bidai bidi me deli, te aga tigi dwasianu dolai elalubaso, agai te we bidigo mabo te tobage ofa dabe enaba me elamuo. Te habu mu dao. 
Tialima, dagego enaba te ofa ebo kibu me gasa nai ofa ebo dabe te agai tumainao. Eno dage prisbolo menama tumainogo ebo ofa nai dabe te agai me sela tumainao. 
Tiali goli, aga te Tedali Gasagi Yai Mu Be Habu genuai ugwa munalubo be habu pąba me pigio, aga te alta pageba me pelamuo. Tiyu, te wiegi yai nai dabe agai eno gedude meda ilidalio. Magi baso meni, ena digi ena Genuai Bidi, tama eno te nai dabe dąį eyu, sa muani, ena sę digi emainogo yali.” Genuai Bidigo te tama po wai dao. 
Tama Mosesgo te tigidali po Aronbolo weyu, te aga ogwa dabeba me walio, te Israel we bidi tigidaliba me te po wai dao. 
