﻿Mosesgo Godigo Bomai Po Ma Pusali.
4.
Megi da, Mosesgo te we bidibolo te tama po walali, “Dagego eno megi dagebolo mabo po bugagia wali pobaso, tama dage bugagia bidiagameo. Tama dage duga wąį dabego God, Genuai Bidigo mawainu ebo tǫde bidiagameo, te dagebolo megi mabo tǫ dao. 
Te God dago Genuai Bidigo megi agai e mabo bomai poba dagego duga gesi noma bomai po me teba daganamuo, te megi eno dagebolo e mobao. Tama dagego te Godigo bomai po me deli sela sąnamuo. Dagego te bomai po tigidali tama wali piąo. 
Genuai Bidigo te bulu du Peorde yali sę duga digi polo te suali dao. Te bulude te dage tomode bidi hauwago te tibo god Balba lotu wali, tama Godigo augwali sese tama dolalio. 
Tiali goli, te dago God Genuai Bidide augwa homu mu kęą pai bidi dabe, dage da me te bidibao,” wali. 
“Edao. Eno dage tigidali haniani bomai po ola mena silali, te God dago Genuai Bidigo dabolo wali gilama tiai dao. Megi da, dage te bulu sigi pelama, tama tede duagi paibao. Tama dage te bulude bidiyu da, teda dagego te bomai po tigidali wali piagameo. 
Dagego te bomai po dabe mu tama wali piąo. Tama te gasa bulu bidi dabego te tiwai sę ebo konemainao, te dagego wiegi yai kolesaga elaluyu, me wiegi yai homu kolesaga hauwa elaluyu ebo augwaligo koneaibao. Tialima, augwaligo dagego te bomai po elalubo po odobo sogo, augwaligo te po waibao, ‘Tegoba! Te we bidi augwaligo wiegi yai kolesaga, me wiegi yai homu kolesaga elalubao,’ po waibao. ‘Augwaligo da mu edelama, mu elalubao,’ waibao,” Mosesgo te po wai. 
“Dagego meba we bidi dabe kone paliawe? Augwaligo genuai bomo da elalubadi goli, tagalao, augwali tau sabo god menio, te God dago Genuai Bidi da dali ebo tiwai. Tigidali sogo Genuai Bidi aga da dali pąde mu bidiyu, tama dago agaba i wabo si da, teda agai da polo tau sabo dao. 
Tama te gasa we bidi augwaligo te doloba pai bomo yai po augwaligo elalusiąwai, te eno dagebolo me e ola mabo haniani bomo yai po tiwai elalubeo. Mu menio. 
Dagego bugagia tonaluiąo. Te dage tigidali sogo e tǫde bidiyu, dagego duga te suali te nai dabe munu me gegeda pelamuo. Te Godigo yali sę suali te duga homude mu dąų walao. Dagego duga wai dabe, me waigo wai dabeba pusa mayu, 
te dagego te God Genuai Bidi pąde dolaluyu suali, te po pusao, te Sainai bulu dude. Te sogo Godigo enabolo te po wali, ‘Te tigidali we bidi i olama sisinao. Eno homugo augwaligo eno wabo po odomainao. Tama tiyu, augwali e tǫde bidiyu, ena dologode naga elalumainao. Tama augwaligo augwa wai dabeba me nosali ola menama, tama augwali me ena dologode elalumainao,’ Godigo enabolo te po wali.” 
“Godigo po wabo si, dage te bulu du sesegeba dolaluagasai dao. Tama sisi pǫ me hano sigo bulu du mesega selama, tama moni isi bogoli dagaluba holai dao. 
Tama Genuai Bidi te iside bidiyu, dage dali po wabo dagego odai dao, te agai digi po wabo. Tiali goli, te God e tiwai nai me deli da weyu, te agai tigi te dagego me subeo. Mu menio. 
Tama te sogo agai nogo si bomai po dagebolo menama, tama agai masigi sawali side asęai dao. Te bomai po te agai dage dali te po dąų waliyu, te tama tiai dao. Tama agai dagebolo te bomai po wali piąo po wai dao. 
Tama Genuai Bidigo enabolo dage agai megi mawainu ebo te tǫde bidiyu, wali pabo haniani bomai po meba eno dagebolo ola mao po wali,” Mosesgo te po wai. 
Te Mosesgo po geninama weyu, te po wali, “Te Sainai bulu dude te Genuai Bidi te isi dabo tiwai ebo tomoba bidagaselama, te dage dali po miani sogo, dagego te God e tiwai nai me deli da olama dąį ilibo dagego me subeo. Tama tialima, dage bugagia dolasa bidiąo, 
tiyu dagego tibo god me nigidali weyu. Ma, dagego tama tiyu da, teda dagego dwai kolesaga yaibao. Dagego te bidi piksa, ma we piksa, ma te hasa dabe piksa, ma ba piksa, ma te gula mane piksa, ma sųgų piksa me nigilama, dagego god dao olamuo. 
