﻿Mosesgo Godigo Bomai Po Ma Pusali.
1.
Te bukude te Mosesgo te Israel we bidibolo te bidi meni yai bulude augwali bidiyu, te po pusa mani buku dao. Te Jordan wę pąde, te giliga asobo badu, augwali te Jordan wę sesegede malu bulude bidai, te bulu Sup pąde. Tama hanu Paran te me badu pedai badu elaluali. Tama te hanu Tofel, me Laban, me Haserot, me Disahap, te gasa me badu pedai badu elaluali. 
Tialima, nage te bulu du Sainaidu hogodama, tama nage te Idom bulu du sunumidu peyu da, teda nage nogo si olama, deli sogo te bulu Kades Barneaba sabolaibao. 
Te Israel dabe augwali te Isip bulu taga soali te kibu be bidi sese si silama, tama te dei namba wan, te 11 poluade, Mosesgo te we bidibolo te God, Genuai Bidigo agabolo walali po pusali. 
Te sę te Genuai Bidigo te Sihon, te Amor dabego tuni bidi, aiyaba elaluama, nosali te po pusubo sę pedelai dao. Tuni bidi Sihongo te hanu Hesbon tonaluai dao. Tama Genuai Bidigo te tuni bidi Ok aiyaba elaluai dao. Te Basan dabego tuni bidigo te hanu si tonaluai dao, te hanu Astarot, me hanu Edrei. 
Te da, te Israel dabe augwali Jordan wę giliga asobo badu bidali sogo, te Moap dabego tǫ dage badu bidali sogo, Mosesgo te bomai po me te Godigo po page bugagia hanilama, tama te we bidibolo ola mabo gagalali. 
Mosesgo te po wali, “Da te Sainai bulu dude bidali sogo, God, dago Genuai Bidigo dabolo e tama po walai dao, ‘Dage e bulu dude bobobage sogo mu bidali dao. Eno homugo te usu dao. 
Dage te pesage tagalama, tama pelama, tama dage te Amor dabego bulu du buluba piąo, tama me te bulu pąde elalubo bulu dabeba me. Te da, te Jordan wę odogode elalubo bulu dao, tama te malu bulu me, bulu du bulu me, tama te tǫ dage me te saut badu elaluyu me, te genuai tamu wę Mediterenian pąbadu elalubo nambis tǫ me. Tama dage Kenan dabego tǫba piąo, tama me te bulu du Lebanon tǫ u badu me pelama, te genuai wę Yufretisba usu nigi pao. 
Te tigidali tǫ ena Genuai Bidi eno te tǫ duga wąįbolo mawaibao po dąų walai dao. Te Abraham, me Aisak, me Jekopbolo wai dao, me te augwaligo wąį nosali asobo bagebolo me. Tialima, dage megi pelama sigi piąo,’ wali,” Mosesgo te po wali. 
Tialima, Mosesgo te we bidibolo walali, “Hasia eno dagebolo e tiwai po walai dao. ‘Dage tonalubo sę genuai mu dao. Enaduba usu egobeo. 
God, dago Genuai Bidigo dage hauwa mu, te dagalude hǫ tiwai pedalumainu ilai dao. 
Eno homugo Genuai Bidi, dago wąįgo Godigo dage bidi hani hauwa umabo mu pedalumainu ebao. Tama eno homugo agai dagego tigidali nai dabe wiegi yai pedalumainu ebao, te agai dage dali hasia dąų wali gilama yali. 
Tiali goli, mena tama enaduba deligo dagego tigidali pogo hwįbo sęgę dodologowe? Ena usu egobeo. 
Tama tialima, dagego me badu koneai bidi dabe, me wiegi yai bidi dabe, me te tobolu bidi bidibo kolesaga koneai bidi dabe, dagego sa muiąo. Dagego augwali duga hani deli deli tomode sa muiąo. Tama eno augwali dage tonalumainogo sa muaibao.’ 
Eno te tama po wai, tama dagego te sę yabo usu dao po wai dao. 
Tama tialima, eno te polalubo bidi dabe, te koneai bidi dabe me, te wiegi yai tobolu bidi dabe eno sai dao. Te duga digi duga hani deli deli tomode sa muai dao. Tama eno augwali dagego tuni bidi bidimainu sa muai dao. Tama mebago te 1,000 we bidi tonaluyu, meba te 100 we bidi tonaluyu, mebago te 50 we bidi, me te nogo si we bidi tama tonalubo sę yai dao. Tiali me ma, eno deli deli hani tomode ofisa bidi deli deli sa mumuna pai dao.” 
