﻿Mosesgo Godigo Bomai Po Ma Pusali.
8.
Tama Mosesgo te po wali, “Dagego megi eno dagebolo mawainogo ebo te bomai po wiegila wali piąo. Tama tiyu da, dage bugagia bidiyu, tama dagego Genuai Bidigo dagego wąįbolo mawaibao olama dąų walali te tǫ sigi paibao. Tama dage tede hauwa mu pedalaibao. 
Dagego bugagia mu kone paliąo, God dago Genuai Bidi aga polasa peyu, tama agai dage te bobobage sunumidu asali tau sai dao. Dage te nai meni yai kemi sane bulude dage te kibu be bidi sese si 40, te tama te bulude bilai dao. Tama Godigo haniani sęgę taga palai dao, te dage usu sela suyu, te dagego te tigidali bomai po wali pogowe ma meniwe elama suainogo tiai dao. 
Te dage hagoma homu idali, agai dage nasi ilai dao, tama nosali agai dage te mana mawai dao, te dagego tumainogo. Te nai dagego me duga wąį dabego te tobage nai polobadu augwaligo me tuai menio. Agai te tama tiali da, te bidi dago konemainogo te yali dao, te bidi da te tubo naigo naga da bidibo ula sogobe da weyu, te yali dao. Menio. Dago Godigo po deli naga wali peyu da, teda da bidibo ula saibao. 
Te 40 kibu bede dagego ugwa dabe me pisila pai menio. Tama me dagego sągą dabe me, me bǫ dai menio. Meni, te bugagia naga tama bidali. 
Tialima, dagego koneao, te aya mego aga wai elama dodolainogo elebo tiwai elama, God dago Genuai Bidigo da te dodolali dao,” wali. 
“Tama tialima, dagego Godigo dagebolo yao wali te sę dabe wali pelama yao. Tama me, dagego agai bomai po wali pelama, tama aga dologode naga elaluao. 
Magi baso meni, God dago Genuai Bidigo dage te wiegi yai buluba te odasa pobao. Te bulude te genuai wę hauwa elaluyu, te ulu wę hauwa te ebao. Tama wę meba me te tǫ dologodu solama, tama te odogo bulude pedaliyu, meba te bulu dude pedaliyu ebo dao. 
Te bulude te nai wit elaluyu, me bali, me wain ni du, me ni fik du, me pomigranet ni du, me ni oliv du, me pusai bunu ge te hani elaluyu ebo bulu dao. 
Tama te tǫde dage nasi me elama, tama dage magi nai me sǫą pogobeo. Tama me te bulu masigi te ain elalubao. Me dagego te kapa dabe te bulu dude dabe gegeyu digagameo. 
Tama me dagego tuabo homu ebo nai dagego saibao. Tama dagego agabolo buba hwi po waiagameo, te agai te wiegi yai bulu dagebolo manide,” te po wai. 
Mosesgo po geninama weyu, te po wali, “Dagego bugagia tonaluiąwe, tiyu dagego God dago Genuai Bidi gegeda pidali weyu. Tiyu dagego Genuai Bidigo haniani bomai po eno dage megi mabo, te bomai po gegeda pidalio. 
Ma, dagego te tubo nai dabe hauwa eyu, me dagego wiegi yai be dabe sę eyu ebode, 
me kau kibu hauwa elaluyu, me sipsip kibu hauwa elalu ebode, me gol me silva, me te wiegi yai nai hauwa elaluyu ebode, 
teda dage dila pelama, tama hagoma homu elama, tama God dago Genuai Bidi gegeda pelamuo. Agai dage Isip bulude oda sai dao, te dage te olo sę ebo bidi bididuali pesagede. 
Tama aga digi aga te nai meni yai kemi sane bulude aga polasa dage nosaliba ilama, polasa pai dao, te dwai gula mane elaluyu, me te bidi gąǫ kelebo hwą dwai elaluyu ebo bulude tiai dao. Tama te bulude te mu wa pai me elaluyu ebo digi, agai te wę me te genuai dila pai masigi delide pedelemainogo elama ebode dagego te ąį tuai dao. 
Tama me te bulude agai dage mana mawai dao, dage tumainogo. Te da, te gasa nai me deli dagego wąį dabego polobadu me tusiąma yai nai dao. Tama agai sęgę dabe tagala palai dao, te dage usu siyu. Tama tialima, agai wiegi yai sę dageba nosali pedalomainogo tama yai dao. 
Tama tialima, dage homugo te wiegi yai nai dabe dena nogogo te nigilali dao, te homu me elamuo. Menio. 
God dago Genuai Bidigo dage te nai dabe hauwa somainogo te bomo mabo dao. Dagego te sę me gegeda pelamo dao. Agai te tama tibo da, magi baso meni, agai dagego wąį dali te dąų wali te po wali peyu, tama tibo dao. 
Dagego God dago Genuai Bidi me gegeda pelamuo. Tama dagego tibo god dabe wali pelama, tama augwaliba lotu po me olamuo. Megi eno haninama dagebolo bomona te walibao, ma dagego te po sela sąyani da, teda mu tama o, Godigo dage mu tama dolaibao. 
Genuai Bidigo dagego pabo sunumidu elalubo te bulu dabe dolai dao. Tiali goli, dagego agai po wali pisąma yali da, teda dage me te deli tiwai dene naga saibao,” Mosesgo te po wai. 
