﻿Israel Hanigo Namba.
19.
Genuai Bidigo Moses de Aron sibolo 
te bomai po te Israel we bidibolo mao po wali. Agai e tama po wali, “Te Israel dabego te so kau kibu bedeba yai, te wiegi yai kau kibu mu, agai te gi tǫ elibo nai kegebo sę isiąwai kau kibu dao, te kenigo agai tigi me dolisąwai, te tobage so kau kibu sao. Tama augwaligo dage siba odasa asao. 
Tama dage sigo te kau kibu te pris Eleasarbolo mao. Tama bidi mebago te kau kibu hanu nigila bidibo pesage taga pelama, bulu badu odasa pao. Tama te Eleasargo augwali subo si da, teda augwaligo kau kibu elama, isilao. 
Tama te Eleasargo te kibu kaneme dwasianu agai nogo danigo selama, tama a naga olama si sogo agai eno ugwa be te badu tonoyu sąyao. 
Tama Eleasargo augwali tonalubadi, tama augwaligo te kau kibu sese tama iside ulumainao. Augwaligo te kau wali, me mi, me kaneme, me kigibili, sese tama iside ulumainao, te haliga bono dabe me sese tama ulumainao. Te tama sese tama sia saibao. 
Tama te pris bidigo te ni bǫ pedai dage me siyu, me te ni hisop dage me siyu, me te sipsip nisi bedeba yai siyu, tama elama te nai sela te kau kibu ulubo te isiba ula palao. 
Tama nosali te pris bidi aga ugwa wę tedalama, tama aga tigiba wę gea palao. Pris aga te sę ela silama, tama aga te bidi bidibo pesage tomoba pomainao. Tiali goli, aga eno gedude meda elaluama, giliga iba dega saboba usu naibao. 
Tama te bidi te kau ulali te bidi aga ugwa me wę tedalama, tama aga tigi wę me paugi pao. Tama aga me eno gedude meda elaluama, giliga iba dega saboba tama usu naibao,” wali. 
“Tama nosali, te bidi me eno gedude wiegi yai bidi pelama, te kau kibu ulali te isi sisi dulu sigi pelama, tama te bidibo pesage bulu badu eno gedude wiegi yai yai pesageba pelama, tede muao. Tama te sisi dulu te wiegi yai pesagede bugagia munalubadi, te Israel dabe augwaligo węba munama, tama augwali augwa digi wę telayu elama, tama eno gedude dolo isąma yali nai dabe sela sąmainao. Augwaligo te ebo kolesagade augwali me wę paumainao, te sęgę sela sąwainogo. 
Tama te sisi dulu sali bidi agai aga ugwa me wę tedamainao. Tiali goli, aga eno gedude meda elalubadi, giliga ibaba dega saboba usu naibao. Te bomai po da tigidali sogo elaluyu, elalua paibao. Tama te Israel we bidigo, me te gasa we bidi te Israel bulude bidibo we bidi augwaligo me, te bomai po wali pomainao,” wali. 
Genuai Bidigo po geninama ma weyu, e tama po wali, “Ma, te bidi mego te isai bidigo tigiba dįąwai yaibaso da, teda aga eno gedude meda elalubadi, 7 sogo tamaba usu nigi paibao. 
Tama te dei namba 3 me namba 7, te si sogo tomode agai te bidi wiegi yai ilibo te wę selama, aga tigide munama, tama aga eno gedude wiegi yai pedalaibao. Tiali goli, agai te namba 3 deide, me dei namba 7, tede agai te tama tisąma yali da, teda aga wiegi yai pedalogobeo. 
Te bidi me deli aga te bidi me isai te bidigo tigi dįąwai yaibaso da, tama agai aga digi eno gedude wiegi yai pedalisąma ebaso da, teda aga eno gedude meda elaluaibao. Magi baso meni. Augwaligo te bidi wiegi yai ilibo te wę selama, tama augwaligo agai tigiba sąsiąma ebaso. Te kolesagago Genuai Bidi eno ugwa be eno gedude meda ilibo dao. Tama tialima, te bidi eno we bidi hani tomode aga me bidigobeo,” wali. 