“Tama te sogo eno te tobolu bidi dabe te e tama ola mawai dao, ‘Dagego olo bugagia munama, te we bidigo wabo po dabe bugagia odao,’ po wai dao, ‘te we bidi aga hasi tomode wabo po. Tama dagego te we bidigo wabo po bugagia osola suao, te duga abagi dabe tomode, ma te Israel hani isąwai bidi hani dabe dage tomode bidibo bagede pedalubaso me. 
Dagego te tigidali bidi dabe te deli kolesagago naga dodolao. Te aga genuai bidi me, ma olo bidi me. Tama dage bidi me delide wi me elamuo. Magi baso meni, God aga digi dagego homu kolesaga te po tų ebode dodolaibao. Ma, te sęgę genuai mu me elalubaso da, tama dodolabo usu isąbaso da, teda dagego ena pageba odasa asao, teda eno po tų odaibao.’ Eno augwalibolo te tama po walai dao. 
Tama te sogo me, eno dagego meba sę dabe yabo eno ola mawai dao,” Mosesgo te po wai. 
Mosesgo po geninama weyu, te po wali, “Dago te God dago Genuai Bidigo wali po wali pelama, tama dago Sainai bulu du taga solama, tama da te bulu me te mu dwai digi pai dao, te moni nai meni yai kemi sane buluba. Tama tedu peyu, da te Amor dabego bulu duba dabe sabolali. Da te bulu Kades Barnea sabolali sogo, 
eno dagebolo te tama po walai dao, ‘Megi da, da te Amor dabego bulu duba te sabolai dao,’ po wai dao. ‘Dago Godigo te bulu dagebolo megi mawainogo te ebao. 
Te tǫ suao. God dago wąį dabego Genuai Bidigo dagebolo megi mani dao. Dage pelama, teba duagi piąo, te agai dagebolo hasia wali gilama. Dage wi elama, homu hauwa me kųą pelamo dao.’ Eno te po wai.” 
“Tiali goli, dage ena pageba sabolama, tama dagego te po wali, ‘Polo beda, dago bidi meba polasa tagala palama, tama augwaligo polasa te bulu sa sugi pomainao. Tama augwaligo dago wali pabo sunumi wiegi yai deli ola momainao. Tama me augwaligo dabolo mena tiwai hanu elalubowe dabolo augwaligo omainao,’ wali. 
Eno homugo tiali dago te po wali peyu da, te usu yaibao homu yali. Tama tialima, dago nogo si olama si hanide eno te deli deli bidi dabe sa muai dao. 
Tama augwali te bulu du, me malu bulu me, te Eskol buluba dabe tama susa biligi pali. 
Augwaligo ni du dabe meba ma seselama, dabolo ma magasali. Tama augwaligo te po wali, ‘Te God, dago Genuai Bidigo dabolo megi maiabo tǫ, te tǫ ili hauwa mu elalualio,’ wali.” 
“Augwaligo te tama po wai goli, dagego God dago Genuai Bidigo wali po sela sąnama, tama dage te buluba pabo hagela homu yai dao. 
Dage duga ugwa be tomode dabe bidiyu, duga hasi po kųą pali. Tama dagego te po wali, ‘Genuai Bidigo da godolo ebeo,’ po wali. ‘Tama tiyu, agai da Isipdu oda selama, e buluba odasa asalio, tama da te Amor dabego nogoba muagasali dao. Tama augwaligo da dolaibao. 
Magi baso mu da te buluba pogowe? Da wi ebao. Te bidi dabe, dago te sa sugi pomainu tagala palali bidi dabe, augwali ma aselama, te po wagasali, “Te we bidi augwali boma pai, tama bobobage dili yai we bidi mu, te bulude bidibao.” Augwaligo te po wali. “Te we bidi dabe augwali te masigigo nigai bomai obo tomode bidibo, te dagalu dąį yai obo tomode bidibo. Tama te hanu dabede augwali te moni moni bidi dabe bida bida pabo suali,” te sa sugi pali bidi dabego dabolo te po wai,’ dagego te po wali.” 
“Tiali goli, eno dagebolo te po wai dao, ‘Dage te we bidi dabede wi igimio. 
God, dago Genuai Bidi, agai dage tudiba togolama aga bolo polasa paibao. Aga polasa pelama, hwįaibao, te dagego agai te Isip bulude ebo suali tiwai yaibao. 