Tiyu dagego dagalude elalubo subo nai dabeba lotu po waidalio, te giliga, me polua, me hǫ dabeba lotu olamuo. Menio. God dago Genuai Bidigo te gasa we bidi dabego te nai dabeba lotu omainu sula tagalai dao. 
Tiali goli, dage da, menio. Godigo dage Isip bulude oda selama, dage eba odasa asali. Te dage te isi hobulude honialuai tiwai tama odasa soai dao. Tama agai dage odasa asali, te aga we bidi mu bidainogo odasa asai dao, te dage megi bidibo tiwai tama. 
Te dagego dwai kolesaga yaligo da, God dago Genuai Bidigo ena dali sębę yali. Tama agai po bomonama, hanilama weyu, te po wali, te ena te Jordan ąį nogelama, te wiegi yai tǫ elalubo te buluba pogobeo po wali, agai megi dagebolo mawainu ebo te tǫba. 
Eno te wę nogegobeo. Menio. Ena e bulude isaibao. Tiali goli, dage da, te wę nogelama, tama te wiegi yai ili yai tǫba bidigi paibao. 
Dage bugagia tonaluao. Tiyu dagego God Genuai Bidigo dage dali dąų walali te po dagego gegeda pabuo, dagego. Dagego agai po wali piąo. Tama dagego duga tibo tibo god dabe me geselamuo. 
Dagego te tama tilamuo. Magi baso meni, God dago Genuai Bidi, aga deli naga te God mu dao. Tama agai dage te gasa tibo godiba me lotu omainu sula tagalogobeo. God aga da, te posolai isi tiwai mu dao, tama agai aga boi bidi dabe ulama daibao,” wali. 
“Tama nosali, dage te tǫde bobobage sogo bidama, tama dagego wai dabe me dagego wąį wai puluba dabego me bidiyu, tama dagego dwai kolesaga eyu, dagego te tibo god me geselamuo. Ma, dagego te tobage nai dabe geseliyu da, teda dagego sęgę saibao. Te da, te Godigo gedude dwai kolesaga mu dao, tama te kolesaga aga sębę mu ilaibao. 
Odiąwe, megi eno te dagalu me tǫ si i obao, te augwaligo eno dage dali te wabo bomai po odomainu. Ma, dagego Godigo po sela sąyani da, teda dua dao. Godigo dage tigidali polo tama te tǫde sela sąwaibao. Tama dage te Jordan wę u badu elalubo te tǫde bobobage sogo bidigobeo, te dagego megi te sainu ebo te tǫde. Menio. Dage sese sia saibao. 
Teda Genuai Bidigo dage sese tama gasa buluba dabe subigila sela sąwaibao. Tama we bidi hauwa mu isila paibao, tama dage dwasianu we bidi naga te gasa haniani bidi hani tomode bidaibao. 
Tama te bulu dabede da, dage tibo godiba dabe lotu po waibao, te bidi dabego te masigigo me ni dabego nigai godide. Te god dabego te tonoyu, me odoyu, me po weyu, me nai tuyu, me nai denami odoyu me egobeo. 
Tama te sogo dagego homu hogodama, tama dagego duga dago God Genuai Bidiba ma asabo homu mu hogodaibao. Te dagego sese homugo me sese homu kolesagago aga gegabo homu yali da, teda dage aga pąba mu asiagameo. 
Tiali goli, dage genuai sęgę tomode bidibo sogo da, me te dwai nai dabe dageba pedalobo sogo me, teda dage homu begelama, ma geasa asama, Genuai Bidigo po wali paibao. 
Magi baso meni, aga te bidi hobede ebo God dao. Agai dage mu tagaliyu, ma dage mu dola siliyu me egobeo. Tama agai te dago wąį dali dąų walali te bomai po me gegeda pogobeo,” Mosesgo te po wai. 
“Dagego polobadu bidaliba ma kone paliawe, te dage ame nisąbadi? Tama me te Godigo hasia bidi me deli nigaliba kone palawe. Te dage te tigidali tǫba pobadi goli, tagalao, dagego te tobage genuai sę tiwai me pedalobo sugobeo. Te tobage sę po polobadu bidi mego odai elalubawe? Menio. 
God te isi tomode bidiyu, po wai dao, tama dagego agai po odai dao. Tiali goli, te bidi me te po polobadu odai goli, me isisąma me yai elalubadi bogo? Te menio. 
