﻿Mosesgo Godigo Bomai Po Ma Pusali.
2.
Tama Mosesgo te po wali, “Tama nosali mu, da te ma geasa te nai meni yai kemi sane buluba pai dao. Tama da te tamu wę Retsiba pabo sunumi badu pai dao. Tama dago te Genuai Bidigo wali po wali tama pai dao. Tama da bobobage sogo mu te Idom bulude te bulu dude bilai dao,” wali. 
“Tama nosali Genuai Bidigo enabolo te po wali, 
‘Bobobage sogo mu dage e nai meni yai bulu du elalubo tǫde bilai dao. Tama megi dage te notba te badu pao.’ 
Agai te po dagebolo pusao obaso walai dao, ‘Megi da, dage te Idom bulu tomoba paibao,’ po wali. ‘Te da, te duga ama dabego tǫ dao, te Isogo wai hani dabego tǫ dao. Tama augwaligo dagede wi yaibao. Tiali goli, dagego augwali dali dua dao. 
Dagego augwali homu hogodama, te hwįainogo igimio. Magi baso meni. Eno augwaligo tǫ dage dwasianu dagebolo me magobeo. Menio. Eno te bulu du elalubo bulu Idom te Isogo wąį dabebolo naga polobadu mu mawai dao. 
Te augwaligo bulude dagego te wę dabe nai dabe abelagameo,’ Genuai Bidigo te po wali.” 
“Dagego te sę dabe gegeda pelamuo. God dago Genuai Bidigo da tigidali te wiegi yai sę naga yali. Agai dage wiegila mu te nai meni yai bulude bugagia mu tonaluali. Te kibu be bidi sese si 40 agai da bugagia tonalubao. Aga dage dali bidibao, tama dage magi nai me sǫą pabeo,” wali. 
“Tialima, da te sunumi te hanu si Elat me Esiongeber sidu gagalama asali. Tama te sigi ąį Detsiba saboligi pali. Tama da te nai meni yai bulu Moapba ma begasa pai dao. 
Tama Genuai Bidigo enabolo te po wali, ‘Dagego te Moap dabe dali dwai sę me elamo dao,’ po walio. ‘Augwali te Lotgo wąį hani dao. Tama augwali dali wąbi me hwįnamuo. Magi baso meni, augwalibolo eno te hanu Ar mawai dao. Tama eno augwaligo tǫ dage dwasianu dagebolo me magobeo,’ Godigo te po wali,” Mosesgo te po wai. 
(Te genuai bomai we bidi me deli, augwaligo augwali te Em hani wabo dao, augwali te bulu Ar wabo, te bulude augwali polobadu bidai dao. Augwaligo bobobage dili te Anak dabego dili bobobage tiwai elaluali. Te bidi dabego augwali te Refaim poai dao. Tama te Refaim dabe augwali te bulu Moapde bidibaso, te Moap dabego augwali te Em dabe dao po wai dao. 
Polobadu te Hor dabe te bulu Idomde bidai dao. Tiali goli, te Isogo wąįgo te hani dolama, tama te tǫ selama, tama te tǫde te bidibao. Nosali te Israel dabego me te deli tobage kolesaga naga elama, tama augwaligo Genuai Bidigo augwalibolo mani tǫ sai dao.) 
Tama Mosesgo po geninama weyu, te po wali, “Nosali dago Genuai Bidigo po wali gilama, te wę Seret nogeyu da, tama nogeai dao. 
Tama kibu be 38 dolo tama pela silama, te Kades Barnea taga solama, tama dago te wę nogeagasali sogoba tama usu nagasali. Tama te da Israel hani tomode elaluali hwįbo bidi dabe dago te Kades Barnea taga soabode bidai dao, te kibu be 40 tomode augwali sese tama isila silai dao. Te sę te yali da, te Genuai Bidigo wali gilama tama te pedalali dao. 
Tama Genuai Bidigo te bidi dabe dali boi bidi mu elama, tama augwali silibo si tama tagalali, augwali megi da dali me bidibo menio,” wali. 
“Te polobadu bidali Israel hwįbo bidi dabe augwaligo sabi bidi dabe isila silibo si, 
Genuai Bidigo te po wali, 
‘Megi tama dage te Moap dabego tǫ tomodu peyu, te hanu Arba pabo sunumidu pao. 
Tama dage te Amon dabego bulu pąba paibao, te Lotgo wąį hani bidi dabe bidalubo digi. Tiali goli, dagego te bage augwali te sębę elama, tama wado yabo sę me elamuo, magi baso meni, te tǫ eno augwalibolo mawai dao, tama eno te augwaligo tǫ dagebolo me te tǫ dage me magobeo,’ Genuai Bidigo te po wai.” 
