﻿Mosesgo Godigo Bomai Po Ma Pusali.
9.
Mosesgo te po wali, “Israel dabe, dagego odao. Tamadi tama, dage te Jordan wę nogelama, tama dagego te genuai hani bidigo tǫ sigi paibao. Augwaligo bomogo da, dagego bomo edelama elalubao. Augwaligo hanu genuai hauwa mu elaluyu, me augwaligo hanu masigigo nigai obo te ugwanu mu holama, te dagaluba usu nigi pai elalubao. 
Te bomai we bidi augwali bobobage dili elalubao, tama augwali genuai we bidi mu dao, tama dage polo odai dao, te bidi mego augwali dali hwįbode elaluabo bidi deli me menio. 
Tiali goli, dagego megi bugagia mu koneagameo, God, dago Genuai Bidi, aga bolo polasa paibao, te isi hobolu tiwai elama polasa paibao, te dage tudiba togolama. Te dage pabo sogo agai augwaligo bomo aiyaba elaluaibao. Te dagego augwali dali hwįnama, tama augwali aiyaba elaluama, tama polo sela sąwaibao, te agai polo dąų walali gilama,” Mosesgo te po wai. 
“Te God dago Genuai Bidigo augwali polo sela sąbo side, tiyu duga hasi duga digi te po olamuo, ‘Godigo da te tǫ mani, magi baso meni, agai da suali, da te wiegi yai doloba pai bidi tiwai suali.’ Te tobage homu ebo te mu po menio. Genuai Bidigo suali, megi te tǫde bidibo we bidigo augwaligo dwai kolesaga hauwa mu ebo, tama tibaso agai augwali tede sela sąwaibao. 
Dagego homugo tilamuo, dago wiegi yai doloba pai kolesaga ebo dao homu elamuo, tama te tama tibo pagede Genuai Bidigo dago te tǫ somainogo sula tagalali dao homu elamo dao. Menio. Agai augwali sela sąwaibao, magi baso meni, augwali te dwai bidi dabe dao. Me ma, agai te wąį dabe dali dąų wali po usu nainogo te ebao, te dago wąį Abraham, me Aisak, me Jekop dali. 
Mu tama, te tǫ ili hauwa elalubo tǫ dao. Tiali goli, Genuai Bidigo te tǫ dagego wiegi yai doloba pai kolesaga ebaso dagebolo me mabeo. Menio. Dage te po odisąwai hagoma ebo homu ebo we bidi naga dao,” wali. 
“Dage te nai meni yai kemi sane bulude bidali te gegeda pelamuo. Te dage tede bidiyu, dagego Genuai Bidi sębę ilali, te gegeda pelamuo. Dagego te Isip taga solama, megi e bulu bidibode dagego Genuai Bidigo po sela sąyu idu geai dao. 
Tama me, te Sainai bulu dude dagego Genuai Bidi sębę dwai mu ilama, tama dage pąde dolainogo yai dao. 
Ena te bulu duba holama, tama te masigi si sigi painogo pai dao, te masigi pedai side agai dage dali dąų walali te po asęai dao. Ena te giligade me hulide te bidi sese si 40 bubugade tede bidai dao, tama eno nai me tuyu, wę me tuyu me yai menio. 
Tialima, Genuai Bidigo enabolo te masigi pedai si mani, te masigi pedai side agai dagebolo mani te bomai po tede aga nogogo digi asęani, te dage te bulu du pagede bidiyu, aga te isi tomode bidiyu yali sogo,” wali. 
“Ena te bulu dude te bidi sese si 40 dei bidai dao. Tama Godigo enabolo agai te dąų wali po asęani te masigi mawai dao. 
Tama agai enabolo te po walali, ‘Nage te bulu du tagalama, tama nage aiyaba polo dulao. Magi baso meni, te we bidi nago te Isipde odasa asali, te we bidi augwaligo dwai dwai kolesaga hauwa mu ebao,’ te po wali. ‘Polo tama augwaligo eno bomai po togolama, tama augwaligo tibo god me geselalio,’ wali.” 
“Tama Genuai Bidigo enabolo po geninama weyu, te po wali, ‘Eno polo koneanio, te we bidi augwali tobolu mu gagea pabo o. 