“Ma, te we me bidi me te olo ugwa be tomode isali da, tama te bidi isibode te bidi dabe te ugwa bede bididuali me, ma te bidi dabe te ugwa be tomoba asobaso da, augwali eno gedude meda elalubadi, a naga olama, si sogo tama usu naibao. 
Tama me te tǫ sene, me dis dabe te po meniama te ugwa bede munaluali da, augwali te meda yaibao.” 
“Ma, bidi me te dulude ma kala silide bilibadi, te isai bidi tigi me dįąwai yaibaso da, te bidi ela muai bidi ma aga digi olo dali isai bidi dįąwai yaibaso, ma te damua pai bidigo dili dįąwai yaibaso, ma agai te gų pagede sągą agawai yaibaso da, teda te bidi eno gedude meda yaibao. Tama aga meda elalubadi, a naga olama, si sogo tama elaluaibao,” wali. 
“Te isai bidi tigiba dagana sai bidigo meda sela sąbo kolesaga da, te e tama dao. Te so kau kibu ulali te sisi dulu meba sao, te we bidigo sęgę sela sąyabo, tama te tǫgo nigai seneba muao. Tama tǫ dedage węba pelama, tama te senede wę tabia sao. 
Tama te bidi me eno gedude meda isąwai bidi, agai te ni hisop nologo dwasianu me selama, agai te nigo te wę selama, te bidi isali ugwa beba me, te we bidi tomode bidibo me, te ugwa be tomode elalubo doado bage seseba te wę segeni sąyao. Tama ma, te bidi aga te isai bidi tigiba nogo dįąwai ebaso, ma te bidi dili dįąwai ebaso, ma te bidi gų pagede sągą agawaibaso da, teda te bidi eno gedude wiegi yai yai bidigo te wę segeni te bidi tigiba sąmainao. 
Te dei namba 3; te dei namba 7, te bubuga side te eno gedude meda isąwai bidigo te wę segeni te eno gedude meda elalubo bidi tigiba te wę segeni sąmainao. Tama te bidi aga homugo aga wiegi yai pedalainogo da, teda te bidi aga ugwa wę telayu, me aga digi aga tigiba wę geliyu emainao, tama te namba 7 deide te giliga ibaba dega sabo side aga wiegi yai pedalaibao. 
Tialima, te bidi me deli aga eno gedude meda elaluai bidi yaibaso, tama agai te meda isąwai pedalobo te kolesaga isąma ebaso da, teda aga eno gedude meda elalubo bidi me bidaibao. Magi baso meni, augwaligo te bidi meda isąwai pedalobo wę aga tigiba sąsiąma ebaso. Tama tibaso, aga wiegi yai me pedalogobeo. Tama agai Genuai Bidi eno ugwa be eno gedude dwai pedalaibao. Tialima, aga eno we bidi tomode me bidigobeo. 
Te Israel dabe augwaligo te bomai po tigidali sogo wali peyu emainao. Tama te bidigo te bidi dabe tigiba te wę segeni tigiba sąba, te bidi aga ugwa wę telayu yao. Tama bidi mego nogo te ąįba muani da, te bidi wiegi yai ma pedalobo te węba nogo dįąni da, teda te bidi eno gedude meda elalubo bidi pedalaibao, tama te tama elalubadi, te giliga dega saboba usu nigi paibao. 
Tialima, bidi me eno gedude wiegi yai isąwai bidi te nai meba dagana saibaso da, teda te nai dabe eno gedude meda yai elaluaibao. Tama te niwai bidi me te naiba dagana sali bidi me te meda elalubadi, giliga dega saboba usu nigi paibao,” te po wali. 