God dago Genuai Bidigo da Isip bulude oda selama, da te Isip hani tomodu dįą selama, odasa asu, da aga we bidi mu pedelai dao. Te dagego gedude agai haniani sę hauwa agai genuai bomogo yai dao. Agai te Isip dabebolo genuai gasi augwalibolo mayu, me agai augwali dali hwįyu yai dao. Tama agai gasi hauwa mayu, me agai haniani bidi noma sabo sę geninama mu yali, te augwali wi ma iliyu. Tialima, te gasa god mego te tobage sę me yai dawe? Mu menio. 
Genuai Bidigo te sę dabe ola mani da, teda dagego konemainu te yali dao, te aga deli digi naga God bidibao olama konemainu te yali dao. Tama te gasa God me bidibeo. Mu menio. 
Agai dage dodola ola mawainogo, tama tialima, agai dagego agai po dagaludu wabo odomainu tagaliyu te yali dao. Tama te tǫde dagego agai genuai isi dabo sumainu te yali dao, tama agai te iside bidiyu, dage dali po te wali dao. 
Genuai Bidigo duga wąį dabe godolo mu elama, tama agai dage aga we bidi mu bidimainu sa muai dao. Tama tialima, aga dage dali bidiyu, agai genuai bomogo dage Isip bulude oda selama, tama dage e buluba te odasa asali dao. 
Tama dage te asali sogo, agai te genuai boma pai we bidi sela sąwai dao, te augwaligo bomo te dagego bomo edelai bage. Agai te tama tiali da, te da agai dage odasa aselama, tama augwaligo tǫ dagebolo mawainu te yali dao. Te da, te tǫ dage megi bidibo, te tǫ te dao. 
Tama tialima, dagego te tiali sę gegeda pelamuo. Genuai Bidi aga te dagalude me tǫde God dao. Tama te gasa God me menio. Mu menio. 
Dagego agai bomai po tigidali wali piąo, te eno dagebolo mani te po. Tama tiyu da, dage me, duga wai dabe me, dage bugagia bidaibao. Tama dage te God, dago Genuai Bidi, te mabo te tǫde dage bugagia bobobage sogo mu bidaibao. Tama te tǫ tigidali sogo duga tǫ elaluaibao,” Mosesgo te Israel dabebolo te po wai. 
Nosali Mosesgo giliga asobo badu te Jordan wę badu agai hanu sela sa muani. 
Te hanu sela, te da, te bidi me deligo agai magi sę ebode geda muyu, olo bidi me ela muai yai baso da, te hanuba duala sigi peyu emainu. Agai hasia bolo te isai bidi dali dwai homu ebeo. Menio. Geda muyu, isilibaso da, te bidide po menio. Te bidi aga te hanu sela me deliba duala sigi peyu, wi pomainogo, tama wei ponobo bidi augwaligo aga elama isilibo usu egobeo, te habu selai dao. 
Te hanu sela te e tama dao. Te hanu me te Beser, te da te Ruben hanigo duala sabo hanu dao. Te da te bulu dude elalubo. Me da, te Ramot dao, te Gileat tǫ dage badu. Te da, te Gat hanigo duala sabo hanu dao. Tama me da, te Golan dao. Te da, te Basan tǫ dage badu. Te da, te Manase hanigo duala siyu yabo hanu dao. 
Mosesgo Godigo bomai po te Israel dabebolo mani. 
Agai te bomai po augwalibolo augwali te Isip bulu taga solama, tama augwali te giliga asobo badu te Jordan wę badu, te malu bulude bidibadi, te po mani, te Betpeorba tonobo badu polo badu. Te badu te tǫ te tuni bidi Sihon, te Amor dabego tuni bidigo tǫ dao. Polobadu agai te hanu Hesbonde bidiyu, te tǫ tonaluai dao. Tama Moses de Israel dabe augwaligo te bage augwali te Isip bulu tagalama asali sogo, augwali aiyaba elaluai dao. 
Tama augwali agai tǫde, me te Ok te Basan tuni bidigo tǫde augwali bidaluali. Te Amor dabego tuni bidi si te Jordan wę te giliga asobo badu bidai dao. 
Te Israel dabego polo sali tǫ te dąį te Aroerde gagalali, tama Arnon węba sabolama, tama pelama, te bulu du Sirion, te nogi me Hermon, teba saboligi pali. 
Tama me augwaligo te Jordan wę te giliga asobo badu tǫ sese tama sali, tama pelama, tamu wę Detsiba tama pelama, tama bulu du Pisgaba saboligi pali. 