Tama tialima, eno augwali sese mu tama dola silaibao, tama bidi mebago augwali me konegobeo. Nago ena me togolamuo. Eno te tama tilama, tama nage nosali moni genuai bomai hanigo aya nigilaibao, te dwai we bidi dabe edelama ilaibao,’ Genuai Bidigo enabolo te po wai.” 
“Tialima, eno te Godigo dąų walali te po asęani te masigi pedai si selama, tama ena te bulu dude ena aiyaba dulai dao. Tama te sogo genuai isi bogoli te bulu dude dai dao. Tama agai bogoli ugwaba mu holai dao. 
Ena aiyaba polo dulama, suali da, dagego te bomai po mu tama bolama, tama God dago Genuai Bidiba tudi ola mawai suai dao. Tama dagego tibo godigo piksa kau kibu noma te golgo nigai dao. Tama te kolesagago dagego God bolo te sęgę sai dao. 
Tama tialima, dagego gedude eno te masigi si tǫba sąnama, tama te masigi pedai si tama tomode si togwa pai dao. 
Tama deli sogo ma deli ena Genuai Bidi pageba pelama, tama ena gesabidi tǫ aiyaba ilama, pila muani. Ena pila mudubadi, te giligade me hulide te bidi sese si 40 dei tama yali. Tama eno magi nai me wę me tuai menio. Eno te tama tiali, magi baso meni, dagego Genuai Bidigo gedude dwai kolesaga elama, agabolo sęgę selama, tama aga sębę ilai baso. 
Genuai Bidigo dage dali sębę mu elama, tama agai dage mu tama silabo homu yali. Tama tibaso, ena wi mu genuai yali. Tiali goli, eno gedu haluasa po olama, tama Genuai Bidigo eno po ma odali. 
Tama Genuai Bidigo Aron dali wado genuai mu yali, tama agai aga ela muainogo yali. Tama tibaso, eno Aron me dage tau somainogo gedu haluasa po wali. 
Dagego te kau kibu wai geselama, tama dage sęgę sali. Tama tibaso, eno te kau kibu selama, tama eno isiba sąwani, tama eno tigidali miminama, tama tigidali tama hogomu tiwai gagawali, tama eno te hogomu te bulu dude gomo elalubo węba aiyaba gea palali,” Mosesgo te po wali. 
“Tama me dage te bulu Masa, me te bulu nogi Isigo Dai wabo, te bulude, me te We Bidi Hasa Tuainogo Gela Hauwa Wali Te We Bidi Gų Page nogi wabo bulude me, dagego God dago Genuai Bidi sębę ilai dao. v 
Me polobadu agai dagebolo te Kades Barneade agai dagebolo mawaibao wali te buluba bidigi piąo wai goli, dagego agai po sela sąwai dao. Tama dagego agai po mu dao olama, agai po wali me pai menio. Mu menio. 
Te ena dage dali sę gagalama, dage dali megi bida bida asoboba tama, dagego God dali tobolu gagea pabo dao,” wali. 
“Tama tialima, dage te bulu du sesegede bidibadi, ena te bulu duba holama, tama ena gesabidi tǫba ilama, tama ena bidi sese si 40 dei tama ena pila muai dao. Eno te tama tiali, magi baso meni, Genuai Bidigo dage sese tama dola silaibao obaso. 
Tama eno gedu haluasa po weyu, te po wali, ‘God, Genuai Bidi, nago naga we bidi doligio,’ te po wali. ‘Naga digi nago te we bidi augwali nago genuai bomogo Isip bulude oda selama, odasa asai dao. 
Nago Abraham, me Aisak, me Jekop, te bage koneao, naga sę bidi dabe. Tama nago te e we bidigo sęgę, me dwai kolesaga, me dwai augwaligo geda mubo kolesaga kone me igio, te sula tagalao. 
Tiyu te Isip dabego nago te we bidi augwali te nago augwalibolo mawaibao te tǫba odasa pabo usu egobe po wabuo. Tama tiyu, agai aga we bidi te nai meni yai buluba ela isila silainogo odasa pali dao wabuo. 
Hobede mu tama, Genuai Bidi, nago te we bidi naga we bidi mu dao olama, sa muai dao. Tama naga genuai bomogo augwali Isipde oda selama, odasa asai dao. Tama tialima, nago augwali doligio,’ eno te gedu haluasa po tama wali,” Mosesgo te po wai. 
