﻿Mosesgo Godigo Bomai Po Ma Pusali.
11.
Mosesgo augwalibolo te po wali, “Dagego God dago Genuai Bidi godolo mu yao, tama agai haniani bomai po tigidali sogo wali piąo. 
Dagego Genuai Bidigo da ola mayu, agai haniani bomai sę hauwa ebo dagego suai dao. Duga digi duga te sę dabe ebo suai dao, te dagego wai dabego menio. Menio. Dagego Godigo bomo suali, te genuai mu dao. 
Tama dagego suali, Genuai Bidigo te we bidi noma sabo kolesaga me ebo suali. Tama me dagego te Isip tuni bidide me agai bulude yali, te kolesaga tigidali dagego suai dao. 
Dagego suai dao, Genuai Bidigo te Isip ami bidi dabe augwa hos kibu me karis dabe sese tama ela silibo suai dao, te augwaligo dage pobeasa asali sogo. Agai te tamu wę Retsigo augwali mesega somainogo yai dao. 
Duga digi duga polo koneai dao, te Genuai Bidigo dage tau sainogo yali sę dabe koneai dao, te nai meni yai kemi sane bulude, te dage megi da e bidibo buluba sabolisąma ebadi. 
Tama me, dagego agai te Datan de Abiram side yali sę me koneai, te Eliapgo ogwa si, te Ruben hani bidigo ogwa si. Dage tigidaligo te tǫ peda pelama, tama te bidi si augwa we wai, me augwali sigo ugwa be, me augwa doado bage sese tama te tǫ dedageba tulalubo suai dao, tama te tǫgo augwali sese tama ma halua sabo suai dao. Te dagego wai dabe augwaligo te sę dabe suai meni. Menio. 
Mu tama dao, duga digi Godigo te genuai sę dabe yali suai dao,” Mosesgo te po wali. 
Te Mosesgo po geninama weyu, te po wali, “Dagego eno dagebolo megi mabo te bomai po tigidali mu tama wali piąo. Tama tiyu da, teda dage te ąį nogelama, u badu pelama, tama dagego megi sigi painogo ebo te tǫ sigi pabo usu yaibao. 
Tama dage te wiegi yai tǫ ili hauwa elalubo, te tǫde dage bobobage sogo mu bidaibao. Te da, te Genuai Bidigo duga wąį nǫų dabebolo mawaibao olama po dąų wali te tǫ tama agai te tǫ dagebolo me mawaibao, dage da te bagego bulai wai dabe dao. 
Te bulu dagego megi sainogo ebo, te bulu te Isip bulu tiwai menio. Te dage polobadu bidali te bulu tiwai menio. Menio. Te dagego Isip bulude te gide nai bulama, dagego giba wę tulama usabo bomai sę mu yai dao. 
Tiali goli, te bulu dagego megi sigi painogo te eba te bulu da, te bulu du dabe elaluyu, me odogo bulu elaluyu yai digi, tama tulubage te giba dabe tuluyu ebo dao. 
God dago Genuai Bidigo te tǫ tigidali polua me kibu bede bugagia tonalubo dao, sesemane sogo,” wali. 
“Tama tibaso, dagego eno megi dagebolo e mabo te bomai po bugagia wali piąo. Dagego God dago Genuai Bidi godolo mu iyąo, tama dagego haligade, me homu kolesagade sese wiegi yai homu pemene mu agai sę eyu yao. 
Tama dagego te tama tiyu da, teda agai tulubage te gi bugagia tau sabo sogo tulubage dagego giba dabe tagala palaibao. Tama tiyu, dagego nai dabe hauwa mu elaluyu, me wain dabe, me oliv wel dabe usu me elama, mu elaluaibao. 
Tama dage nai me sǫą pogobe, me dagego kau kibu dabego tuabo nosai dabe hauwa mu elaluaibao,” wali. 
“Dagego gasa hani bidi dabego dagego homu kolesaga dolomainogo sula tagaligimio. Tiyu, augwaligo dagego homu kolesaga dolai madi, dagego duga Genuai Bidi gegeda pelama, augwaligo tibo god dabeba lotu olama, tama te tibo godigo sę dabe eyu yabuo. 
Tialima, dagego te kolesaga wali peyu da, teda Genuai Bidigo dage dali sębę yaibao. Tama agai tulubage paliama, tama tǫde wę meniama, tama nai dabe me hologobeo. Tama polo tama, dage te Genuai Bidigo dagebolo te wiegi yai tǫ bulu mawainogo ebo tǫde polo isaibao,” Mosesgo te po wali. 
