﻿Mosesgo Godigo Bomai Po Ma Pusali.
12.
Tama Mosesgo po geninama weyu, te po wali, “Te e bomai po bugagia mu odiąo. Genuai Bidi, dagego wąįgo God, aga te u badu tǫ dagebolo mawaibao wali, te tǫ dagego mu somainogo yali. Tama tialima, dage te tǫba bidigi pelama, tama tede bidada peyu, bidada pidubadi, dagego te bomai po dabe bugagia dolo naga wali mu piąo. 
Tama dage te bulu dabe polo sabo si da, dagego te we bidigo tibo godiba lotu wabo pesage dolama, mu silao. Te bulu dabe te genuai bulu dude, me dwasianu bulu dude te elalubao, me te moni genuai ni silide te elalubao. 
Augwaligo te lotu wabo alta me, te masigi pos dabe me dolama, tagalao. Tama dagego te we god Asera augwaligo nigo nigali te piksa me tama sigi hwą selama, te tibo godigo piksa dabe togolama, tagalao, te augwaligo nigali te tibo god piksa. Tama tiyu da, augwali teba pelama, lotu po ma wagi pidali weyu,” wali. 
“Dagego dago Genuai Bidi dago Godiba lotu po wabo sogo, dagego te tibo godiba lotu po wabo bidi dabego ebo kolesaga elamo dao. 
Genuai Bidigo dage lotu po wabo pesage me deli dage hanigo tǫde sa muaibao. Tama te pesagede naga te we bidi augwali pąba aselama, tama augwali agaba lotu po omainao. 
Tama te pesagede dagego te duga te haniani ofa iyąo. Te da, te isigo sese dela silibo te ofa, me te gasa meba ofa dabe tama yao. Tama dagego te nai dabe sese nogo si dobola silama, tama nogo si olama, deli Godibolo mao. Dagego te nai bugwai me deli te lotu wabo pesageba sesao. Tama me dagego meba gasa nai dabe Genuai Bidibolo mawainogo ebo, te nai dabe me seselama, tama me dagego dąų wali te poba usu nabo te ofa yabo nai dabe, me te duga homugo maiabo homu ebo, te ofa yabo nai, me te kau kibugo hasia ame nani te kibu gǫų dabe me, te tigidali tama seselama, ofa igi pao. 
Te pesage da, te God dago Genuai Bidigo gedude, te dage me duga we wai dagego tuyu, me dage wiegi yai homu pemene yabo madi da, magi baso meni, te Genuai Bidigo dagebolo bomo mayu, tama tigidali dagego yali sę te wiegi yai pedelai baso, tama tiagameo,” wali. 
“Tama dagego te lotu wabo pesage deli nigilama da, teda dagego duga digi duga homugo subigila lotu po waba, te kolesaga me elamuo, te dagego megi ebo gilama. 
Magi baso meni, dage Genuai Bidigo dagebolo mawainogo ebo te tǫba dage me sabalobeo. Dage te bulude bugagia bidama, tama te bulude bugagia toma tuyu bidagameo. 
Dage te Jordan wę nogebo si da, teda Genuai Bidigo dagebolo te tǫ mawaibao, tama dage te tǫde bidimainu yaibao. Agai dage bugagia tonaluyu, tama te boi bidi dabe dage pąba me asogobeo. Tama tiyu, dage homu nagame elama bidiagameo. 
Genuai Bidigo agaba lotu wabo pesage deli aga sa muaibao. Tama te pesagede da, dagego eno megi dagebolo wali te nai dabe sesiąo. Tama te ofa da, te isigo sese dela silibo ofa, me te meba ofa dabe me, te tigidali nai bugwai me badu te ofa me, te me gasa nai dabe dagego Genuai Bidibolo mawainogo yali, te ofa me te wiegi wiegi yai nai dabe te dąų wali te po usu nabo, te nai dabe tama sesao, te eno hasia polo wali. 
Tialima, dage, me duga wai dabe, me duga sę ebo we bidi, me te Livai dabe te dagego hanude bidibo, te bage dage sese tama Genuai Bidi pageba pelama, tama agaba wiegi yai homu pemene mu igi piąo. Dagego Livai dabe bugagia mu koneawe, magi baso meni, augwaligo tǫ mu menio. 
Dagego duga homu kolesagago niga selama, tama ofa subigilama olo madi tede ela biligimio. 
Dagego ofa te Genuai Bidigo dage hani mego pesagede te sa mubo, te pesage delide naga dagego ofa eyu yao. Te pesage delide naga dagego te isigo dela silibo ofa eyu, me te gasa meba ofa dabe eno dagebolo polo wali, te ofa dabe tama iyąo,” wali. 
“Tiali goli, dage bidibo pesagede dabe da, te hasa dabe ela tubo da habu me selebeo. Te tigidali nai dabe Genuai Bidigo dagebolo mani, te nai dabe da, dagego tuabo nai dabe naga dao. Dage sesego tama tuiąo. Te dage Godigo gedude wiegi yai bidi me, o te Godigo gedude meda yai bidi dabe, dagego mu tuiagameo. Dagego te olo pesage dabede tuiagameo, te dagego olo bulu hasa dabe tubo yali gilama tuiąo. 
