﻿Mosesgo Godigo Bomai Po Ma Pusali.
21.
Tama Mosesgo po geninama ma weyu, te po wali, “Te dagego te bidi dabe mebago te ela muai bidigo tigi isai munalubo, te Godigo dagebolo mawainogo ebo te tǫde munalubaso da, teda dego elaliwe, dagego konesiąma ebaso da, 
teda dagego e tama tiao. Te tobolu bidi dabe, me te augwa jas dabe oda selama pelama, te bidi tigi munalubo tedu gagalama, tama pąde elalubo hanuba usu siyu, usu ni sesa pao. 
Tialima, te pąde elalubo hanu page tobolu bidi dabego te kau kibu so te sę dabe isąwai sa muao. 
Tama augwaligo te kau kibu te sula sisąbo wę pąba sela pelama, tama te tǫ pedai te bidigo gi isąwai digi, augwaligo te kau kibu elama, mage togwa. 
Tama te pris dabe, te Livai hani bage, augwali me te pesageba pomainao. Magi baso menio. Augwaligo te bidi mego te gasa bidi me elai baso, te po tų odobo sę ebo bage dao. Genuai Bidi dago God agai augwali sa munama, agai sę elama, tama te Godigo nogi te we bidibolo ola mayu, te Godigo augwali dali wiegi yai sę yaibao po weyu yabo bage dao. 
Tialima, te hanu pąde elalubo tobolu bidi dabe augwaligo te kau kibu daide augwaligo nogo ąį telamainao. 
Tama augwaligo te po wao, ‘Dago te bidi ela mubeo,’ po omainu yao. ‘Tama dago konebeo, te dego te sę yaliwe,’ po omainao. ‘Genuai Bidi, nago da te Israel we bidi dabego sęgę sela sąyao. Nago da Isip bulude ma oda sai dao,’ po wao. ‘Te bidigo dwai sę me isąbadi, augwaligo aga ela muani dao. 
Tama nago homugo te dwai sę yali te page dade elalubo homu elamo dao,’ augwaligo te tama po wao. 
Tialima, dagego te wiegi yai doloba pai kolesaga Genuai Bidigo gedude tama eyu da, teda Genuai Bidigo te po waibao, ‘Dagego te dwai kolesaga geda munama, te bidi ela mubeo,’ po waibao,” Mosesgo te po wai. 
Tama Mosesgo po geninama weyu, te po wali, “Te Genuai Bidi dago God agai dage tau selama, tama dagego te boi hwįbo gasa bidi aiyaba elalubaso da, tama dagego te boi bidi dabe meba kalabus ilibaso da, 
te bidi me deli dage hani tomode agai te sawi yai we me deli te kalabus yali bidi hani tomode bidibo suaibao, tama agai te we sabo homu yaibao. 
Te da, te bidi naga te we naga beba odasa pelama, tama te we agai aga tobolu nisi sese togwa sąmainao, tama me agai nogo dani sese togwao. 
Tama agai te wego te kalabus hanude gudali te ugwa sese sela sąmainao, te gasa ugwa gudao. Tama aga te bede bidiyu, aga ida aya hagede gela odubadi, te polua deli pomainao, tama nosali nago te we sagameo. 
Tama tialima, nosali da, nago aga godolo ma isąma ebaso da, teda nago aga olo ma taga palao. Magi baso meni, nago aga bomo elama, kegelama, tama dage si te pagela piali dao. Tilama, nago te olo sę we dao homu elama, tama gasa bidi mego abelemainao homu me elamo dao. Mu menio,” Mosesgo te po wai. 
Tama Mosesgo po geninama weyu, te po wali, “Tialima, bidi mego te we si sai baso da, tama agai te we me deli naga godolo mu elama, tama agai me we kuna godolo isąma ebaso da, tama te wego aga gomunai ogwa ame nenama, tama nosali me wego me ogwa ame nobaso me. 
Tama te bidi aga homugo te aga isibo sogo augwaligo te nai dabe te ogwa dabe dali dobayabo homu ebaso da, teda agai te gomunai ogwago sabo doado bage sa muyu, te aga godolo ebo wego ogwabolo magio. Menio. 
Agai te e kolesaga wali peyu, tama tiao. Agai te doado bage bugulama, tama te ogwa wegi augwali tigidali deli delibolo maiabo nai dodolama, tama te hasia mu ame nani ogwa agabolo te doado bage me manama, agabolo mawainogo sa muao. Te agabolo maiabo nai te dadagano pabo sę tama yao. Magi baso meni, te da te bidi aga hasia mu te ame nai ogwa dao. Tama aga da te aga ayago gomunai ogwa mu dao, tama agai te gomunai ogwago te sabo doado bage nosali somainao,” wali. 
Tama Mosesgo po geninama weyu, te po wali, “Tialima, te bidi mego te ogwa me deli bidiyu, tama tigidali sogo te aga ida de aya sigo po sela sąduai dao, tama augwaligo aga eliyu iduali goli, tama agai aga ida ayago po me sela sąyu, te wali pisąma eyu ebaso da, 
teda aga ida ayago te wai augwa hanude bidibo tobolu bidi dabe pageba odasa pelama, te wai po tų ela momainu yao. 
Te ida ayago te tobolu bidi dabebolo te po wao, ‘Da sigo ogwa te bidi po odisąbo bidi dao,’ po wao, ‘tama po sela sąyu, tama agai da sigo po odobo menio. Aga te polobo bidi tiwai dao, aga te poliyu, da sigo mone subigila sąyu ela bilibo dao,’ tama po wao. 
Tialima, te hanude tobolu bidi dabego te ogwa te masigi nogogo selama, aga tigiba sąnama, elama, isilao. Tama tialima, dagego te dwai nai dabe sela sąnama, tama dage tomode elalumainu igio. Tama te Israel we bidi sesego te tama tiali po odama, tama augwali wi yaibao,” Mosesgo te po wai. 
Tama Mosesgo po geninama weyu, te po wali, “Tialima, te bidi mego te dwai kolesaga mu yai baso, tama augwaligo aga elama, tama augwaligo agai tigi te ni pos me delide walai baso da, 
teda te nide walalubadi, te be huliama, kigamu ebo te habu mu dao. Magi baso meni. Bidigo tigi te nide walalubo te Godigo gedude te dwai sęgę maiabo bidi mu dao. Tama tialima, te bidigo tigi te bidi isibo sogo tama pubulao. Ma, meni eyu da, teda te Genuai Bidi dago God agai dabolo te mani tǫ te agai gedude te dwai meda mu ilaibao,” Mosesgo te po wali. 