Me, te nai meni yai kemi sane bulude yali me. Dagego gedugo polobadu suali, agai dage odasa asiyu yali kolesaga, me megi dage e bidibo te buluba me te sabalobao. Te da, te aya me deligo aga wai nogode tolasa bilibo tiwai te ebao.’ 
Eno te po dagebolo walio. Tiali goli, tegoba! Dagego te po odisąma bididuai. Tama dagego Genuai Bidiba homu dąų wabeo. 
Polobadu te aga polasa pelama, tama agai dage sunumi ola menama, tama agai dage duga ugwa be dabe sę yabo pesage ola mawaidu geai dao. Te hulide da, te aga polasa peyu, te sia bogoli me ebo tiwai elama, dage kegasa pai dao. Ma, ulade da, te pǫ me tiwaigo dage kegasa pai dao,” Mosesgo te po wali. 
Mosesgo te po wali, “Genuai Bidigo dagego po dogia pabo suali, tama aga haliga sębę mu yai dao. Tama tialima, agai po haninama, bomona weyu, te po wali, 
‘Dage dwai we bidi, dage eno duga wąįbolo mawaibao wali te buluba dage mu pogobeo. Mu menio. 
Kalep, te Jefunego ogwa deli digi, aga te buluba paibao. Aga ena dali deli homu mu eyu, agai deligo naga eno tigidali po wali palio. Tama tialima, aga dali, te aga ame nabo wai puluba dali sigo naga, eno te mabo tǫ suaibao,’ Genuai Bidigo te po wai.” 
“Te nosali badu me sogo deli te dage we bidi dabego yali kolesagago te Genuai Bidigo ena dali me sębę ebo sę ilali, tama agai te po wali, ‘Moses, nage me te bulu tomoba me pogobeo. 
Tiali goli, nago namba tu bidi Josua, te Nungo ogwa, deli naga teba paibao. Nago Josuago homu kolesaga dąų walao. Magi baso meni, agai te Israel dabe te buluba odasa pelama, te buluba bidigi paibao,’ wali.” 
“Nosali Genuai Bidigo da tigidalibolo te po wali, ‘Dagego wai bǫų dabego te dwai sę me wiegi yai kolesaga augwaligo me kuna dagalasiąyu ebo konebeo. Te augwali te wai puluba naga. Te augwali naga te bulu tomoba paibao. Dagego te po wali, te boi bidi dabego augwali elaibao, wali. Tiali goli, eno te bulu augwalibolo mawaibao. Tama augwali te bulude bidaibao. 
Tama dage genuai we bidi da, dage ma gelama, tama te nai meni yai kemi sane buluba ma soaiąo. Te tamu wę Ret Si, te Akaba, te buluba pabo sunumi badu soaiąo,’ wali.” 
“Tama dagego enabolo te po wali, ‘Hobedeo. Moses, dago Godigo gedude dago dwai sę yalio. Tiali goli, dago megi da te Amor dabe dali hwįgi paibao, te Genuai Bidigo dabolo wali gilama,’ wali. Tama dage deli deligo te hwįyu gudubo ugwa dabe gudama, tama dagego homugo te bulu du bidi dabe te olo nai tiwai dao homu yai dao, tama dagego augwali aiyaba elaluaibao homu yali. 
Tiali goli, Genuai Bidigo enabolo te po wali, ‘Dagego augwali habu selao. Tama augwali hwįgi pomainogo igio. Magi baso meni. Eno augwali tau sogobeo. Tama te boi bidi dabego augwali mu dolaibao,’ wali. 
Genuai Bidigo po eno dagebolo mani. Tiali goli, dagego agai po odobeo. Te dagego hagoma eyu, po sela sąnama, tama dage hogodama pelama, te boi bidi dabe dali subigila hwįgi pali, te bulu du buluba. 
Tialima, te Amor dabe augwali dagego te bulu dude te bidi gąǫ kelebo te nenemo tiwai bidibo dagego suali. Augwaligo dage pobeasa, te Horma buluba saboligi pali. Te Idom bulugo bulu du tomoba pali. Tama augwaligo dage sese tama mu dolali. 
Tama dage gela olama, tama Genuai Bidigo tau somainogo i wai dao. Tiali goli, agai dagego po me odobeo. Menio. 
Tama te tiali hagede dage te bulu Kadesde bobobage sogo mu bidai dao,” Mosesgo te po wai. 