(Te tǫ dage me te Refaim dabego tǫ dage dao po wabo dao. Magi baso meni. Augwali polobadu te tǫde bidai dao. Tiali goli, te Amor dabego te bidi dabe augwalibolo te Samsum dabe dao po wai dao. 
Tama augwali me te Anak dabe bobobage bidi dabe tiwai dao. Augwali hani te hauwa mu dao, tama augwali bomai bidi dabe mu bidai dao. Tiali goli, Genuai Bidigo augwali mu silama, tama te Amon dabego augwali hasegeliyu, tama te tǫ selama, tama augwali te tǫde bidibao. 
Agai te sę tiwai te Isogo hani dali elama, te Idom dabego bulu dude bidibo tiwai yalio. Tama Genuai Bidigo Hor dabe silali. Tama tialima, te Idom dabego augwaligo tǫ selama, tama augwali tede bidibao. 
Te tama tiali gilama, tama te ailan Krit hanigo te Av dabe ela silama, augwali tede bidibo gilama tiali. Augwaligo tǫ te genuai tamu wę Gasa pąba tama usu nigi pelama elaluali, te sautba polo badu. Tama te Krit dabego augwaligo tǫ selama, augwali tede bidali.) 
Tama Mosesgo po geninama weyu, te po wali, “Dago te Moap taga soali, tama Genuai Bidigo dabolo te po wali, ‘Megi da, dagego te Armon wę nogeao. Megi da, eno te Amor bidi dabe tede tagalaibao. Te Hesbon bulu bidi dabego tuni bidi Sihon, agai tǫ dali dagego nogoba muaibao. Tialima, dagego augwali dali boi dala palama, tama agai tǫ sabo gagalao. 
Megi tama, eno te tigidali bulu bidi dabe dagede wi emainogo ilaibao. Tialima, augwaligo dagego nogi odobo si da, teda augwali wi elama, didibili yaibao,’ Genuai Bidigo te po wali,” Mosesgo te po wai. 
Tama Mosesgo po geninama weyu, te po wali, “Tialima, da te bulu Kedemot kemi sanede bidali sogo, eno te Hesbon tuni bidi Sihonbolo wiegi yai po sela pabo bidi tagala palali. 
Augwali saboligi pelama, te po wagi pali, ‘Nago da nago bulu tomo sunumidu soabo usu dao po waibawe? Da te genuai sunumi delidu naga soaibao. 
Tama dago te wę me, nai me, olo me sogobeo. Menio. Teda dago abeliyu naga yaibao. Da olo nago bulu tomodu soaibao. 
Tama da te tomodu solama, te Jordan wę nogelama, te God dago Genuai Bidigo da mawainogo te wali tǫba paibao. Te Isogo hani te Idom bulude bidibo. Tama te Moap dabe te Ar bulude bidibo. Augwali sesego dabolo usu dao po olama, da augwaligo bulu tomodu soao po walio,’ te po sela pabo bidi dabego te bidi Sihonbolo te po wali.” 
“Tiali goli, tuni bidi Sihongo da agai buludu somainogo usu dao po wabeo. God dago Genuai Bidigo aga te hagoma homu ebo sę iliyu, aga homu dąų walali. Te dago aga aiyaba elaluama, tama agai te tǫ dago somainogo tama yali. Te tǫ megi da, te bidibao,” wali. 
“Tama Genuai Bidigo enabolo te po walali, ‘Odao, megi eno te tuni bidi Sihon me agai tǫ sese tama nago nogoba mubao. Te tǫ sabo gagaliyu, tede bidao,’ Genuai Bidigo tama wali. 
Tialima, te tuni bidi Sihon aga hani bidi dabe selama, tama da dali te hanu Jahas pąde hwįagasali. 
Tiali goli, God dago Genuai Bidigo te bidi aga ogwa dabe, me aga hani sese tama, dago aiyaba elaluama tama dago augwali ela silimainu ilai dao. 
Tama te sogo tama dago agai tǫ selama, tama dago agai hanu sese tama dolama tagalai dao. Tama dago te bidi sese tama ela siliyu, me dago augwaligo we wai dabe sese tama ela silai dao. Dago te bage me bidibadi me sulama tagalai menio. 
Tama dago te tigidali hanu dabede te tigidali kau kibu, me tigidali doado bage dago sai dao. 
God dago Genuai Bidigo te tigidali hanu dabe dolomainogo sula tagalai dao. Te moni hanu Aroerdu gagalama, te Arnon wę sesegede, me te wę sesegede elalua pabo bulu du tama pelama, te Gileat dabego tǫba usu nigi pali, te hanu me deligo da paliabo usu me ebeo. 
Tiali goli, da te Amon dabego tǫ pageba me pabeo, me te Jabok wę pageba me da me pabeo, me te bulu dude dabe elalubo hanu me, ma te gasa buluba me da pabeo. Te da, te God dago Genuai Bidigo da habu selai dao,” Mosesgo te po wai. 