“Dagego homu kolesaga me, dagego homu me, te e bomai pogo pągąnama elaluao. Dagego te bomai po dabe asęnama, tama dagego nogode me gesabidide dagana kęyu yao, tama dagego augwali me gegeda pogobeo. 
Tama dagego te bomai po duga wai dabebolo me ola maiąo. Tama dagego te bomai po tigidali miąo. Te dage duga bulude bidibo sogo, me digibulu bidiyu, me te sę ebo sogo, me olo toma tubo sogo, te bomai pode po miąo. 
Dagego te bomai po duga be sunumide, me obo bogi pabo sunumide, te bomai po dabe asęiąo. 
Tialima, dagego tama tiyu da, teda dage me duga wai dabe dage bobobage sogo mu God dago Genuai Bidigo dago wąįbolo mawaibao wali te tǫde dage bobobage sogo mu bidaibao. Dage te tǫ tigidali sogo bidaibao, te dagalu te tǫ ugwadu tigidali sogo elaluaibao tiwai tigidali sogo bidaibao,” wali. 
“Dagego eno dagebolo obao te po tigidali wali piąo. Dagego God dago Genuai Bidi godolo mu iyąo, tama agai po tigidali bugagia wali piąo, tama dagego homugo agaba bugagia kęą peyu yao. 
Tama tiyu da, agai te meba gasa bidi hani dage augwali pąba pabo si, augwali sela sąwaibao. Tama dage te genuai bomai we bidi hanigo tǫde dage bidaibao, te augwaligo bomo dagego bomo edelama elalubo bagego tǫde dage bidaibao. 
Tama tigidali tǫ dage bilaiba tǫ, te tigidali tǫ duga tǫ gagawaibao. Dagego tǫ dąį te olo kemi sane bulu te saut badu gagalama, tama pelama, te Lebanon bulu duba usu nigi paibao, te not badu usu nigi paibao. Tama dąį te giliga asobo badu te wę Yufretisdu gagalama, tama pelama, te genuai tamu ąį Mediterenian te giliga dega sabo badu te usu nigi paibao. 
Tama dagego sunumi togolabo bidi mu meni yaibao. Tama me dage tigidali e tǫ dage mena badu pabo si da, teda God dago Genuai Bidigo te we bidi dabe dwai wi mu ilaibao, te agai polobadu dąų walali gilama,” Mosesgo te po wai. 
“Odią, eno dagebolo sunumi si ola mobao, te dagego me deli selama, wali pao. Te sunumi me deli da, te Godigo dage tau sabo sunumi dao, tama me sunumi da, te agai dage dolabo sunumi dao. 
Ma, dagego God dago Genuai Bidigo bomai po wali peyu da, te eno dagebolo megi e mabo te po wali peyu da, 
teda Godigo dage dali wiegi yai sę yaibao. Tiali goli, dagego Godigo po wali pabo sunumi dega muyu da, tama dagego tibo godiba lotu po wagi peyu da, te dagego polobadu lotu me wasiąma yali teba lotu obaso da, teda Godigo dage dolaibao. 
Te Genuai Bidigo dage odasa agai dagebolo megi mawainogo ebo te tǫba odasa pabo si da, teda dage te bulu du Gerisim me bulu du Ebal teba piąo. Tama te bulu du Gerisimde dagego Genuai Bidigo dage dali yaibao wali te wiegi yai sę po dabe nogi iyąo. Tama te bulu du Ebalde da, dagego te Godigo dage dali dwai sę yainogo yali te sę dabe po nogi iyąo. 
Te bulu du si te Jordan wę giliga dega sabo badu te elalubao, te Kenan dabego tǫ, te Jordan wę odogo malude. Te bulu du si te giliga dega sabo badu elalubo, tama te tedali gasagi yai te ni sili pąde, te More bulude, te Gilgal hanu pąde. 
Tamadi tama, dagego Jordan wę nogelama, tama God dago Genuai Bidigo dabolo mawaibao wali te tǫba bidigi paibao. Dagego polo selama, tama dage teba bidigi peyu da, 
teda dagego bugagia koneama, tama dagego eno dagebolo megi mabo te bomai po bugagia wali piąo,” Mosesgo te po wali. 