Tiali goli, dagego augwaligo kaneme tulamo dao. Mu menio. Dagego tǫba olo wę yali gilama, olo tǫba gea palao. 
Dagego te nai dabe da tuiagameo. Tiali goli, dagego Genuai Bidigo ofa duga bulude tulamuo. Te ofa nai dabe da e dao. Te nogo si wabo te wit dabe, me te wain, me oliv wel, me te kau kibugo gomunai wai, me sipsip kibugo gomunai wai, me te dagego Genuai Bidi dali dąų wali po usu nabo, te nai dabe me te duga homugo mabo, te ofa me te gasa meba ofa dabe. 
Dage me duga wai puluba, me duga sę ebo we bidi dabe, me te Livai dabe dagego hanude bidibo, te bagego dage dali te ofa tuiagameo. Tiali goli, dagego te ofa te God dago Genuai Bidigo bulude tuiagameo. Te pesage delide naga Genuai Bidigo te lotu po wabo pesage magi ilaibao. Dagego te pesagede tuyu, tama dage duga te wiegi yai nai dabe bomai sę elama, nigilalide wiegi yai homu tede iyąo. 
Tama tigidali sogo dage te tǫde bidiyu da, dagego te Livai dabe tau sabo gegeda pelamuo,” wali. 
“Nosali Genuai Bidigo dagego bulu genuai mu igi pabo si da, te agai te po polo dąų walali gilama ebo si da, teda duga homugo mena sogo duga hasa dabe tuabo homu ebaso da, tuiagameo. 
Tialima, te lotu wabo pesage digibulu mu yaibaso da, teda dagego eno wali po sao. Dagego te kau kibu o sipsip kibu elao, tama dagego te hasa dabe duga bulude tuiąo, te Genuai Bidigo mani, te nai dabe. Dagego te sę tigidali sogo dagego godolo ebo sogo tama tiao. 
Te Godigo gedude wiegi yai bidi me o te Godigo gedude meda yai bidigo me te hasa dabe tuiagameo. Te augwa te bulu hasa dabe tubo gilama tama tuagameo. 
Tiali goli, dage te hasa dabe augwa kaneme dali dagego tulamo dao. Magi baso meni, kaneme da, te tigidali bidibo nai dabego bomo mabo page nai dao, tama dagego te bidibo ula mabo nai te kaneme tugio. 
Dagego te hasa dabego kaneme tugimio. Menio. Dagego te tǫba olo wę gea palobo tiwai tama tǫba gea palao. 
Tialima, dagego te hasa dabego kaneme tusiąma ebaso da, teda Genuai Bidigo dagego kolesaga godolo yaibao. Tama agai dagego sę dabe me agai wiegi yai pedalomainogo yaibao. 
Tiali goli, dagego te ofa me aga dali dąų walali te po usu nabo te ofa dabe te Genuai Bidi agai te sa muabo te pesageba pelama, tama te ofa lotu wabo sa muabo te pesage deliba naga sela piąo. 
Tama te pesagede dagego te isigo sese dela silibo ofa me uluyu, me te mi, me te kaneme sese tama Genuai Bidigo alta saide ulao. Tama meba ofa dabe dagego kaneme dabe sese alta bogo baduba gelama, tama te mi dabe da, dagego tuiagameo. 
Dagego eno te mani te bomai po tigidali bugagia wali peyu da, tama Genuai Bidigo dagego me duga waigo wai dabego sę dabe sese tama tigidali sogo wiegila mu pedalomainogo yaibao. Magi baso meni. Dagego Godigo gedude wiegi yai doloba pai kolesaga naga yaiba weyu, te God dago Genuai Bidigo gedude,” Mosesgo te po wali. 
Tama Mosesgo po geninama weyu, te po wali, “Genuai Bidi, dago God, agai te tigidali we bidi hani sese tama dage augwaligo buluba pabo si, augwali sese tama dola silaibao. Tama dagego te tǫ selama, tama tede bidiagameo. 
Te Godigo augwali dola silibo si da, teda dage bugagia dua dao, tama augwaligo lotu wabo kolesagade habu selama, tama augwaligo lotu wabo kolesaga wali pelamuo. Tiyu dage augwaligo kolesaga wali peyu da, teda dage isaibao. Tiyu dagego te po wabo, ‘Te bulu badu olo bidibo bagego lotu po mena tama wabowe’ wabo. ‘Teda dago me te tobage kolesaga elama, lotu po waina,’ te po wabuo. 
Te dage Genuai Bidi dago God agaba lotu po wabo sogo da, dagego te Godigo po odisąbo bulu badu bage augwa lotu weyu ebo kolesaga me elamuo. Menio. Te bage augwali lotu po augwa te tibo godiba lotu weyu da, augwaligo te Godigo godolo isąwai haniani dwai sę ebo dao. Augwaligo te e tama me tibo dao, augwaligo augwa wai bǫų dabe meba elama, tama te alta saide te ofa ulubo dao,” Mosesgo te po wai. 
“Dagego eno dagebolo walali te sę dabe naga eyu yao. Te gasa bomai po ugwadu ma daganebo, me te bomai po me deli sela sąbo tagalao, te habu mu dao,” Mosesgo te po wai. 
